God Gave Me You

CEBU, Philippines – Nag-ulohan matud pa og God Gave Me You ang umaabot nga serye nila ni Alden Richards ug Maine Mendoza sa GMA-7. Gihuwat na lang ang signal sa tag-iya sa Tape Inc. nga si Tony Tuviera.

Reaksyon ni Kris giatngan

Nahibalik na sa nasud si  Kris Aquino uban sa pipila ka semana nga pagbakasyonsa laing nasud uban sa iyang mga anak nga sila si  Joshua ug Bimby. Giatngan ang iyang reaksyon kalabot sa kahinay sa pelikula niya nga All You Need is Pag-ibig.

Makalabang-labang ra

Human sa pipila ka serye sa ABS-CBN, nibalik na pud si Tonton Gutierrez sa GMA-7 ug nalakip siya sa  That’s My Amboy nga  gibidahan nila ni Andre Paras ug Barbie Forteza. Wala’y exclusive contract si Tonton sa usa ka network busa makatrabaho ra siya bisan asa.

Suportado sa asawa

Tsika pa ni Ian Veneracion nga motan-aw ang iyang asawa sa seryeng Pangako Sa ‘Yo busa makakita gyud kini sa kilig scenes nila ni Jodi Sta. Maria sa maong serye. Na-enjoy ra ang iyang asawa sa pagtan-aw ug nakasabot ra kini sa iyang trabaho.  “She’s a very confident person and she knows how professional I am when it comes to work. Kaya ever since hindi ako nali-link sa leading ladies sa showbiz,”suma pa sa aktor.

Paabot lang

Taudtaud na nga wala’y boyfriend si  Antoinette Taus ug wala siya nagdali bisan pa man nga nagkataas na ang iyang edad. Suma pa sa aktres nga wala pa’y nakapapitik sa iyang kasingkasing busa dili niya ipugos ang iyang kaugalingon sa maong butang.

Ipadayon sa ere

Bisan wala na si German Moreno, gikatahong ipadayon gihapon sa GMA-7 ang programang  Walang Tulugan . Kahinumduman nga daghang natabangan nga artista  si Kuya Germs pinaagi sa maong programa .

Maine maka-album

Suwayan na usab ni Maine Mendoza ang pagkanta, ug gisugda na pagplantsa sa GMA records ang umaabot  niya nga album. Gipaabot nga mo-click kini ,sama sa nahitabo sa album ni Alden Richards.

Mi-resign sa trabaho

Mi-resign na si  Angelica Yap o Ms.  Pastillas Girl  sa iyang pagka-call center agent aron maka-focus na sa showbiz. Ang Viva Artist  Agency maoy nag-atiman sa career ni Angelica.

Regine ug Van gikasal na

Gikasal na sila si  Regine Angeles ug sa modelo nga si Van Leano sa miaging adlaw. Pipila sa mga artista nga nanambong mao sila si Kitkat, Roxanne Guinoo, Isay Alvarez ug Robert Seña.

Baby

“Baby” matud ang kanunay nga itawag ni Enrique Gil ngadto sa iyang ka-loveteam nga si Liza Soberano. Taud-taud na nga nidiskarte si Enrique kang Liza.

Adele naglawig

Sulod sa unom ka semana, nagpabiling numero uno sa weekly US Billboard 200 album chart ang   “25” album  ni Adele.

Suma pa sa Nielsen Sound Scan  , nakahalin kini og  363,000  ka kopya.  Samtang sa Digital Songs chart, nag-una gihapon ang awit ni Adele nga  “Hello” .

Ang maong awit kanunay nga ipatukar karong panahona sa nagkalain-laing radio stations. 

Lea malakipi sa American series

Gikatahong molugwa ang Pinay singer nga si Lea Salonga sa sikat nga American musical comedy series nga  “Crazy Ex-Girlfriend.”

Gibutyag kini ni Lea pinaagi sa iyang Twitter post  ug nagpanikad na siya niini.

“I guess the news is out!!! I’ll be appearing on the season finale of the CW’s Crazy Ex-Girlfriend! And singing, too! How fun is that?!,” tweet pa sa singer.

Wala gidetalye ni Lea ang iyang role sa maong serye apan gipasalig niya nga malingaw gyud ang kadaghanan niini.

Ang  “Crazy Ex-Girlfriend” gibidahan ni  Rachel Bloom kinsa nidala sa babaye nga nibiya sa  New York ug nakakaplag og hinigugma sa  West Covina, California.