Ping gi-ihian ni Baron

CEBU, Philippines - Naglagot og maayo ang aktor nga si Ping Medina ngadto kang Baron Geisler gumikan kay gi-ihian siya niini  atol sa ilang shooting sa  pelikula nga “Bubog”, ug matud pa  wala kini sa script.

Matud pa ni Ping nga isumbong kini niya sa Film Development of the Philippines ug awhagon nga ipatangtang na si Baron sa industriya human sa iyang law-ay nga aksyon.

Gi-post ni Ping ang kinatibuk-ang istorya sa panghitabo sa iyang Facebook account. Matud pa niya nga naghilak kini tungod kay na-ospital ang inahan niini ug wala na siya’y kwarta. Gitunulan kini og P200 aron ipalit og pagkaon apan gipalit lang kini og ilimnong makahubog nga maoy sinugdanan sa tanan.

Nakamatngon si Ping nga wala na sa hustong kondisyon ug panghunahuna si Baron sa dihang nag-rehearsal na sila sa ilang pagahimuon nga eksena. Nasuko matud pa si Baron sa dihang gibalibaran ni Ping ang iyang hangyo nga ibalik ang eksena. Gani, nibahad na si Baron nga aduna siya’y himuon ngadto kang Ping.

Nagsugod na ang pagkuha sa maong eksena ug nagtuo si Ping nga luwaan siya ni Baron apan nibarog kini sa iyang kilid ug dali nga giabli ang zipper ug  gi-ihian siya niini. “Umagos dito. Basang-basa ang shirt ko. Umagos ito hanggang sa bibig ko. Buti may nakatakip na tape”, suma pa ni Ping.

Gisukmag niya si Baron ug gipatiran  ang usa ka container aron makabawos sa aktor.

“Hindi ka tao. Mas mababa ka pa sa hayop.Kasi ang hayop hindi iniihian ang kapwa na nangingisi-ngisi pa ng patago. Nag-enjoy ka sa ginagawa mo,” dugang pa ni Ping. Midepensa usab si Baron sa iyang bahin ug giingon nga misunderstanding lang ang tanan. Matud pa niya nga gihatagan siya sa direktor og kagawasan aron mabuhat ang labing maayo sa maong eksena .  Gitawag usab niya ang  film industry nga “plastic.

Samtang ang chairperson sa FDCP nga si Liza Diño-Seguerra nisaway sa gibuhat ni Baron ug  gihulagway niya nga labaw pa kini sa hayop.

Bobbay na-stroke

Nalandig sa tambalanan niadtong Lunes ang komedyante nga si Boobay o Norman Balbuena sa tinuod nga kinabuhi human kini nakasinati og mild stroke. Giingon nga na-stress kini gumikan kay sagunson ang trabaho nga gibuhat sa komedyante ug wala na kini igong pahuway.

Base sa ulahing  update sa iyang partner  nga si Kent Juan Resquir nga arang-arang  na ang pamati sa komedyante ug  padayon kini nga giobserbahan sa mga doktor. 

(BANAT NEWS)