Maanyag Nga Gumamela

Di gyud ko makalimot ining gumamela kay katong grade three pa ko sa Pilar Central School, gi-grupo man mi ato sa among maestra, nga paryente ra namo, si anhing Milagros “Lola Meling” Borinaga. Gi-grupo mi kay gipatanom mi og gumamela, unya amo gyud tong giatiman tibuok tuig, gigradohan mi ato. Dugang niini, nakahidumdom sab ko nga kun dunay mga hubag-hubag, mudayon man mi og kuha og byu-os, (bud), ining gumamela, dukdukon, dayon ihaklap sa dapit nga naghubag. Kanang magnana gani ang hubag, kay ma-feel gyud nimo nga murag suyupon sa byu-os, unya mga two to three days  kay maayo na ang hubag, mu-uga na. Pakpak

Unya kagahapon, samtang naghunahuna ko og unsay akong suwaton alang karon adlawa, nakakita ko og artikulo sa www.stethnews.com nga naghisgot unsay health benefits niining gumamela nga adunay scientific name hibiscus sabdariffa. Nalakip gyud didto nga tambal siya sa hubag-hubag or anti-inflammatory.  Apan ang nakahugyaw nako kay ang dahon diay niini, pwede diay himuong tea. Of course imo gyud nang hugasan. Wala mahisguti sa artikulo kun pabukalan ba or idiretso og butang sa baso nga adunay init tubig, just like a tea bag. But I am thinking nga mao nay akong buhaton, inay pabukalan. Kun aduna kay high blood pressure makatabang usab matud pa ang gumamela tea.

Matud pa, ang gumamela tea, makaayo alang niadtong adunay kidney disease. Makaayo sab kini niadtong gisapot o na-stress, kay matud pa mood booster usab ang gumamela tea. Dugang pa nga ang duga sa dahon sa gumamela makatabang niadtong dunay problema sa panit sama sa acne ug wrinkles. Pwes, ipahid sa imong bugason nga nawong ang maong duga. Pakkk! Ang susamang duga, makatabang sab aron daling maayo o mapikot ang imong samad.

Dugang pa sa maong artikulo nga ang duga sa dahon sa gumamela makatabang aron mawagtang ang cancer wounds, mapaubos ang imong cholesterol level, ug matud pa ang gumamela adunay mga components aron mabatukan ang tumor. Ang dahon ug buwak makatabang sab aron mapanindot ang imong buhok ug mawagtang ang imong kaspa.

Sikat kining gumamela isip tambal didto sa nasud sa India. Apan kadtong mga mabdos matud pa ug nagpatutoy pa og bata, gipahimangnoan sa dili paggamit niini o pag-inom og gumamela tea. Nakahinumdom na sab hinuon ko nga sa una, growing up in Pilar, Camotes nagduwa-duwa man mi og balay-balay uy, unya magluto-luto mi. Among gigamit kay dahon ug buwak sa gumamela, isulod og lata sa sardinas unya itak-ang. Kun mubukal na, among ibutang sa gagmay’ng plato-plato unya kan-on kunuhay namo pero dili namo isulod gyud sa among baba, patingugon ra namo among dila ug ngabil. Ahhh those days.

Welcome home Miss U!

Nahiabot na sa Pilipinas si Miss Universe Pia Wurtzbach alang sa iyang homecoming. Karong adlawa ipahigayon ang usa ka press conference, ugma ang iyang homecoming parade ug pagtekang sa senado ug kongreso. Aduna usay gitakda nga courtesy call si Pia sa Malacañang ug sa pipila ka mayors sa Manila. Usa ka show ang ipahigayon sa Araneta Coliseum karong Huwebes sa dili pa siya mulupad balik sa New York diin adto siya magbase.

Balesin diay

Sa Balesin Island mahitabo ang kasal nila ni Christine Reyes ug Ali Khatibi sunod semana. Sila-sila ra ang mutambong sa seremonya, hinungdan nga gipaabot nga adunay ikaduhang kasal nga ipahigayon sa Manila mismo alang sa ilang pamilya ug mga higala.

Nalipay sa pagbalik

Gihangop ni Claudine Barreto ang pagbalik showbiz ni Donna Cruz ug iya gyung gi-promote ang interview niini kang Boy Abunda niadtong Biyernes. Gipadayag ni Claudine nga nalipay matud pa siya nga nibalik na si Donna sa showbiz.

Maldita “pero may puso”

Gipasabot ni Governor Vilma Santos nga bisan og “impakta” “monster” o labihan ka maldita sa iyang character sa pelikula nila ni Angel Locsin ug Xian Lim nga  “All About Her”,  aduna gihapon kini kasingkasing o may pagka maloloy-on.

Baby Luna

Gipaambitan ni Ryan Agoncillo ang hulagway sa iyang asawa nga si Judy Ann Santos ug ilang bag-ong anak nga si Luna niadtong nilabay nga adlaw.