Hangover sa holiday

CEBU, Philippines – Nahuman na ang taas nga bakasyon, ang uban kanato nangaluya o nawili sa ilang pag-enjoy og maayo sa Pasko ug Bag-ong Tuig.

Panahon nga duna’y buhaton aron ma-relax ang imong kaugalingon ug dili ka tanto nga makalitan sa imong pagbalik sa eskwelahan o trabaho.Panamilit na sa holiday!

Namantala sa www.startsatsixty.com ang  simple nga mga butang nga imong buhaton aron magpabiling gaan ang imong pamati human sa taas nga bakasyon.

• Mahimo nimo nga isingit sa imong oras ang pagtan-aw og salida sa  sinehan. Pilia ang pelikula nga makahatag nimo og pahiyom . Basa na lang og mga movie review sa dili pa ka moadto og sinehan aron makakuha ka og ideya sa gusto nimong tan-awon.

•  Makapagaan usab sa pamati ang pagpa-massage. O ba kaha moadto og mga salon, aron magpatupi, magpa-facial aron presko ang imong panagway human sa taas nga bakasyon.

•  Ayaw lang sa palabi og gamit sa internet aron seguradong relax ang imong huna-huna.

• Laag pud sa waterfalls o ba kaha sa duol nga mga resort. Mahimo ra usab mag-picnic mo sa mga lugar nga dili samok.

• Kung hasolan na ka mogawas sa balay, basa og libro o bisan unsa nga reading materials. Samtang nagbasa ka, naa pud sa kilid ang paborito nimo nga pagkaon.

Kean ug Chynna nagpakasal

Nagpakasal  na sila si  Kean Cipriano ug Chynna Ortaleza pinaagi sa  civil ceremony  ug ilaha  kining gipahibalo pinaagi sa Instagram. Giingong nagpakasal ang duha, pipila ka adlaw sa wala pa ang Bag-ong Tuig.  Nagplano ang duha nga magpakasal puhon  sa simbahan.

MMFF mibarog sa hukom

Gibarogan ni MMDA Chairman ug  Metro Manila Film Festival Executive Committee Head Atty. Emerson Carlos ang iyang hukom kaniadto kalabot sa pag-disqualify sa pelikulang Honor Thy Father alang sa Best Picture category. This is not a decision of one single person alone, but of a collegial body,” suma pa niya.

Marimar manamilit

Mahuman sa ikaduhang semana karong buwana  ang  Marimar nga gibidahan ni  Megan Young . Suma pa sa mga obserbasyon, wala makalabaw si Megan sa panahon ni Marian Rivera sa Marimar kaniadto.

Gitangtang na

Pipila na ka mga sinehan ang mi-pull out sa pelikulang  All You Need Is Pag-ibig . Giingong kusog lang ang maong pelikula sa unang adlaw sa pagpasalida niini apan kalit lang kini nga gilangaw pagka-sunod adlaw. Wala pa mohatag og komento ang usa sa mga bida niini nga si Kris Aquino.  (Sanden J. Anadia)

Gatas sa kanding

Naandan na sa mga tawo ang gatas sa kabaw, apan duna pu’y uban nga moinom pud og gatas sa kanding gumikan kay duna pu’y hiyas nga gitagoan ang maong hayop.

Sa mga tawong  nag-atiman og kanding, dili sila gusto nga masayang ang gatas sa ilang mga binuhi busa ilaha gyud kini nga imnon o ba kaha i-negosyo.

Usa sa nagpahipi nga hiyas sa gatas sa kanding mao ang kataas og level sa  phosphorous,  calcium , Vitamin B12, protein ug  potassium busa makahatag gyud kini og kaayo sa  lawas sa higayon nga moinom ka niini.

Base sa www.globalhealingcenter.com, aduna kini selenium ug uban pa nga minerales nga mopalig-on sa immune system sa  tawo.  Motabang usab kini alang sa dali nga pagpahilis sa imong kinaon. (Anden Miles)

Dugang korona sa Pilipinas

Gikoronahan isip  Miss Tourism Queen of the Year International ang pambato sa Pilipinas nga si Leren Mae Bautista.

Ang coronation night nahitabo niadtong December 31, 2015  sa gabii  sa  Putrajaya Marriott Hotel and Spa Grand Ballroom sa Sepang Utara, Malaysia.

Ang iyang mga runner-up naglangkob nila ni  Miss India (Dream Girl of the Year International); Miss Iceland (Miss Tourism Cosmopolitan International); Miss Lithuania (Miss Tourism Global International); ug  Miss Uganda (Miss Tourism Metropolitan International).    Gipildi ni Leren ang  laing 52 ka mga kandidata gikan sa nagkalain-laing nasud.

Dili pa lang dugay, nagmaya ang Pilipinas human nakadaug isip Miss Universe ang pambatao sa nasud nga si Pia Wurtzbach  busa nagsagunson na ang pagmaya sa mga Pinoy gumikan nasundan dayon kini sa kadaugan ni  Leren isip Miss Tourism Queen of the Year International. (Sanden J. Anadia)

Natalie Cole mipanaw

Mipanaw na ang  legendary singer nga si Natalie Cole niadtong Huwebes sa gabii ug kini gikumpirmar sa iyang publicist nga si Maureen O’Connor.

Wala hinuon gidetalye ang rason sa iyang kamatayon apan gikataho nga taud-taud na nga duna na siya’y  gipamati sa iyang  lawas .

Ang  65 anyos nga singer maoy nagpasikat sa awit nga Miss You Like Crazy, “This Will Be”, “Inseparable”,  “Our Love”, ug” Unforgettable.”

Kahinumduman nga nitikang  si Natalie sa Pilipinas niadtong August 2015 alang sa David Foster and Friends concert nga gipahigayon sa  Araneta Coliseum.