Maraming dawit problema ni Ciara sa asawa, nagsanga-sanga na!

Masuwerte si Ciara Sotto sa pagkakaroon ng mga magulang na kagaya nina Senator Tito Sotto at Helen Gamboa.

Sobrang supportive ang mag-asawa sa kanilang anak at apo. Walang sinabi na masama si Tito Sen at Mama Helen laban sa manugang na si Jojo Oconer.

Nagsalita lamang sila na kung anuman ang desisyon ni Ciara, susuportahan nila.

Nagsanga-sanga na ang mga balita tungkol sa hiwalayan portion nina Ciara at Jojo dahil marami na ang mga pangalan na nadadamay.

Valeen at Julia dapat magpaliwanag

Hindi na nag-iisa si Valeen Montenegro sa mga suspect dahil nadamay na rin sina Meg Imperial at Julia Clarete.

Nag-deny na si Meg at believable ang kanyang denial dahil hindi sila personal na magkakilala ng dyowa ni Ciara.

Nasangkot si Julia dahil sa biglang pag-alis nito sa Eat Bulaga at sa kanyang pralala na maninirahan siya sa Malaysia. Wala nang ibinigay na ibang detalye si Ciara kesehodang may mga nabababawan sa paliwanag niya.

Sa mga nagpipilit na malaman ang the truth and nothing but tungkol sa sudden departure ni Julia sa Eat Bulaga, huwag kayong magmadali dahil lalabas din ang katotohanan sa tamang panahon.

Traffic sa Ortigas super dusa

Dusa as in capital dusa ang sitwasyon kahapon ng trapiko sa Ortigas Avenue, Greenhills area.

Ikinaloka ko talaga ang nakakapanghina na trapik dahil mahigit dalawang oras kami na nakatengga sa nasabing kalye.

Nang mag-report ako sa radio program ni Arnold Clavio sa dzBB, tinanong ko talaga siya kung bakit nagkaganoon ang traffic situation sa ating bayan?

Kung hindi lang talaga kailangan, never ako na bibiyahe sa ibang lugar sa Metro Manila para hindi ko maranasan ang kasumpa-sumpa na trapik.  

Kapag may mga meeting ako, nire-request ko talaga sa mga kausap ko na magkita kami sa Morato at Timog area dahil kung hindi siya puwede, mag-usap na lang kami sa telepono.

At kung hindi ako nagmamadali kahapon, sumaglit na lang sana ako sa presscon ng Girlfriend For Hire sa Music Hall Metrowalk na hindi kalayuan sa Greenhills. 

Maaga pa naman ang call time sa presscon ng pelikula nina Andre Paras at Yassi Pressman dahil kailangan nila na magbabu ng 1 p.m.

Gabby, Richard, at Tonton mukhang artista pa rin kahit tatlong dekada na sa industriya

Bukod sa hindi ma-solve na problema sa traffic, napag-usapan din namin ni Arnold ang batch nina Gabby Concepcion, Richard Gomez, at Tonton Gutierrez.

Tatlong dekada na sa showbiz sina Gabby, Richard, at Tonton pero hindi sila nalosyang as in mukhang mga artista pa rin sila.

Dapat tularan sina Gabby, Richard, at Tonton ng younger stars na hindi marunong mag-alaga sa sarili kaya hindi nagtagal ang mga career. Kasi naman, mas inaatupag pa nila ang gumimik at bumarkada.