Misidlak nga mga sugbuanon

Remton Zuasola

CEBU, Philippines - Dili na gyud mabangbang si Direk Remton gumikan kay nakasulod sa 63rd San Sebastian International Film Festival ang pelikula niya nga Swap. Mao kini ang bugtong Filipino film nga nalakip sa maong film festival alang sa tuig 2015 didto sa Spain .Ang cinematographers niini  mao sila si  Ruel Antipuesto ug Bradley Liew. Nalakip usab sa maong Cebuano film sila si Matt Daclan, Mon Confiado, RK Bagatsing ug Jess Mendoza.  Misamot ang kalipay ni Direk Remton sa dihang naangkon sa Swap ang Silver Hanoman Award (Second Best Asian Film Feature) alang sa Asian Feature Program sa  10th Jogja-NETPAC Asian Film Festival didto sa  Yogjakarta, Indonesia.Nahimo usab kini nga official entry sa  2015 Sinag Maynila Film Festival, nga gidumala nila ni  Brillante Mendoza ug Solar Entertainment Group.

Chai Fonacier

Kung pag-arte na gani ang hisgutan, dili gyud maawit ang mga bisaya ug usa na niini si Chai kinsa maoy best supporting actress sa Cinema One Originals 2015 gumikan sa maayo niya nga performance sa pelikulang Miss Bulalacao. Aktibo na si Chai sukad pa niadto sa pagsalmot og mga indie film.

Rogelie Catacutan

Ang Sugbuanon nga Binibining Pilipinas Supranational 2015 nga  si Rogelie nakasulod sa  Top 20 sa Miss Supranational 2015 nga gipahigayon sa  Krynica-Zdroj, Poland niadtong December 4, 2015.

Steffi Aberasturi

Kung maghisgot na gani og  indigay sa  kaanyag, usa sa ilado na kaayo niini ang maanyag nga si Steffi kinsa lig-on na kaayo sa pagrampa sa entablado.  Si Steffi maoy nakalangkat sa titulo nga Miss Beauche International 2015 nga gipahigayon sa SMX Convention Center niadtong November 22 2015.

Elyson de Dios

Napili nga first runner-up sa StarStruck Season 6 ang Sugbuanon nga si Elyson. Giangkon niya nga ang iyang inahan maoy nagdasig kaniya nga mo-audition sa maong show.  Andam na si Elyson sa pagsagubang sa kalibutan showbiz.

Ara Chawdhury

Natatak na gyud  ang pangalan sa Sugbuanon nga film maker nga si Ara ug nasamotan kini sa dihang napili nga Best Screenplay ang iyang Miss Bulalacao sa Cinema One Originals 2015  .

 Akitbo na si Ara pagmugna og mga indie film, gani usa nadawat niya nga ward kaniadto mao ang Best Director sa Sinulog Film Festival 2015 alang sa short film nga  “Operation Prutas.” Ang maong short film mao usab ang napili nga  Best Editing ug  Best Picture.

Amy Vachal

Nakasulod sa Top 10 sa “The Voice- USA” ang Filipino-American singer nga si Amy Vachal kinsa ang inahan niini igsuon ni kanhi governor ug karon Kongresista Gwendolyn Garcia. Lumad nga taga Dumanjug, Cebu ang inahan ni Amy nga si Dierda Garcia Vachal. Kahinumduman nga nahugyaw ang kadaghanan sa labing ulahi nga performance ni Vachal sa dihang giawit niya ang “Blank Space” ni Taylor Swift diin nidalit siya og linahi nga version niini.

Crazy Duo

Nabaniog na sa tibuok nasud ang komedyanteng Sugbuanon nga Crazy Duo human kini nahimong finalist sa “Funny One” segment sa noontime program sa ABS-CBN nga “It’s Showtime”. Ang tandem sa amahan ug anak nga sila si Diego ug Gedent  nahimong  ilado gumikan sa ilang maayong abilidad sa paghatud og mga komedya ilabi na sa pagsunod sa linihokan ug tingog sa pipila ka performers nga sama nila ni Jireh Lim and Jugs Jugueta. Gisundog usab nila ang sinayawan sa  “It’s Showtime” co-host  nga si Jhong Hilario..

John Laser Martinez

Bag-ohay lang sa natad sa indigay sa kaambong, apan napili dayon si John nga runner-up o  Mister Philippines-Water sa Mister Earth Philippines 2015.   Usa ka registerded nurse ang 24 anyos nga si John. Siya maoy representante sa Pilipinas  alang sa  Mister Earth Universe 2016 .

Sugbuanon sa WCOPA

Nagmadaugon ang mga Sugbuanon nga sakop sa Team Philippines sa World Championships of Performing Arts (WCOPA) 2015 nga gipahigayon didto sa Long Beach California, USA.

Sa maong kompetisyon, gipamatud-an gyud ang  hugyaw nila nga talento sa pagkanta ug modeling. Gilangkoban kini nila ni Windey Prado Avendaño, Vynne Mharie Ant Guardiana, Artemis Mary Denise Bartido,Athena Ma. Denice  Bartido, John Lawrence Ramas, Vida Doriza Lim Reya, Ronna Jenn Lofranco, Danielle May Ozaraga, Kim Sanchez ug Apple Abarquez. Usa si  Apple sa nakadawat og daghang pasidungog sama sa  tulo ka  gold medals,  duha ka  silver medals  ug tulo ka  overall division awards.

