Beauty and Bestie naka-P500M na!

CEBU, Philippines - Kapin sa P500 million ang kita  sa pelikulang "Beauty and the Bestie" nga gibidahan nila ni Vice Ganda ug  Coco Martin.Gianunsyo kini sa Star Cinema pinaagi sa ilang Instgram account  ug matud wala  pa’y  labot ang kita niini sa international screenings.

Bisan nahuman na ang period sa Metro Manila Film Festival, aduna gihapo’y  kapin sa 100 ka  mga sinehan sa nasud ang nagpasalida niini.

Sa miaging adlaw,  gianunsyo  sa  mga kadagkoan sa MMFF nga   P1.02 billion ang total nga kita sa walo ka entries sa MMFF 2015.

Jen gi-operahan sa tuhod

Aduna’y problema sa tuhod si  Jennylyn Mercado  busa gi-operahan  kini dili pa lang dugay.

Wala hinuon gidetalye sa aktres ang rason niini apan gitataw niya   nga okay na ang iyang kondisyon ug gikinahanglan lang nga mopahuway siya og pipila ka adlaw.

Nagpanikad na si Jen nga mobalik sa trabaho ug ubay-ubay na ka proyekto ang nag-atang kaniya.

Kinasingkasing konsyerto ni Lilac

Kung maghisgot na gani og kanta,  dili gyud basta-basta ang mga Sugbuanon   ug niabot ang paglawig niini sa bisan asa nga dapit sa kalibutan.

Sama na lang sa Sugbuanong singer nga nagbse sa Canada nga si Lilac Caña  kinsa nia karon sa Sugbo alang sa usa ka charity concert nga ipahigayon diha sa Grand Convention Center  sa alas 7:30 sa gabii karong Biyernes, Janury 22,  kung diin ang beneficiaries niini mao ang pinili nga mga batang tinun-an sa special education, aduna’y deperensya sa pangdungog  ug uban pa nga programa alang sa kabataan.   Ang ticket  niini mahimong mapalit sa lobby sa maong venue atol sa concert .

Gawas kang Lilac, mopasundayag usab sila si Dennis Sugarol,  Fr. Jun Agravante  ug ang ilado na kaayo nga Mandaue Children’s Choir.

Gihulagway si Lilac sa iyang mga higala nga “dynamic” ug “versatile” gumikan sa kahugyaw sa iyang tingog.

Makaya niya ang kanta nga pang-opera, jazz, pop ingon man usab ang mga bisaya nga kanta.

Sa umaabot niya nga concert, gipaneguro ni Lilac nga ang iyang mga kantahon mao ang inspirational songs aron gaan ang feeling sa mga tawong motan-aw niini.

Bisan pa man nga taud-taud na si Lilac nag-istar sa laing nasud , dili gyud niya pakyason ang pagduaw sa Pilipinas. “Bata pa lang ko, duna gani mga program, permi gyud ko pakantahon nila ni mama ug papa , mao tung naanad ko. Akong father kay hilig gud to og music,” suma pa ni Lilac. Mahiligon siya sa pagkanta sa simbahan  ug sa bisan unsa nga kalihokan busa nabaid gyud og samot  ang iyang tingog. Nakagradwar na si Lilac sa  University of Toronto Opera Performance Program, ug nahimo siya nga sholar sa  American Institute of Musical Studies sa  Graz, Austria.

Nag-agi na siya lapad nga pagtuon sa  classical, musical theatre ug  contemporary music style  .

Nahimo siyang sakop sa  Canadian Opera Company Chorus sulod sa upat ka tuig diin kaangkon og lead roles sa opera ug  music theatre productions.

Pipila sa iyang nadawat nga mga pasidugog mao ang  2010 Pamana Ng Pilipinas Award, nga hinatag ni  Presidente Benigno S. Aquino III, gumikan sa  iyang kalampusan  ug sa iyang ka maayo  ug paggahin og oras sa mga charity event;  2009 Performing Arts / Humanities Award gikan kang  Lieutenant Governor of Ontario, David C. Onley, alang sa iyang  charitable contributions isip  musician sa  Canada.

Usa sa dili malimtan nga kaagi ni Lilac mao ang pagkanta niya og solo atol sa offertory  sa misa  nga gipangulohan ni Pope John Paul II sa World Youth Day niadtong 2002 didto sa Canada.

Nasayran nga ang concert karong Biyernes, gipasiugdahan sa Quota International of Southwest Cebu.