Valeen bagong pagbabalingan ng atensyon ni Sef?!
MANILA, Philippines – Ngayong Linggo, ipakikilala na ang hot, young actress at FHM cover girl na si Valeen Montenegro bilang pinakabagong cast member ng Kapuso hit show na Juan Tamad kung saan gagampanan niya ang role ni Mayumi, ang school mascot na may pagtingin kay Juan.
“Life is complicated” nga ang drama ni Juan na ginagampanan ni Sef Cadayona. Sa kanyang huling semester sa kolehiyo, katatawanan pa rin ang tingin kay Juan ng kanyang mga kaklase at kinabibilangang basketball team. Ang nagpapasaya na nga lang kay Juan ay mga pagkakataong nakakasama niya ang kanyang Political Science teacher na si Marie, na ginagampanan ni Max Collins.
Ang hindi alam ni Juan, sinusundan pala ng terror na teacher na si Professor Panindak ang bawat galaw nila ni Marie at kinukunan sila nito ng mga larawan. Magiging sentro ng tsimis sa eskuwelahan ang mga na “huli-cam” moments ng dalawa. Si Marie, manganganib na matanggal sa pagiging teacher samantalang si Juan naman ay mangangambang mapatalsik sa school!
Sa gitna ng kontrobersiya, ang huggable na school mascot na si Mayumi ang masasandalan ni Juan. Lingid sa alam ng marami, sa likod ng mascot na ito ay isang dalagang dadaig pa ang kagandahan sa lahat ng cheerleader.
Mabaling kaya kay Mayumi ang pagtingin ni Juan kapag nagpakita na ito ng kanyang mukha?
Abangan ang episode na ito ng Juan Tamad mamayang 4:30 p.m., sa GMA.
- Latest