Monica Cuenco

Misaka ang popularidad sa  Sugbuanon nga singer nga si Monica Cuenco human gipasundayag og balik sa Resorts World Manila ang musical play nga “Bituing Walang Ningning”. Midala siya isip Dorina busa mga bug-at  gyud nga eksena ang iyang gisagubang. Nakauban niya sa maong musical play sila si Mark Bautista, Ronnie Liang , Menchu Lauchengco-Yulo,  Jon Santos ,  Michael Williams , Jay Roa ug John Nite.

Kasikas sa AlDub

Nagkagubot ang mga tawo sa wala damha nga pagsikat nila ni Alden Richards ug Maine Mendoza sa kalyeserye sa Eat Bulaga.  Matag episode sa maong serye, kanunay  nga trending  Twitter. Naangkon  nila ang record sa labing daghan nga tweets sa kasaysayan sa Twitter atol sa Tamang Panahon Concert didto sa Philippine Arena  nga nitala og 41 million tweets.

4th Impact misidlak

Wala makapugong sa ilang emosyon ang All-Filipina girl group 4th Impact human sila nakatungtong og pipila ka elimination round sa ‘’The X Factor UK’’. Natagak sila pagpadulong na sa final round apan gipasigarbo sa maong grupo nga nahimo sila nga finalists sa maong show.  Ang maong grupo gilangkoban sa magsuong Mylene, Irene, Almira, ug Celina Cercado.

Pagbanhaw ni Heneral Luna

Gumikan sa kasikas nga gihatag sa netizens sa pelikulang  Heneral Luna, kalit lang kini gibalik pagpasalida sa mga sinehan ug gihugopan kini sa mga tawo. Mikita kini og P240 million busa gikonsiderar kini nga   “highest grossing Filipino historical film.”

Pinoy nakadaug  sa X Factor Australia

Ang Fil-Australian nga si Cyrus Villanueva maoy napili nga grand winner sa  X Factor Australia Season 7 .Nilungtad og duha ka buwan ang maong kompetisyon ug nagmaya og maayo ang mga Pinoy sa naangkon niya nga kadaugan.  Pinoy ang amahan ni Cyrus ug ang iyang inahan maoy taga Australia.Kahinumduman nga dugong Pinoy usab ang nakadaug sa miaging season sa maong show. Kini mao ang 16 anyos nga singer nga si Marlisa Punzalan.

Inahan ni Cherry Pie gipatay

Gipatay ug gikawatan ang inahan ni Cherry Pie Picache nga si Zenaida Sison sa panimalay niini niadtong September 19, 2015 ug ang katabang niini nga si  Michael Flores, maoy gitumbok nga responsible.   Mapriso si Flores sa tibouk niya nga kinabuhi,  kini maoy sentensiya ubos sa hukom ni  Judge Alfonzo Ruiz sa Quezon City Regional Trial Court .

Pastillas Girl

Todo paningkamot ang noon time show sa ABS-CBN nga It’s Showtime aron maatbangan nila ang kalyserye sa Eat Bulaga busa gibutang nila si Angelica Yap o Miss Pastillas. Naabot sa punto nga gipatawag sa  Movie and Television Review and Classification Board (MTRCB) ang mga executive sa maong  noontime show, isip aksyon sa nadawat nila nga reklamo nga matud pa nga susama nga gibugaw ngadto sa mga lalaki  si “Pastillas Girl”. Aduna’y mahitabo nga dayalogo uban sa MTRCB- Gender And Development (GAD) committee niadtong Oktubre 13, 2015. Gimandoan ang maong show nga kinahangaln makahibalo si Pastillas Girl sa iyang buhaton.

Maria Letizia gihimugso na

Nahimong trending topic ang pagsabak ni Marian Rivera alang sa labing unang anak nila ni Dingdong Dantes. Gihimugso sa Kapuso Primetime Queen ang iyang anak niadtong November 23, 2015.Gipanganlan sa magtiayon og Maria Letizia ang maong bata nga babaye.

Kadaugan sa Pilipinas

Human sa 42 ka tuig, naangkon pagbalik sa Pilipinas ang titulong Miss Universe human nakadaug ang pambato sa nasud nga si Pia Alonzo-Wurtzbach sa Miss Universe 2015.Gipahigayon ang coronation night sa Miss Universe 2015 sa The AXIS, Las Vegas, Nevada. Naukyab ang  kadaghanan sa pag-anunsyo sa mananaug sa 64th Miss Universe gumikan kay nasayop ang host nga si Steve Harvey.

Ian ug Jodi gihangop

Gawas nila ni Kathryn Bernardo ug Daniel Padilla, gihangop usab sa viewers ang tandem nila ni  Ian Veneracion ug Jodi Sta. Maria  sa seryeng Pangako Sa ‘Yo. Gumikan sa pagsaka sa ilang popularidad, gidugang sila sa cast sa pelikulang All You Need Is Pag-ibig nga entry sa Metro Manila Film Festival 2015.

OTWOL

Kanunay nga trending sa social media ang seryeng On The Wings of Love nga gibidahan nila ni James Reid ug Nadine Lustre. Nasayran nga kanunay usab nga gipistahan ang ilang mga kissing scene ug usa na kini sa kanunay atngan sa ilang fans. Kasagaran sa mga obserbasyon  nagkanayon nga nagkalami ang tandem nila ni James Nadine gumikan kay wala’y pressure  ug  dili na  kinahanglan nga magkadayon silang duha sanglit  init man ang pagdawat sa  publiko sa ilang chemistry.