“I’m Sorry”

Ugma puhon eleksyon na. Ug karong semanaha, mahibaw-an na kinsa ang bag-ong presidente sa nasud. Labihan ka gubot rong panahona uy. Bisan asa ka muadto, ang mga tawo naglalis, nagpalabwanay sa ilang mga kandidato. Sa social media, ilabi na sa Facebook, labihan ka daghan ang nagnilabayay og lapok, nag-away kay lunod patay kaayo sa ilang mga kandidato. Bisan mga managhigala nagbungol. Naa man gani manag-uyab nga nagbuwag kay dili sila managsama og gustong botaran pagka president. Pakkk!

Apan salamat kay ugma puhon eleksyon na gyud. So sa Martes puhon balik na tas normal, inanay na nga mawagtang ang mga lalis kabahin sa politika. Kay ang eleksyon mga nyor ug nyora usa ra na ka adlaw, busa dili maayo nga tugutan nato nga maguba ang atong mga relasyon, mapukan ang atong panaghigalaay gumikan lamang niini.

Okay ra nang lalis karon, apan human sa eleksyon let us all start the healing process. Tataw man gyud nga daghan sab nga mga pagbati nga nasilo, daghan ang mga nasakitan ug nahiubos gumikan sa atong mga gipamulong. May mga naglagot kay atong gibirahan og maayo ang ilang mga kandidato. Ug kita sab susama og gibati sa higayon nga insultuhon o sawayon ang paborito nato nga kandidato.

Apan sugod karong Martes, magpinasayloay na ta.  Ato nang ilubong sa kalimot ang unsa man nga mga nahitabo tali sa matag pamilya ug panaghigalaay nga resulta sa atong panagbingkil gumikan lamang sa politika. Ang imoha o ang ako mang botaran pagka presidente maoy mudaog aron manimuyo sa Malacanang sa musunod nga unom ka mga tuig, human sa elekyon sugdan na nato ang panagtambayayong tungod ug alang sa Pilipinas.

Let’s start with, I’m sorry. Tubagon nato kini og pahiyum ug paggaksanay. Mao bitaw’ng lunod patay kay ta sa atong mga paborito kay naglantaw ta alang sa kaayuhan sa atong nasud. So yes, karon pa lang muingon na ko daan og I’m sorry and I mean it. Kay si Binay, Duterte, Poe, Roxas o Santiago man ang mudaog, dili ra na siya imoha o akoang presidente, kundili ato na nang tanan. Siya na maoy mamahimong inahan o amahan sa Pilipinas. Ug aron makab-ot nato ang atong gipanganti nga paglambo, angayan nga mutabang ta. Kay si bisan kinsa pa maoy ma-presidente, kun magsalig ra ta niya, wala gihapoy paglambo nga muabot ug mapahimuslan.

Mga panghinaot alang sa malinawon, matinud-anon, ug limpyo nga piniliay ugma puhon. Pag-ampo sa dili pa mo mubutar. Pag-ampo nga malamdagan mo sa inyong paghukom. Ayaw panamastamasi  ang ka sagrado sa imong katungod. Ayaw ibaligya ang imong boto. Botar pinasikad sa gipadayag sa imong konsensiya diha nimo. May God bless us all!