Stephanie Lhui mawagtang na sa Power Trio!

CEBU, Philippines - Hingpit na nga hulipan si Stephanie Lhui isip miyembro sa sikat nga all girl singing group, Power Trio.

Ang manager sa M Talents and Events ug maoy nagmugna sa nahisgutang grupo duha ka tuig na ang nilabay nga si Aida Patana, nibutyag sa Banat News Hugyaw (BNH) kagahapon nga gikinahanglan kini sanglit pormal na nga magsugod sa iyang solo career sa Manila si Stephanie Lhui.

Kahinumduman nga bag-ohay lang nga nipirma og kontrata si Stephanie ubos sa talent agency sa showbiz personality nga si Ogie Diaz, aron ang nahisgutan na maoy mudumala sa career niini.

Pagkakaron, atua na siya sa Manila nagbase sanglit gipailawom siya og nagkadaiyang workshops sa natad sa pag-awit, pag-arte, pagsayaw ug sa tukmang pagtinagalog ubos sa G-Force ug ni Marissa Sanchez.

Pagkakaron, sila si Masumay Booc ug May Mananquil na lang ang nahibilin dinhi sa Sugbo hinungdan nga mupahigayon sila og auditions matag Biyernes ug Sabado sugod sunod semana diha sa Michelangelo Pizzeria-City Time Square.

“Nindot og tingog ug gwapa, unya 18 to 25 years old,” butyag pa ni Aida sa iyang gipangita nga bag-ong miyembro sa Power Trio.

Dungan niini, gibutyag niya nga ang ilang pag-guest sa show ni anhing Kuya Germs nga Walang Tulugan niadtong bag-o pang nagsugod ang Power Trio maoy maisip nga labing halandumon nga kasinatian nila isip grupo.

“Lipay mi kay first national appearance then daghan na nikuha nila mga gig,”  hinumdom pa ni Aida sa benepisyo nga ilang natagamtam human sila nilugwa sa Walang Tulugan.

Giangkon ni Aida nga naguol siya nga mawagtang na sa grupo si Stephanie, apan nalipay sab siya alang niini gumikan sa posibleng mahitabo sa career niini didto sa kaulohan.

“Maguol pero para sad sa kaugmaon sa akong anak basin makakita og big opportunity sa Manila, kaloy-an ni Lord tawon,” butyag pa ni Aida.

Sa pikas bahin, nalipay ug mapasalamaton usab si Aida gumikan kay sa wala pa hingpit nibiya si Stephanie sa grupo, nominado ang Power Trio sa Viewer’s Choice Award sa Sunday lifestyle show MagTV Na, alang sa Sikat of the Year category.

Dungan niini, nanawagan siya og suporta alang sa grupo pinaagi sa pagtype og: SIKAT (space) POWERTRIO ug ipadala sa 09375787980. Ang voting kutob na lang sa November 23.

Magtigi na!

Pormal na nga gipaila ang walo ka mga pelikula nga maoy magtigi alang sa umaabot nga Metro Manila Film Festival 2016.

Kini mao ang mga musunod:

Ang Babae sa Septic Tank 2: Forever is Not Enough-nga bidahan nila ni Eugene Domingo ug Jericho Rosales.  Si Marlon Rivera gihapon maoy direktor, ug lakip sa casts sila si Joel Torre, Agot Isidro, Cai Cortez, Kean Cipriano, ug Khalil Ramos.

Die Beautiful-nga gibituonan ni  award-winning actor Paolo Ballesteros kauban sila si  Luis Alandy, Gladys Reyes, Albie Casino, Lou Veloso, Inah De Belen, IC Mendoza, ug Christian Bables. Si Jun Robles Lana maoy nagsuwat ug direktor niini.

Kabisera-nga gibituonan ni superstar Nora Aunor, kauban ang mga beterano nga sila si Ricky Davao, Perla Bautista, ug Ces Quesada. Lakip sab niini sila si JC de Vera, Jason Abalos, Victor Neri, RJ Agustin, Ronwaldo Martin, ug Kiko Matos. Sinuwat ni Real Florido, kinsa co-director niining maong pelikula kauban si Arturo  “Boy”  San Agustin.

Oro-usa ka horror film starring Joem Bascon ug ubos sa direksyon ni  Alvin Yapan. 

Saving Sally-nga pelikula ni Avid Liongoren ug gibituonan nila ni Rhian Ramos, Enzo Marcos, ug TJ Trinidad.

Seklusyon-nga gibituonan nila ni Dominic Roque, Hashtag member Ronnie Alonte, volleyball prayer John Vic de Guzman, ug model JR Versales. Lakip sab niini sila si Neil Ryan Sese, Lou Veloso, Elora Espao, Phoebe Walker, ug Rhed Bustamante diin si Erik Matti maoy direktor.

Sunday Beauty Queen-usa ka documentary-drama nga sinuwat ug ubos sa direksyon ni  Babyruth Villarama-Gutierrez.

Vince, Kath and James-usa ka romantic comedy movie starring Julia Barretto, Joshua Garcia, ug Ronnie Alonte. Nagsugod isip online series ug nahimong viral hit sa social media, kining maong pelikula naglakip sab nila ni Ian Veneracion, Bea Alonzo, Iza Calzado, Enchong Dee, ug JK Labajo. (BANAT NEWS)