Brigada, mas palig-onon pa!

CEBU, Philippines - Target karon sa Brigada News FM 93.1 nga dili gyud mohunong sa pagmugna og mga kalihokan diha sa kabarangayan ingon man usab ang pagdalit og mga programa  nga hangupon dayon sa masa.

Kini maoy gibutyag sa assistant manager sa maong istasyon nga si Chester Abadilla aron mamintinar nila ang number one slot sa survey. Una na nga gibalita dinhi sa Banat News Hugyaw (BNH) kagahapon ang ilang pagka-numero uno sa fourth quarter sa KBP and Kantar Media Radio Studies Result diin nakaangkon kini og  21.85%.

Gitataw ni Abadilla nga ipabilin gyud nila ang “Harana” program nila sa weekend nga naghatag  usab og oras sa mga tawong mahiligon sa karaang awit .

Nakadawat usab sila og mga positibong feedback  kalabot sa pagbanhaw nila sa bisrock matag Domingo .

“Daghan man gyud ang ganahan sa Bisrock, ug sa kanang Harana, kung unsa ang gusto sa atong listeners, ato gyud sila hatagan og katagbawan,“ suma pa ni Abadilla.

Dugang pa niya nga dili lalim ang gibuhat nila aron lang maangkon ang unang puwesto.

“Dili gyud na mawala ang atong mga meeting, maminaw kun unsa gyud ang gipangita sa mga tawo . Kung duna’y mga sugyot , amoa gyud nang tun-an , “ dugang pa niya.

Gumikan sa todo nga paningkamot sa tanang personalidad sa Brigada News FM sa dul-an pa lang tulo ka tuig sa kahanginan, nasulod dayon sila sa Top 5 sa kusog nga mga FM station dinhi sa Sugbo.

Bisan pa man nga nag-una sila karon, dili gyud mawala ang padayon nila nga konsultasyon sa listeners aron maseguro ang paghatod og balanced programming.

“ Tumong gyud namo nga makahatod og balita, ug  makalingaw nga  sonata sa katawhan . Duna’y oras nga pang-AM ang format, unya aron ma-balance siya, duna pu’y music program. Salamat kaayo sa tanang listeners nga nisuporta sa among mga programa, “panapos pa ni Abadilla.

Nasayran nga nahimutang sa ikaduhang pwesto ang MOR 97.1 Lupig Sila sa rating nga 15.52% ug gisundan sa Barangay RT 99.5 nga nakaangkon og 13.36%.

Gikalipay pag-ayo sa area manager sa Barangay RT AJ Ocampo ang maong resulta, bisan pa man nga naa ra sila sa ikatulo nga pwesto ug gipaniguro gyud nila ang paghatod og hugyaw nga mga programa aron magpabilin sila nga humot sa masa.

“Congratulations sa lahat ng stations nga nakapasok Top 5, tinatanggap po namin yung resulta, siyempre , una naming pasalamatan ang listeners,’ suma pa ni Ocampo.

Nagkanayon si Ocampo  ang  listeners maoy rason sa ilang kalampusan sa kahanginan. Malipayon hinuon siya nga nalakip ang Barangay RT sa listahan sa survey.

“Hindi kasi kami member ng KBP, yung sina- subscribe namin ay ang Nielsen Media Research kung saan kami ang number one . Pero kahit ano ang resulta, mananatiling gawin  namin ang lahat para ma-entertain namin ang listeners,”  dugang pa ni Ocampo.

Nagpabiling naglawig karon sa Barangay Rt 99.5 ang programang   Talk to Papa ni Papa Joe .

Samtang ang manager sa Win Radio105 nga si Roger Calope nipadangat sa iyang pahalipay sa kalampusan sa Brigada News FM.

“Siyempre ako na silang mga higala. Seguro time gyud nila karon, nakatabang gyud nila ang ilang pagka-AM format , “ suma pa ni Calope.

Nahimutang ang Win Radio sa ikaupat nga puwesto nga nakaangkon og 11.19%.

“Nali-pay ra pud mi sa result nga naa mi sa ika-no. 4, kay  sa last survey , naa mi sa ika-6 or ika-7 man tingale. Palig-onon pa namo og maayo ang mga programa aron mosaka pa ang among rank,” dugang pa ni Calope. Kusog ang Win Radio sa mga taxi units ug aminado si Calope nga nabahin na kini karon sukad naabot ang Brigada News FM.

“Medyo nabahin gyud siya, pero duna pu’y time slots nga kusog gihapon ta,” dugang pa ni Calope.

Usa sa naglawig karon nga programa sa Win Radio mao ang programa ni Mama Lou matag gabii kung diin motabang siya og mga love advice ngadto sa listeners.

Nalangkat sa 93.9 I-FM ang ikalima nga puwesto ug nakaangkon kini og  10.21% ug aminado ang manager niini nga si Raul Credo nga dili gyud matag-an ang panahon.

Nasayran nga aduna’y mga tuig nga nahimong numero uno ang I-FM apan gitataw ni Credo nga dili gyud sila mohunong sa pagama og mga programa nga kagaton sa masa. “Ing-ana gyud na, usahay naa sa taas, usahay naa sa ubos. Bisan pa man niana, maningkamot gihapon ta kutob sa atong mahimo, “ matud pa ni Credo.

Gipasigarbo gihapon ni Credo ang I-FM gumikan kay ilaha gyud nga gipili ang patok nga songs nga maoy pinangita sa mga tawo karong panahona.

Dili usab nila wad-on ang mga programa nga naghatag og mga tambag  sa mga tawo nga duna’y suliran sa gugma.

“Amo  i-check tingali,  kung unsa ang among mga pagkulang. Padayon lang gihapon ta sa paglingaw sa atong listeners,” saysay pa ni Credo. (BANAT NEWS)