dyHP: Tulo ka dekada nang hawod!

CEBU, Philippines - Kapin na sa tulo ka dekada nagpabiling numero uno ang dyHP sa Radio Mindanao Network. Kini suma pa sa KBP and Kantar Media  Survey sa ikaupat nga quarter karong tuiga.

Ang dyHP naka-angkon og 59.29% nga rating busa naghudyaka og maayo ang mga kadagkoan sa maong istasyon nga gidumala ni Atty.  Ruphil Bañoc

“Tulo ka dekada nami nga nagpabiling numero uno, kung sa una nailhan kaayo mi sa drama, apan karon, kay balanse na ta, kusog ta sa drama ug kusog pud ang dyHP sa atong mga news and public affairs programs,” matud pa ni Bañoc.

Dugang pa ni Bañoc nga paghatod og latest nga mga impormasyon maoy usa sa mga assets sa dyHP.

“Sa mga panghitabo sa palibot, abtik kaayo ang dyHP sa paghatod ana ngadto sa atong listeners, sama anang mga report ni Paul Lauro. Kung maghisgot pud ta og komentaryo,   credible sad ta anang butanga. Pang-masa gyud ang mga programa nga gidalit sa dyHP,” matud pa niya.

Wala pu’y paghupas ang drama programs sa dyHP  ug gipasigarbo kini ni Bañoc  gumikan kay gawas nga makalingaw, aduna usab kini mga pagtulun-an.

“Kinahanglan gyud ta og pang-masa nga programa gumikan kay sila man  ang atong target.  Makadawat pa sila og latest nga mga balita, malingaw pa gyud sila sa atong mga drama. Hingusgan pa nato og samot ang paghatod og nindot nga mga programa,“saysay pa ni  Bañoc.

Usa pud sa nakapalig-on og samot sa dyHP ang paghatud nila og dugang serbisyo publiko   sama sa pagpahigayon nila og mga medical mission, bloodletting activity  ug daghan pa.

“Ato gihapon ipadayon ang pag-alagad sa katawhan pinaagi sa nagkadaiyang activities ,” dugang pa niya.

Matud pa ni Bañoc  nga dili gyud nila kalimtan  ang  usa sa  ilang mga misyon , ang tinud-anay nga pagpangalagad sa katawhan ug nakatatak na gyud kini sa kasing-kasing sa ilang listeners.

Nasayran nga nahimong taytayan ang dyHP sa mga pipila ka mga tawo  nga manawagan sa ilang mga minahal sa ilang kinabuhi nga naa sa laing dapit.

Sa programa ni  Bañoc  sa buntag,  aduna’y mga tawo nga mobisita kaniya nga magpa-public service, sa maong pamaagi, nakatabang na sila sa mga tawo.

“Sa tanan namo nga listeners, salamat kaayo sa kanunay ninyo nga pagsuporta sa mga programa sa dyHP. Makalaum mo nga magpadayon gyud ang paghatod namo ninyo og balanse nga mga programa. Komentaryo nga wala’y pagdapig-dapig, paghatod sa mga impormasyon nga angayan ninyo masayran, ug kana gyud ang ihatod sa dyHP diha kaninyo,” panapos pa ni Bañoc.

KBP and Kantar Media Survey

4th quarter (AM stations)

1.dyHP 612  RMN  Khz –   59.29%

2.dySS 999 Khz  Super Radyo  -  25.67%

3.dyAB 1512 Khz Radyo Patrol -  5.59%

4.dyRF 1215  Radyo Fuerza – 3.97%

5.dyRC 648Khz Radyo Calungsod -  3.07%

6.dyMF 963Khz Bombo Radyo –  2.06%

7.dyAR 765Khz  SONshine Radio – 0.23 %

8.dyMR 576Khz Radyo ng Bayan 0.09%

9.dyKC 675Khz Radyo Ronda   - 0.05%

(BANAT NEWS)