Gipasigarbo ang album

CEBU, Philippines - Mapasigarbohong gibutyag ni Anne Curtis nga angayan atngan ang umaabot niya nga album. Suma pa niya nga duna’y original songs nga unod niini. Ang maong mga kanta ginama sa mga higala niya nga singers ug composers.

Nagtakilid ang relasyon

Nitumaw ang mga hungihong  nga matud pa nagtakilid  karon ang relasyon nila ni Enchong Dee ug  Samantha Lewis. Wala pa motingog ang duha ka kampo kalabot sa maong taho. 

Andam na makaanak

Gibutyag ni Iya Villania nga andam na sila sa iyang bana nga si Drew Arellano nga makabaton og anak karong tuiga.  Na-enjoy na ang magtiayon sa pagsige og bakasyon busa panahon nga maghulma sila og kaugalingon nila nga pamilya.

Mahalon nga eksena

Negosyante  ang role ni Cesar Montano sa  seryeng  Bakit Manipis Ang Ulap? sa  TV5 . Sa paglugwa pa lang niya sa maong serye,  gipakita dayon ang pagsakay niya og helicopter  ug giingong dako kaayo og gasto ang maong eksena gumikan sa kamahal sa abang sa helicopter. 

Liza nahulbotan ni Pia

Kung si Miss Universe 2015 Pia Wurtzbach ang pasultion, angayan pud mosalmot og indigay sama sa Miss Universe ang aktres nga si Liza Soberano gumikan kay duna kini saktong barog ug kaanyag.

Solenn naliki sa intriga

Todo himakak si Solenn Heussaff sa nitumaw nga report nga matud pa kuwarta maoy rason sa breakup nila ni Derek Ramsay kaniadto. Nikatawa pag-ayo si Solenn pagkadungog sa maong taho gumikan sa ka imposible niini. Una na nga gibutyag ni Derek nga malinawon ang panagbuwag nila ni Solenn kaniadto.

Hugyaw  nga eksena magbaha

Sa Ilocos Norte ug sa Kalayaan, Laguna gibuhat ang pipila ka eksena sa seryeng  Ang Panday  sa TV5 nga gibidahan ni Richard Gutierrez. Nagbaha matud pa ang mga bug-at nga eksena niini.

Tibuok na ang hukom

Dili ganahan si Janice de Belen nga makauban niya sa trabaho ang kanhi niya bana nga si John Estrada. Kontento na siya sa panag-uban nila ni Priscilla Meirelles sa seryeng Be My Lady. Si Priscilla maoy asawa ni John karon.

Mark mapasalamaton sa Ginoo

Kung duna’y bakanteng oras, dili gyud malimtan ni Mark Neumann ang pagtikang og simbahan. Mapasalamaton ang aktor sa Ginoo gumikan sa kadaghang proyekto nga iyang nadawat karong panahona.

Career ni Arci gisuwerte

Tsika pa ni Arci Muñoz nga dako gyud og kontribusyon sa pagsidlak sa iyang career ang Pasion de Amor nga mahuman na karong February 26.   Usa sa gikabisihan karon sa aktres mao ang upcoming movie nila ni Gerald Anderson nga “Always Be My Maybe.”  

JM nabanhaw sa Instagram

Human nahilom og tulo ka buwan   sa   Instagram ,  aktibo na usab og ablik sa social media si  JM de Guzman ug gi-promote niini   ang iyang  independent film.

Sa iyang Instagram account , gi-share sa 27 anyos nga aktor ang  promotional poster sa  iyang indie film nga  “Tandem.”

Nasayran  nga nahimong  Best Actor si JM  sa New Wave category sa  2015 Metro Manila Film Festival gumikan sa iyang role sa maong proyekto. Aduna’y commercial showing ang Tandem karong February 17.

Kahinumduman nga niadtong Nobiyembre sa miaging tuig,  nangayo og pasaylo si JM sa iyang followers gumikan kay mawad-an siya og kontrol sa iyang kaugalingon  human nagsagunson ang pag-post niya og wala’y ayo nga mga mensahe sa Instagram.

 Hangtud niulbo ang report nga nagbuwag na sila si Jessy Mendiola. Hinuon mipadayag ang aktor nga dili angayan basulon si Jessy sa ilang breakup.

Una na nga migawas ang mga pagduda nga posibleng misulod og balik sa dautang bisyo  ang aktor ug usa kini sa gidudahang rason nga nawad-an siya og pipila ka TV projects.    

Eat Bulaga me-renew sa GMA

Mi-renew og kontrata ang noontime  show  nga  Eat Bulaga! sa GMA Network niadtong Huwebes sa hapon  ug nitunga sa maong pinirmahay ang mga opisyales sa maong network nga sila si  Atty. Felipe Gozon, Mr. Jimmy Duavit, ug  Mr. Felipe S. Yalung.

