Grade 9 napili isip Miss Lamac 2016

CEBU, Philippines - Si Felmarie Iglesia, kinsa mo-Grade 9  karong Hunyo,  maoy nakoronahan isip Miss Lamac 2016 nga gipahigayon dili pa lang dugay didto sa  Lamac Auditorium sa Pinamungajan .

Gipildi sa tinun-an sa Sta. Monica Academy ang siyam ka laing mga kandidata lakip na ang iyang first-degree cousin nga si Aika Marie Iglesia, kinsa maoy iyang first runner-up.

Ang ubang mananaug mao sila si Donna Fe Sumampong (2nd runner-up); Joan Jane Quiaot (3rd runner-up); ug Chaizzl Lynn Ponting (4th runner-up). Mikompleto usab isip finalists sila si Wendelyn Tuquib; Ronamie Mahusay; Ma. Ericka Tunacao; Hanny Generalao; ug Mary Christie Bongco. Si Aika Marie ang nakaangkon sa  Best in Fun Wear, samtang Best in Gown usab si Joan Jane.

Nakombinser ni Felmarie ang mga hurado pinaagi sa iyang tubag sa final question, diin iyang gihataga’g bili ang iyang pagkamagbalantay sa kalikopan nga usa ka gasa sa Ginoo. Matud pa niya   nga naa sa mga kamot sa  tawo ang pagluwas sa planeta ug kini magsugod sa  tagsa-tagsa ka panimalay pinaagi sa paghipos og tarong sa basura, pagdaginot sa tubig, ug paghunong sa mga buhat nga nakahatag og kadaut sa kinaiyahan.

Ang duha pa lang ka tuig nga pageant wala mapakyas sa pagpasundayag sa maanindot nga talan-awon ug kultura nga iya ra gayud sa Lamac. Ang Lamac usa ka tagong komunidad nga nasulod sa yuta nga daw kawa ang porma. Usa ka dakong surprisa nga human tadlason ang libon, ngitngit, ug taas nga bukid, maaninaw gilayon sa pagsulod ang daw paraiso nga komunidad.

Dinhi makita sa Lamac ang sikat na kaayong Hidden Valley Mountain and Wave Pool Resorts nga gidumala sa Lamac Multipurpose Cooperative (LMPC), usa sa labing dako ug kwartahan nga kooperatiba sa tibuok nasud. Gipakita sa mga kandidata nganong angayan usab tawgon ang Lamac isip “summer capital of the south” pinaagi sa ilang fun wear nga gidisenyo ni Carlee Alferez. Sama sa mga tubod sa Lamac, ang fun wear hayag sa panan-aw, elegante, simple, ug daw nagpangamay sa pagtampisaw sa bugnaw nga tubig.

Si LMPC general manager Ellen Limocon nalipay nga ang ilang Coop Youth Laboratory maoy nangunay pagdumala sa mga kalihokan sa fiesta sama sa The Voice of the Valley, Lamacan Festival, ug ang Miss Lamac 2016. Matud  pa niya nga usa kini ka pagpadayag sa ilang social responsibility. Si Mrs. Limocon mao na ang nagdala sa LMPC sukad pa niadtong 1983 ug maoy hinungdan sa daghan na nga mga award nga nadawat sa coop.

Nagmalampuson ang Miss Lamac 2016 pinaagi sa pagpaningkamot sa organizing committee nga gipanguluhan nila ni Justine Lynn Limocon ug Kevin Paslon. (BANAT NEWS)