Tambag sa inahan

CEBU, Philippines - Mipahimangno si Melanie Marquez ngadto sa iyang anak nga si Michelle Dee nga mohimo og kaugalingong estilo sa pagrampa aron motatak kini sa panumduman sa mga tawo. Si Michelle nagsugod na karon sa bansay-bansay sa pagrampa. “Kailangan niyang maging original. Huwag siyang maging copycat. Hindi ka sisikat kapag copycat ka”, suma pa ni Melanie.

Maayo nga aktres ni Direk Joel

Gibutyag ni Direk Joel Lamangan dili tanang artista nga nagpaubos og workshops mga maayo na. Gipamatud-an niya nga kasagaran sa mga beteranong artista wala makaagi og mga workshop sama nilang Nora Aunor ug Vilma Santos. Matud pa niya nga ang tinuod nga bansay nga artista usa kini ka matuod nga tawo nga walay gitago sa kaugalingon ug kamao modala sa sitwasyon. 

Daghang proyekto

Gitataw ni Barbie Imperial nga walay labot ang miulbong issue sa ilang grupo sa Girl Trends sa iyang pagbiya. Matud pa niya nga daghan na siya og giatiman nga proyekto nga kinahanglan gyud niya hatagan og atensyon.

Make-up tutorial queen

Daghan ang nalingaw sa nagtrending karon sa social media nga video sa usa ka babaye nga nagmake-up tutorial ibabaw sa tricycle.  Ang babaye sa maong hugyaw nga video giila nga si Anne Rhycie Kate Custodio nga taga-Iloilo City. Miabot na kapin sa 2 million ang views sukad kini gi-upload.

Gustong molampus

Desidido gyud nga lampuson ni Angelica Panganiban ang iyang pagtungha sa culinary studies. Matud pa niya nga dugay na gyud kini niya nga giplanuhan nga humanon ang iyang nasugdang karera apan wala gyud siya’y magahin nga oras tungod sa nagpunsisok nga mga proyekto. Malipayon siya karon gumikan kay gitugtan siya sa ABS-CBN management nga mopadayon sa iyang pag-eskwela samtang naghuwat kung kanus-a magsugod ang iyang sunod nga proyekto.

Pagtabang ni KC

Nagpahigayon og feeding program ang aktres nga si KC Concepcion sa Maguindanao human makatigom og usa ka milyon ka piso pinaagi sa pagpamaligya sa iyang mga sinina. Hugtanon nga gipadayag ni KC nga dili kinahanglan nga mahimong adunahan aron makatabang sa lain tawo. “Hindi mo kailangan maging mayaman o sikat para makatulong sa iba. Hindi mo rin kailangang pumunta ng malayong-malayong lugar”, suma pa ni KC.

Aduna nay ka-date

Malipayon na ang kasingkasing karon ni Angel Locsin human niya gikumpirma nga nakipag-date na siya sa usa ka non-showbiz guy. Wala siya modetalye sa pangalan niini. Matud pa nga nagsugod pa lang sila sa ilang getting-to-know stage. Nanghinaot siya nga unta dili una unhan ang mga panghitabo sa iyang lovelife.

Dream project

Nagmalaumon ang Pinoy Big Brother Lucky 7 Big Winner nga si Maymay Entrata nga unta makahimo siya og usa ka music video kauban ang iyang onscreen partner nga si Edward Barber. "Sana makagawa tayo ng music video for 'Baliw' para mapanood rin tayo sa MYX!", suma pa ni Maymay.

Love Wins

Nadayun ang seremonyas sa kasal sa designer nga si Francis Libiran ug sa iyang hinigugma nga si Mark Jacobs didto sa Boracay kagahapon. Gipamatud-an sa designer nga wala gyu’y makababag sa ilang panaghigugmaay bisan og managsama ra ang ilang sekswalidad.

Na-inlove og samot

Gidayeg ni Kylie Padilla ang amahan sa iyang gisabak karon nga si Aljur Abrenica. Matud pa niya nga na-inlove siya og samot tungod sa kanunay nga pag-atiman kaniya ug mokugi gyud kini nga bantayan siya bisan og gikapoy na kini gikan sa shooting. (BANAT NEWS)