Mosulod puhon sa politika

CEBU, Philippines – Bukas si  Miss Universe 2015 Pia Alonzo Wurtzbach nga mosulod puhon sa kalibutan sa politika. Iyaha kining gibutyag atol sa iyang  interview dili pa lang dugay sa  HOT 97 radio sa New York . Una na nga gipadayag ni Pia nga malipay gyud siya kung makaalagad siya sa publiko.

Okay sa role

Si Camille Prats maoy modala isip inahan ni  Bianca Umali sa bag-ong  TV series  sa GMA-7 nga  Wish I May . Dili na bag-o alang kang Camille ang maong klase nga role busa wala siya magduha-duha sa pagdawat sa nahisgutang proyekto.

Aprobado ni Coco

Okay kaayo ni Coco Martin ang mga sugyot nga himoan og sequel ang pelikula nila ni Vice Ganda nga ‘Beauty and the Bestie’. Nasayran nga nag-una sa takilya ang maong pelikula gumikan sa kadaghang  kataw-anan nga eksena niini.

Tungod sa anak

Gibutyag sa magtiayong Jason Francisco ug Melai Cantiveros nga nisamot sila og ka-mature gumikan sa ilang anak nga si Amelia Lucille. Ang duha kanunay maglalis kaniadto apan nahunong na kini sukad sila nagminyo ug nagkaanak.

Tambag ni Vic

Tsika pa ni Quezon City Mayor Herbert Bautista nga makadawat siya og mga tambag gikan kang  Vic Sotto kalabot sa gugma. Giingnan matud pa siya sa TV host nga kinahanglan makabaton og hinigugma gumikan kay dili lalim mag-inusara sa kinabuhi.

Magpabilin  sa Star Cinema

Mi-renew sila si Enrique Gil ug  Liza Soberano sa ilang kontrata sa  Star Cinema niadtong Huwebes.  “It’s a multi-picture contract, two years,” nagkanayon si Liza.

Extended ang Probinsyano

Extended  hangtud sa  July ang  serye ni Coco Martin nga Probinsiyano  gumikan kay nakadawat og daghang pagdayeg ang maong serye . Aduna matud pa’y nahibilin nga mga bug-at nga eksena ang maong serye.

KC matinabangon

Bisan sa ka aktibo ni KC Concepcion sa pagtabang sa  iyang isigkatawo,  wala gyud siya’y plano nga mosulod sa politika. Kanunay mosalmot si KC  sa mga kalihukan sa   UN World Food Program.

Hilom lang

Gusto ni Dennis Trillo nga himoong pribado ang iyang love life.  Bisan pa man niini,  lantaran gihapon ang pagsige nila og date ni Jennylyn Mercado.

Kalamposan ni James

Malipayon si Devon Seron sa kalamposan nga naangkon sa iyang kanhi ka-loveteam nga si James Reid. Suma pa ni Devon nga duna gyu’y chemistry sila si James ug Nadine Lustre busa ni-click dayon ang ilang tandem. Nagkauban ang duha kaniadto sa Pinoy  Big Brother- Teen Clash 2010. (Sanden J. Anadia)