Aktor na may ibang ka-loveteam, sa ibang aktres na-in love!

PIK: Magkakaroon uli ng reunion ang mga hitmakers na sina Rico Puno, Rey Valera, Hajji Alejandro, at Marco Sison sa December 9 na pinamagatang The Best of the OPM Hitmakers na gagawin sa Newport Performing Arts Theater sa Resorts World Manila ng Starmedia Entertainment.

Gusto raw sana nilang makumpleto, kaya sinubukan ni Marco na ma-contact si Nonoy Zuniga na naka-base na sa Amerika. Nabuo na ang line-up at nagawa na ang poster nang sumagot si Nonoy kaya baka sa isang show daw nila sa Amerika ito makakasama. Idinagdag nila si Jessa Zaragozabilang special guest.

Naniniwala ang original hitmakers na nariyan pa rin ang supporters nila na sabik pa ring mapakinggan ang kanilang hit songs. Hindi raw sila natitinag sa mga bagong singers sa ngayon, dagdag pa ang non-singers na naghi-hit ang concert.

Sabi ni Rey, suportado nila ang mga bagong singers kahit hindi pa sila magaling kumanta. Pero itutuloy pa rin daw ni Rey ang pagtuklas ng mga bagong singers na kukunin niya sa Tawag ng Tanghalan ng It’s Showtime.

Aminado siyang marami sa mga sumali sa Tawag ng Tanghalan ang mas magaling pa sa kanila kaya dapat mabigyan ng break.

Kaya itutuloy nila ang Songwriter’s Project na gagawin nilang album tampok ang mga contestant ng Tawag ng Tanghalan.

PAK: Narinig ng kaibigan namin na “babe”  ang tawagan ng kilalang morenong aktor at morenang aktres. Hindi lang “babe” kundi nag-“I love you” pa sila sa isa’t-isa. Hindi akalain ng aming kaibigan na may relasyon ang dalawa dahil sa ibang aktres naman na-link ang aktor.

Nagkasama ang dalawa sa isang drama series na namayagpag at tumagal sa ere. Kaya posibleng nagkadebelopan at baka nga tahimik lang at lihim ang namuong relasyon sa pagitan nila.

Kung makakapasok sa Metro Manila Film Festival (MMFF) ang pelikula ng morenong aktor at morenang aktres, iitatanong namin ito sa kanila sa presscon.

BOOM: Maluwalhating iniluwal ni Mariel Rodriguez ang first baby nila ni Robin Padilla na si Baby Isabella. Nasa Instagram account ni Robin ang video post ng pangnganak ni Mariel na tinutukan niya thru Skype.

Ayon sa post ni Robin, nanganak daw si Mariel sa Amerika ng November 14, Lunes ng 7:56 ng umaga. May timbang daw ito na 7.3 pounds, at may haba na 20 inches.

Umabot ng 21 hours ang pagli-labor ni Mariel at nagpapasalamat ang aktor sa Diyos dahil normal ang panganganak nito.