Sutukil sa isla sa Seafood City
Lent Season na gyud. Ug timing kaayo ang imbitasyon nga akong nadawat alang sa subling paglusad sa Isla Sugbo Seafood City, diha sa Grand Convention Center niadtong February 12. Unsaong dili ma-timing nga two days before, Ash Wednesday man ug nihukom man ko nga mag-self sacrifice pinaagi sa dili pagkaon og karne hangtud sa Easter Sunday puhon. Pero wait, bisan og wala mo nagpabadlis, isip mga katoliko, kinahanglan gihapon mo nga magpuasa sa Biyernes Santo ug mag-abstinence matag Biyernes nga tanan hangtud sa Pasko sa Pagkabanhaw. Kana man gung magpabadlis symbolism rana.
So mao to, last February 12 sa buntag, loading kaayo akong beauty kay naghunahuna gyud ko’g unsaon akong kan-on inig abot nako sa relaunching nga dili maapektuhan akong self- sacrifice. Nakalimot ko nga seafood restaurant man diay akong adtuan gud. Hahaha..pasensya na usahay kining GGB (gulo-gulong buhay gumikan sa trabaho), dili sab gyud ta makahunahuna og tarong uy. Pakkk!
Pero pilay istorya, pagtekang nako sa Isla Sugbo Seafood City nga gidumala sa 101 Restaurant City Inc, nahugyaw ko uy. Ang-ang nga nag-showdown man silang Mylene Dizon ug Jericho Rosales. Nag-tandem sila si Mylene ug Chef Atong (Blue Team) ug Jericho ug Chef Sheena (Yellow Team). Ang challenge mao nga magmugna sila og sutukil (sugba, tuwa, kilaw), alang sa 150 ka mga tawo sulod lamang sa usa ka oras. Ang mudaog makadawat og cash prize nga ihatag ngadto sa Tzu Chi Foundation Philippines ug Operation Smile.
Ang ending winner ang Blue Team nila ni Mylene ug Chef Atong nga mao sab akong bet actually. Yes, kay ang ni-judge mao man ang mga dinapit nga mga sakop sa media ug bloggers gikan sa nagkadaiyang dapit sa Pilipinas. Bet na bet gyud nako ang kinilaw ug sinugba nilang Mylene uy! Lami kaayo og sauce ang sinugba. Lami sab tong sinugbang nokos nilang Jericho, pero mas hugyaw gyud ang timplada sa ilang Mylene. Ang tinola lami kaayong dimdimon ang sabaw. Lab-as man sab gyud gud tanang ingredients nga gikan pa gyung naglangoylangoy sa dagkong aquarium sulod mismo sa restaurant.
Timing gyud lagi kaayo ang maong relaunching karon nga nagsingabot na ang holy week. Gipasalig sa Presidente sa 101 Restaurant City Inc. Winglip Chang nga dili gyud mo magmahay nga ang matag dish nga –iserve lamian gyud. Actually, mu-agree ko kay nakatilaw man ko. Limpyo ug hamugaway sab ilang kusina uy. Nindot ang ambience sa restaurant mismo. Daghan sab gyud ka’g kapilian. Naa sab silay packages sama sa Fish Sugba, Shrimp Tinuwa ug Fish Kinilaw (Package A), Squid Sugba, Shrimp Tinuwa, Fish Kinilaw (Package B), Fish Sugba, Fish Tinuwa, Shrimp Kinilaw (Package C), ug Squid Sugba, Fish Tinuwa, ug Shrimp (Kinilaw), all for P1,600 per package and good for four persons. Libre na na appetizer, dish of the day ug rice platter. Congratulations Isla Sugbo Seafood City! Lami gyud uy, walay char! Pakpak!
- Latest
