Grand Fiesta Manila 2016; Nanghugyaw ug gihangop si Annie!

PASAY CITY, Philippines --   Napuno sa kamaya,  ug nalingaw gyud ang mga nitan-aw sa musical play nga “Annie” didto sa Resorts World Manila (RWM).

Bida sa maong dula sa entablado ang 9 anyos nga si Krystal Brimner ug ka-alternate niya sa maong role ang 10 anyos nga si Isabeli Elizalde.

Ang RWM maoy nagpaluyo sa Full House Theater Company and Ultimate Entertainment nga nakamugna sa hugyaw kaayo nga musical play.

Kabahin kini sa istorya sa batang babaye sa orphanage  ug suwerting gisagop sa usa ka adunahan nga tawo.

Gikauban usab ni Krystal sa maong proyekto ang beteranong aktor nga si Michael de Mesa kinsa nidala sip Oliver “Daddy” Warbucks.

Gipamatud-an ni Michael nga wala pa gyu’y paghupas  ang iyang dili basta-basta nga estilo sa pag-arte nga nakakuha usab og dakong atensyon sa audience.

Ang banggiitan nga direktor nga si Michael Stuart William maoy naa sa likod sa tulin kaayo nga dagan sa maong musical play.

Gipasigarbo pag-ayo sa RWM ang maong play gumikan kay dili basta-basta ang pag-arte sa mga bata ingon man usab ang hugyaw kaayo nga stage production. Una na nga gibituonan ni Lea Salonga ang “Annie” niadtong 1980.

Nasayran nga dili na bag-o sa batang bida niini nga si Krystal gumikan kay nisidlak na kini kaniadto sa pelikulang “Honor Thy Father” nga gibidahan ni John Lloyd Cruz.

Ang maong pelikula nahimong kabahin sa 2015 Metro Manila Film Festival kung napili nga Best Child Performer si Krystal.

Gumikan usab sa iyang maayong pag-arte, nakadawat usab kini og mga pasidungog sa  Trinity University of Asia Platinum Stallion Media Awards ug Gawad Guro Awards.

Nasayran nga mahiligon si Krystal sa pagsalmot og play sa ilang tunghaan apan ang “Annie” maoy labing una niya nga major play nga gisalmotan.

Sa pagbisita sa mga sakop sa media sa Sugbo sa RWM, nasaksihan niini ang hugyaw nga abilidad ni Krystal sa pag-arte ug dili basta-basta ang iyang gibuhat  gumikan kay gawas sa pag-arte ug pagkanta, gipakita usab niya ang tinagoan niya nga talento sa pagsayaw.

Usa karon ang “Annie” sa gidumogan kaayo sa mga tawo didto sa Resorts World Manila ug nahimo kini usa sa mga highlight sa Grand Fiesta Manila 2016 sa maong resort.  Ang Grand Fiesta Manila  2016 nagtangag sa tema nga "The Magic is Everywhere" ug gibuksan kini pinaagi ni RWM chief operating officer Stephen Reilly.

Nagkanayon si Reilly nga naandan na gyud sa RWM ang paghatod og mga kalingawan sa katawhan ug mogama og mga espesyal nga presentasyon ilabi na karon nga nagsingabot ang pasko.

Aktibo kaayo ang RWM sa pag-produce og mga musical play gumikan kay tumong nila nga ipakita ang pang-world class nga  abilidad sa mga Pinoy sa pag-arte sa entablado.

Atol sa appreciation night,  gipahibalo ang mga  dugang  kalingawan nga gidalit sa RWM nga naglangkob sa  '70's Filipino icons sa 'Yugyugan Nation!' , ang upcoming concert sa  Air Supply,'Hi-5 Fairy Tale of Australia', ug The Grand Countdown 2016 uban nila ni Lea Salonga, Bamboo, ug Jon Santos. (BANAT NEWS)