Ang   TAPE Inc.  maoy nagdumala sa Eat Bulaga  nga gipangulohan nila ni Tony Tuviera ug  Malou Choa-Fagar .

Mitambong sa contract signing ang hosts sa maong show nga sila si Tito Sotto, Joey de Leon, Pia Guanio, Anjo Yllana, Allan K, Ruby Rodriguez, Jimmy Santos, ug Patricia Tumulak.

Naa usab ang presensya  nila ni Jose Manalo, Wally Bayola, ug  Paolo Ballesteros nga naka-costume isip Lola Tinidora, Lola Nidora, ug Lola Tidora.

Mipakita  pud sa ilang suporta sa contract signing ang mga bida sa kalyeserye nga sila si  Alden Richards ug  Maine Mendoza nga gikagubtan sa mga staff sa GMA.

Gibutyag ni  Mr.Tuviera nga tulin gyud ang relasyon nila sa  GMA-7 busa  magpabilin sila sa maong network.

Kasamtangang 21 years na nga nag-ere sa GMA-7   ang Eat Bulaga!  nga nagsugod niadtong  January 28, 1995.

Kung kwentahon og apil ang pag-ere niini sa laing mga istasyon, moabot na ngadto sa  37 years  ang maong noontime show.

 “Many years ago, binigyan kami ng GMA ng isang tahanan at yun ang naging dahilan para maipagpatuloy namin ang pagbibigay ng tuwa at saya sa aming mga manonood. Maraming salamat sa pagtitiwala ng GMA.,” suma pa ni Tuviera.

Jiro mitagad na sa iyangpamilya

Gipadayag sa kanhi child actor nga si Jiro Manio nga iyaha na nga gitinggan ang  iyang pamilya kinsa iyang gilayasan kaniadto nga miresulta sa iyang pagkalibod –suroy sa airport.

Nakagawas na si Jiro sa rehab facility human sa pipila ka buwan nga gipaubos siya sa treatment ug ipakita niya nga nag-usab na gyud siya.

Nahinabi na usab ni Jiro ang iyang stepfather nga si Andrew Manio   ug hangtud karon, wala gihapon mawala ang iyang paglaom nga mahimamat puhon ang iyang tinuod nga amahan nga nagbase didto sa Japan.

Pagkakaron, giasikaso na sa komedyanteng aktres nga si Ai Ai delas Alas ang condo unit nga puy-an ni Jiro.

Aduna pu’y gi-hire si Ai Ai nga personal assistant kang Jiro aron maseguro nga maatiman kini og tarong. 

Kun Ugaling

Name:  Mae  Faith A. Vinalon

Age: 18 yrs. old

Address: Pob. Occ. Consolacion, Cebu

School: Cebu Technological University (main campus)

Course: Bachelor of Science in Graphics and Design

Motto:  ‘In all things it is better to hope than to despair’

Title/s: Sinulog Idol Season 6 Finalist The Voice of CTU season 1 grand champion

Banat News Hugyaw (BNH): Kun ugaling nagbuwag mo sa imong uyab kay nasakpan nimo nga may laing iring-iring, unya magsige gihapon siya og text ug private message nimo, unsay imong buhaton?

Faith: Dili na nako siya replyan, wala nami dapat hisgutan ilabi na sa among naugdaw nga relasyon tungod kay nag iring-iring siya sa lain. Dili na nako siya pasayluon kay kung tinuod nga nahigugma siya nako walay mabaw ug tukmang rason nga mangita o mag iring-iring siya. Swerte ra kay siya nako. Aw? Hahahaha

BNH: Kun ugaling niagi imong crush, nipahiyom ka, apan itom diay imong ngipon kay nalimot ka og toothbrush human ka nikaon og pusit, mu-unsa man ka?

Faith: Mo-smile gihapon ko niya hangtod sa maka-realize siya nga ‘matte nga black lipstick’ akong gigamit ug kana kay uso na ron. Dili ko mauwaw man nindot nga madawat ko sa akong crush kung unsa ko katinuod sa akong kaugalingon. Di maguol kay kalami ras posit, nindot na nga naay ilhanan nga nikaon ka ana. hahahahhaha

BNH: Kun ugaling nahagbong ka sa imong major subject, kinsay una nimong pahibaw-on ug ngano man?

Faith: Syempre, akong ginikanan kay in  the end makahibaw ra gihapon sila ug sila ra pud akong masangpitan kung naa may problema mahitabo nako ilabi na sa akong pag-eskwela.