Baby Girl

CEBU, Philippines - Malipayong gipahibalo ni  Nadine Samonte nga babaye ang ilang unang anak sa iyang bana nga si Richard Chua.  Panganlan nila ang maong bata og  Heather Sloane. Gibana-bana nga manganak ang aktres karong October.

Aksyon og kabalaka

Gibutyag ni Ritz Azul nga nasayod siya sa  balita nga usa siya sa gipilian nga mamahimong Darna human ming back-out sa maong proyekto  si Angel Locsin. Matud pa ni Ritz nga malisang siya kung maghunahuna niini gumikan kay nasayod siya nga daghan pa siya og agian ug angayan pamatud-an sa iyang pagka-artista.

Trailer gipakita na

Gipakita na ang trailer   sa  anniversary movie nila ni Alden Richards ug Maine Mendoza nga Imagine You and Me nga gi-shoot sa Italy. Matud pa sa Eat Bulaga host nga si Vic Sotto nga si Maine ang magsilbing lyricist ug interpreter alang sa theme song sa maong pelikula nga gidirek ni Direk Mike Tuviera.

Kristine gikagubtan

Gikagubtan si Kristine Hermosa sa Twitter human nahimuot ang netizens sa pagmintinar sa iyang kaanyag. Pipila ka  netizens ang niingon nga susama og dalaga ang hitsura sa aktres  .

Bea nag-negosyo

Aduna’y online business  ang Kapuso Star nga si Bea Binene kauban ang iyang stylist nga si LA Ferriols. Usa ka buwan lang ang iyang preparasyon niini  ug ginganlan kini  og The Stylist Bin.  Mga bag ang gipamaligya ni Bea.

Aicelle nakuyawan

Usa ka semana na ang nilabay human sa operasyon ni  Aicelle Santos sa iyang tutunlan , nangandam na karon og balik ang singer  sa musical play nga  Rak Of Aegis.Suma pa ni Aicelle nga excited ug nakuyawan siya sa iyang pagbalik og kanta tungod sa iyang operasyon. “Getting emotional watching the cast of Rak  rehearse for its fifth run. Mangha sa galing ng bawat isa sa entablado, saya dahil muling makakapiling ang aking pamilya, may takot at kaba kung muling maabot ang mga kanta,”  saysay sa singer.

Mark misaad

Gibutyag ni Mark Herras nga katulo siya gi-basted ni Wynwyn Marquez sa wala pa siya hingpit nga gisugot niini. Matud pa ni Mark nga daghan siya og gibag-o sa iyang kinabuhi tungod ni Wynwyn ug mahulagway kini ni Mark isip usa ka perpektong uyab . Misaad si Mark nga si  Wynwyn na gyud ang katapusang babaye sa iyang kinabuhi.

Campsawi version

Naghimo og laing version ang Campsawi cast  nga sila si Bella Padilla,Yassi Pressman, Andi Eigenmann, ug Arci Muñoz sa awit  nga Tatlong  Bibe  ug giilisan ang titulo og Tatlong Bobo. Nahimout ang netizens sa  maong version.

Gipakita na

Gipakita ni Michela Cazzola  pinaagi sa Instagram post  ang iyang dako na nga tiyan  samtang nag-bonding sila  sa uyab nga si James Yap. Gi-post ni James ang video nga nag-serve og pagkaon si Michela kaniya. Gikatakdang manganak sunod buwan si Michela.

Rhian mohulip ni Iya

Pormal na nga gianunsyo niadtong Martes nga si  Rhian Ramos maoy mohulip ni Iya Villania isip co-host ni Solenn Heussaff sa  Taste Buddies . Malipayon si Rhian sa maong proyekto ug nagpanikad na siya sa paglugwa niya sa maong programa sugod karong June 25.  (BANAT NEWS)