Fr. Andy Satura komedyante apan bulawanon

CEBU, Philippines – Seryoso siya og dagway. Hayan katahaan pa ganing tan-awon, gumikan tingali sa iyang eyeglasses nga gisul-ob. Apan sa higayon nga muwali na siya, makalingaw ang iyang mga linya nga puno gayud sa pakatawa. Ug ang nakanindot kay diha sa iyang mga pakatawa, maayo kaayo siyang mupasupot sa mensahe aron ang bulawanong pagtulun-an dili gayud mahikalimtan sa mga nakadungog o manimbahay.

Siya si Fr. Adriano "Andy" Satura, 54 anyos, nga sakop sa Salesian of Don Bosco. Lumad siya nga taga Barangay Labangon ug regular nga magmisa  diha sa Shrine of Our Lady of Lourdes sa dalan F. Llamas Barangay Punta Princesa.

Taga Dakbayan sa Carcar ang iyang amahan nga si anhing Abundio Satura ug naggikan usab sa Jagna, Bohol ang iyang inahan nga si Felomina Abrao Satura. Ikatulo siya sa unom nga managsuon.

Nahimugso siya niadtong Septembre 8, 1961 ug na ordinahan pagka-pari niadtong Dec. 8, 1994.

Haom kaayo si Fr. Andy isip celebrant sa Misa de Gallo gumikan kay dili ka gayud magduka sa mabugnawong kadlawon gumikan kay matag buhi niya og komedya, siguradong mubahakbak ang nakadungog ug makamata gayud ang nagduka-duka.

Banat News Hugyaw (BNH): Unsay makapalagot nimo?

Fr. Andy: Kanang dili makab-ot ang tuyo ug tumong para sa ministry isip usa ka pari ug sa mga tawo nga tabangan apan magdumili sa pagdawat alang sa ilang kabag-ohan ug kalambuan.

BNH: Kanus-a ka katapusan nihilak?

Fr. Andy: Three years ago, atol sa usa ka recollection diin usa ka layko ang naghatag sa seminar diin nakapatandog kaniya ilabi na kadtong mga panghitabo gumikan sa kabangis sa kinaiyahan.

BNH: Nganung komedyante kaayo ka ug unsa diay imong background sa kabatan-onan?

Fr. Andy: By nature dili gyud ko komedyante, pero mahiligon ko motan-aw og entertainment ug mokuyog-kuyog sa mga kalingawan. Apan diha nako nasuta ako pagka komedyante sa presentation namo sa Seminary Days nako sa Don Bosco Manila.

BNH: Pilay original nimo nga jokes ug pila usab ang gikan sa laing komedyante?

Fr. Andy: Fifty percent ako’y tag-iya sa jokes, 50% akong nabasahan ug nadunggan pero akong it modify para motugma sa akong wali sa misa.

BNH: Unsay preparation nimo before ka magmisa ug ilabi na sa imong mga wali?

Fr. Andy: Three days before sa ako misa magpreparar na ko sa ako wali aron dili magbalik-balik ang wali kay mabantayan baya na sa tawo kung mao-mao ra kanunay ang wali, ug mamalandong usab ko gabii sa dili pa ako misa.

BNH: Unsay tinuod nga kahulugan sa Pasko?

Fr. Andy: Ang tinuod nga kahulogan nga ang importante natawo pag-usab si Kristo sa tagsa-tagsa ka kasing-kasing, nga ang pagsaulog dili lamang kutob sa material nga butang, apan sa mga butang nga makapahimuot sa Ginoo, ug duna kitay individual nga celebration nga makapalipay kanato.

Sa mga tawo nga nag-ilaid sa kalisod nga dili gayud mawagtangan og paglaum tungod kay tanan problema dunay tugbang nga grasya, ug usahay gigamit sa Ginoo ang mga problema aron sa pagpahinumdum kanato nga naa siya kanunay ug andam mohatag og grasya.

Ten facts about Fr. Andy

1. Joker

2. Dali duolon

3. Pag-alagad paspasan dili langay-langay.

4. Paghigugma sa pamilya dili hikalimtan

5. Pagpakabana sa nagkinahanglan ilabi na sa kabus.

6. Motahod sa mga nangatungdanan ilabi na sa kadagkuan sa simbahan

7. Deboto sa mahal nga Birhen Maria tungod sa kadaghan higayon nga encounter nila sa mahal nga birhen

8. Pagmahal sa pagka Pilipino

9. Mahilig makigkukabildo sa tanang mga politiko pinaagi sa pagsunod sa tanang mga updates sa panghitabo

10. Paghigugma sa Dios.