Nagmarka sa kapalpakan ng host ng Miss U Pia nakikilala at dinudumog kahit walang korona at sash

Nakatulong kay Pia Wurtzbach ang kapalpakan ni Steve Harvey sa coronation night ng Miss Universe noong December 20 sa Las Vegas dahil nagmarka siya sa utak ng madlang-bayan.

Rumampa si Pia sa Times Square sa New York noong Pasko, kasama ang mga Pinoy supporter niya at pinagkaguluhan siya ng mga tao na nakakilala sa kanya.

Sinamantala ng mga usisero ang bihirang pagkakataon na makapagpakuha ng picture sa bagong Miss Universe.

Na-recognize si Pia ng madlang-bayan, kahit hindi niya suot ang korona at sash ng Miss Universe.

First time ni Pia na makarating sa New York at memorable ito dahil doon siya nagdiwang ng Pasko sa kauna-unahang pagkakataon. Isang taon na maninirahan sa New York si Pia dahil gagampanan niya ang mga responsibilidad bilang Miss Universe.

My Bebe Love ipinalit sa ibang pelikula sa mga sinehan!

Totoo ang tsismis na ipinalit ang My Bebe Love sa mga sinehan ng mga pelikula na mahihina ang kita.

Marami ang saksi nang alisin sa ilang sinehan ang mga pelikula na kasali sa Metro Manila Film Festival (MMFF) 2015 dahil walang nanonood. Ang My Bebe Love ang ipinalit para mapagbigyan ang fans na pumila nang matagal dahil sa kagustuhan na mapanood ang pelikula nina AiAi delas Alas, Vic Sotto, Alden Richards, at Maine Mendoza noong Pasko.

Alden pa-swim swim na lang, Maine rumampa sa Japan

The best of 2015 ang napanood kahapon sa Eat Bulaga dahil nagbabakasyon na ang mga host at production staff ng number one noontime show ng bansa.

Kahit replay ang ipinalabas, pinanood pa rin ito ng kalyeserye fans na hindi maka-move on sa mga nakakakilig na eksena ng kalyeserye na nagpasikat sa AlDub.

Nagbakasyon sa isang resort si Alden Richards at ang kanyang pamilya.

Ang tatay ni Alden ang masipag sa pag-post ng activities nila ng kanyang pamilya noong Pasko pero hindi niya binanggit ang name ng resort na kanilang pinuntahan or else, tiyak na pupuntahan sila ng fans na type na makita nang personal ang kanyang anak.

Ngayon lamang uli nagkaroon si Alden ng mahaba-habang bakasyon kaya nag-enjoy siya nang husto. Sasabak uli si Alden sa trabaho pagkatapos ng holidays.

Rumampa naman si Maine Mendoza sa Japan, kasama ang pamilya niya.

Parang model si Maine habang nagbabakasyon sa Japan dahil sa kanyang mga pang-model na outfit.

Dahil sa mga social media post ng kampo nina Maine at Alden, nabuking tuloy na hindi live ang Christmas episode ng Eat Bulaga. Hindi na-edit ang portion na kinukumusta nina Maine at Alden ang Noche Buena ng street sweeper na mapalad na nabunot ang name at pinagkalooban ng datung sa Sugod Bahay segment na ginanap sa Broadway studio ng Eat Bulaga.