Batch 8 sa Sinulog Idol gipaila na!

CEBU, Philippines – Hingpit na nga gipaila ngadto sa publiko ang 12 ka finalists nga maoy magtigi alang sa Sinulog Idol Season 8   nga mosikad karong Enero sunod tuig.

Human sa lapad nga screening sa milabay nga mga semana,  napili nga finalists sila si Mary Jane Adolfo (21),  Dave Alcano (22),  Jade Anthony Alia (25), Lorymae Baring(20), Mitsuko Cabillada (21),  Kristal Mae Dianon (21),  Jan Echavarria (20), Roberto Miranda (20),  Justine Camille Narvios (16), Kevin Roises Tecson (20), Aian Vincent Uba (22) ug Reuben Ross Virtucio (22).

Gibutyag sa  Sinulog Idol project director  Gloria Villarojo nga nikabat ngadto sa  99  ang  ni-audition sa maong kompetisyon ug  gihashasan  ngadto sa 41, hangtod naabot    ngadto sa   12 .

Dugang pa ni Villarojo nga   magpabilin  gihapon sunod tuig ang matag gabii nga pagdalit  og lain-laing genre sama sa  Cebuano ,  rock  ug broadway  .

Mag-agi usab og  ubay-ubay nga mga workshop ang finalists , kini sama sa vocal, styling ,  make-up,  theater ug uban pa.

“Mga lig-on  pud karon nga batch,   dili sab  basta-basta ang ilang mga tingog,” matud pa ni Villarojo.

Tudloan usab ang finalists sa  pamaagi sa saktong  pag-abi abi og mga sakop sa media.

Inigkasugod na sa maong kalingawan, magsagunson na ang ilang mga  rehearsal ug inigkahuman  sa ilang  performances matag gabii , aduna’y  mahitabo nga general evaluation nga dumalaon sa mga  hurado nga naglangkob nila ni Banat News Hugyaw editor ug dyRC program host Ryan Mark, Center for Pop-Cebu branch manager Jay Unchuan ug  Pinoy Dream Academy scholar Apple Abarquez .

Naumol ang maong   kompetisyon  aron pasidlakon  og samot  ang mga Sugbuanon sa natad sa pagkanta   sa nagkadaiyang dapit sa kalibutan.