Pray and pray

Bendita sa Lukay na karong adlawa. Buot pasabot, unang adlaw sa Semana Santa.  Balaan nga mga adlaw nga angayan natong pahimuslan aron mahibalik sa hustong dalan, kun ugaling kita nahisalaag diha sa atong pagkinabuhi niining kalibutana. Pasensya na, apan dili ko ganahan anang maghinamhinam pagsugat sa holy week kay  aron makalaag ug makakiat sila. I grew up in a family nga nagtamod gyud sa Semana Santa isip balaan nga mga adlaw. In fact, lima gyud ko ka tuig nga nagserbisyo sa simbahan isip altar boy ug duha ka tuig isip lector. That’s why never pa gyud ko nakasuway nga mulaag aron maligo og dagat or mag-night life o unsa pa nga kiat-kiat basta holy week.

But then, akoa pud ni, ug inyo sab na. Buot nakong pasabot, dili ko magbuot ninyo mag-unsa mo karong semanaha kay wala man koy katungod pagbuhat niana ug gihatagan man kita og kagawasan ilawom sa landong sa atong Batakang Balaod. Apan, musulti lang ko, nga kun akoy masunod ug inyong paminawon, mas maayo gyud nga mupaduol kita sa simbahan—mag-ampo, maghinulsol ug mangayo og pasaylo. Alang lang ni sa mga katoliko, kay lahi man sab og mga ritwal ang atong mga kaigsuonang lahi og relihiyon.

Karon ang panahon nga atong suhiron ang atong kaugalingon, atong ilailahon pag-usab ang atong pagkakita ug paminawon ang pinitik sa atong kasingkasing ug ang mga pangindahay sa atong hunahuna. Sugdan nato kana pinaagi sa pagkompisal. Opps, I hear you. Di mo mokumpisal kay ang pari tawo ra sab ug makasasala nga sama kanato. Ug nakadungog sab ko ninyo nga nagkanayon, ay dah direct confession ra ko sa Ginoo uy!

 Nganong nakadungog ko? Kay sama man sab ko ninyo nga ingon ana ang baruganan. Gani, walo ka tuig gyud ko nga wala mukumpisal.  Kay mao lagi, nganong mukumpisal man ko nga walay siguro mas daghan pa og sala ang pari kay nako! Pakkk!  And those were the years nga ngiob gyud akong kinabuhi uy.  Arogante ko, hambugero, garboso. Basta, very negative akong kinabuhi. And yes, musimba ko ug mukalawat matag Domingo! And that was soo wrong!

Ngano man? Kay hugaw ang akong kasingkasing, hinungdan nga mamatay gyud ang bisan unsa nga balaanong pagbati nga buot nakong itisok ug palipangon. Kun hugaw ang imong kasingkasing, dili makasulod ang grasya, dili kini makagamot gumikan kay kan-on siya sa negatibong mga pagbati.  Hinungdan nga bisan unsaon nato og ampo, bisan musimba pa ta kada adlaw, dili gyud kita makatagamtam og grasya kun hugaw ang atong kasingkasing.

Nan, unsaon man kini paglimpyo? Kumpisal. Pangumpisal. Paghinulsol. And yes, I hear you again nga nagkanayon, dili pa man ko andam mukumpisal. That’s normal. Pray for it. Pray for an outpouring of the Holy Spirit.  Pray the Holy Rosary.  And yes, you are telling me now, ay di ko makamao murosaryo. Walay problema, pagpalit og rosaryohan nga adunay pakapin nga rosary guide—wala ran a ka abot og P50 ang presyo. I tell you, lahi ra gyud kun magrosaryo ka, kay ang giya ni Mama Mary matagamtam nimo, ug siya na maoy mangabogar para nimo ngadto  sa Ginoo. 

So this Holy Week pray, pray and pray.