Daiana miplastada sa lawas

CEBU, Philippines - Nag-aso-aso ang instagram account karon ni Daiana Menezes  gumikan sa iyang sexy photos nga gi-upload niining nakalabay nga mga adlaw.

Todo hatag og update si Daiana sa mga lugar nga iyang gilaagan sanglit tipik kini sa iyang show sa GMA News TV nga  "Fiercest of Them All”.

 Giplastada sa aktres ang iyang sexy body samtang nilaag sa Boracay ug Batangas.

Wala’y pugong-pugong nga gisul-ob ni Daiana ang swimwear  kun diin molutaw  ang kurbada sa iyang lawas.  

Trip ni Kris giuswag

Giuswag ang airing date  sa  travel special  ni Kris Aquino sa  GMA-7  nga  Trip Ni Kris, gikan sa  March 26, ngadto na April 9.

Wala gidetalye sa TV host ang rason sa pagka-uswag niini  apan  nipadayag kini nga angayan atngan ang maong show gumikan kay daghan gyud ang idalit niini ngadto  sa viewers.

Una na nga gibutyag ni Kris nga gimingaw na siya og maayo sa pag-host og TVF show busa puwerti niyang lipaya nga nakabalik na siya niini.

"It took 11 months of not having long road trips, being outdoors in extreme heat, and 16 hour shoot days for me to be so very grateful to be back doing what I love- na miss ko the sense of discovery, learning & sharing in the lives, stories, and experiences of other Filipinos. For now, DEDMA na sa lack of sleep & exhaustion,” suma pa sa Instagram post sa TV host.

Nasayran nga dili lalim ang naagian ni Kris sa pagbalik niya sa telebisyon gumikan kay duna’y higayon nga natagakan og puthaw ang iyang tiil atol sa taping sa maong show.

PIA: He’s mine now

Gipadungog dungog ni  Miss Universe 2015 Pia Wurtzbach ang mga babaye  nga interesado  sa iyang boyfriend nga si Marlon Stockinger. Ni-post og komento si Pia sa Instagram post ni Marlon sa miaging adlaw kun diin kauban niini  ang ubang gi-feature nga  celebrities sa cover sa  usa ka glossy magazine..

Nipasidaan  si  Pia sa mga babayeng nipadala og mensahe sa iyang uyab.

Wala panganli ni Pia kun kinsa ang gipasabot sa iyang mensahe apan  makahuloganon kaayo kini.

"That's mine on the left. You girls better know. Stop messaging my boyfriend. I know who you girls are. And I feel sorry for girls who let this one go. But oh well he's mine now,” suma pa ni Pia.

Dili kini ang labing una nga higayon nga nipakita si Pia sa iyang nagpungasi nga gugma kang Marlon. Sa katapusang  #AskPia session sa Twitter, usa ka  follower ang nangutana kang  Pia: “Pedeng akin na lang po si Marlon?”

Nitubag dayon  ang  beauty queen og ,  “Mars sorry. Sakin siya.”  

Kimeral sa MMK

Ang kanhi mag-uyab nga sila si Kim Chiu ug Gerald Anderson ang mga bida sa Maalaala Mo Kaya karong Sabado March 18,  ug mao kini ang ikaduhang higayon nga nagkauban sila sa maong show.  “It’s our second time to do an ‘MMK’ episode, kami ni Kim. Nakagawa kami ng ‘MMK’ dati noong bago pa kaming labas ng ‘PBB.’ That was a great experience. Isa 'yun sa mga pinaka-proud moments ko of my career kasi nakagawa na ako ng ‘MMK,’ saysay pa ni Gerald ngadto sa ABS-CBN News.

Nagpanikad na kaayo si Gerald sa mahimong resulta sa maong episode gumikan kay dugay na nga nag-atang ang Kimerald fans sa subli nila nga panagpares sa usa ka proyekto.

Managsama nga produkto sila si Gerald ug Kim sa reality show nga Pinoy Big Brother sa ABS-CBN.

Gimik lang?

Nagsinukliay og sweet messages sa Instagram sila si Marian Rivera ug Andrea Torres ug nagpamatuod kini nga wala nag-away ang duha.  Pipila ka netizens nga nagtoo nga gimik ra diay ang tsika nga niulbo sa miaging adlaw nga matud pa nag-isnabay sila si Marian ug Andrea sa back stage sa Sunday Pinasaya.

Resulta sa kahago

Napalit na ni Janine Guttierez ang iyang dream car ug giingong nagkantidad kini og P3 million.  Nagpusotpusot ang blessings nga nadawat ni Janine. Dili pa lang dugay, nakapalit usab ang aktres og bag-ong balay.

Bag-ong balay ni AiAi

Malipayon si Ai Ai delas Alas gumikan kay hapit na mahuman ang gipatukod niya nga balay sa Quezon City. Niabot og dul-an sa usa ka tuig ang construction niini  ug posibleng mapuy-an niya kini sunod buwan.

Karla mahinatagon

Nakakita gyud si Pokwang kun unsa kabuotan ang iyang higala nga si Karla Estrada. Atol sa paglugwa sa Tawag Ng Tanghalan grand winner nga si Noven Belleza sa Magandang Buhay ,  nakita ni Pokwang nga duna’y tawong nihatag og tseke ngadto kang Noven aron ipalit og sinina. Didto niya nasuta nga si Karla maoy nagpadala sa maong tseke.  Usa si Karla sa mga hurado sa TNT busa nakasunod gyud kini sa dagan sa kinabuhi ni Noven.

Nag-enjoy pa

Bisan pa man nga upat ka tuig na ang relasyon nila ni   Will Devaughn ug Roxanne Barcelo, wala pa gyud sa ilang hunahuna nga magpakasal.  Dili kaayo open sa publiko ang ilang relasyon ug usa kini sa gituohan nila nga  hinungdan nga tulin ang dagan sa ilang relasyon.

Misalmot sa exhibit

Gipangulohan sa Film Development Council of the Philippines ang  delegasyon sa Pilipinas   sa bag-ohay lang nga  2017 Hong Kong Filmart . Ang maong kalihokan gipahigayon sa  Hong Kong Convention and Exhibit Centre. Niabot ngadto sa 800 exhibitors gikan sa 60 ka nasud ang nisalmot niini.

Beach house

Gipaneguro ni Enrique Gil nga duna gyud siya’y makita sa iyang kahago. Nakapalit na si Enrique og beach house sa Batangas.  Sa maong lugar kasagaran mag-relax si Enrique kun dili siya busy.

Kuwarta ni Janella nahibalik na

Nakugang pag-ayo si  Jenine Desiderio nga nakuhaan  og kapin sa  P100,000 ang sulod sa bank account sa iyang  anak nga si Janella Salvador. Nasuta niya nga duna’y misteryosong transaksiyon nga nahitabo sa account sa iyang anak. Hinuon niaksyon ang mga tagdumala sa bangko  kalabot sa maong reklamo. Malipayon si Jenine gumikan kay nahibalik na sa miaging adlaw ang nawala nga kantidad sa bank account ni Janella.

Paul nagpa-abs

Mapahiyomong gitsika ni Paul Salas nga gamay na lang ang kulang ug ma-achieve na gyud ang gitarget niya nga "six-pack abs".  Todo workout ang aktor samtang nagpaabot og showbiz project.   (BANAT NEWS)