Boy pasok sa pelikula

CEBU, Philippines - Todo suporta si Boy Abunda   sa iyang higala nga si Kris Aquino busa nisugot siya nga aduna’y short appearance sa pelikulang  All You Need Is Pag-Ibig. Gidala ni Boy ang papel sa usa ka TV host.

Mopahuway sa TV series

Temporaryong mipahuway si Lorna Tolentino sa pagdawat og TV series gumikan kay dali ra siya kapuyon sa binuntagay nga taping. Hinuon modawat ra si LT og pelikula gumikan kay dili man kada adlaw ang shooting niini.  Nalakip si Lorna sa pelikula sa Quantum Films nga Walang Forever kung diin midala siya isip inahan ni Jennylyn Mercado.

Wala matandog

Igo lang mikatawa si Sue Ramirez sa mga pagpangatake nga iyang nadawat gikan sa fans nila ni Kathryn Bernardo. Suma pa ni Sue nga hagbay ra siya nga nag-expect niini busa wala na siya makugang. Si Sue maoy third party nila ni Kathryn ug Daniel sa seryeng Pangako Sa ‘Yo.

Kinsa‘y  sidekick ni Panday?

Ang child actor nga si Alonzo Muhlach maoy  usa sa giplanohan sa TV5  aron himoong sidekick ni  Richard Gutierrez sa  TV series nga Ang Panday.

Robin mibalik sa Dos

Aduna’y giluto nga programa ang ABS-CBN alang kang Robin Padilla. Mipirma’g balik og kontrata si Robin sa Kapamilya Network.

Janella nasakitan

Tsika pa ni Janella Salvador nga gipasaylo na niya ang event host nga wala makaila kaniya bisan pa man nga wala kini nangayo og pasaylo kaniya. Giangkon sa aktres nga nasakitan gyud siya nga wala makaila ang host kaniya nga event man unta kini sa produkto nga iyang gi-endorso. “It’s from an endorsement kasi. Hindi ko na babanggitin kung anong endorsement. Siyempre, you should know your endorser if you’re from that company,” saysay pa ni Janella ngadto sa ABS-CBN News.

U.S.A. gipangandoy ni JC

Usa sa gipangandoy karon ni JC de Vera mao ang pagtikang sa Amerika. Suma pa sa aktor nga magtigom gyud siya og maayo aron makatikang sa maong lugar.

Paningkamot gyud Pia

Gidoble ni Pia Alonzo Wurtzbach  ang iyang preparasyon aron malangkat sa Pilipinas ang titulong Miss Universe 2015 nga pagahimoon karong December 20 sa Planet Hollywood Resort and Casino sa Las Vegas, Nevada. Dakong hagit alang kang Pia ang maong indigay gumikan kay kinahanglan niya nga mamintinar ang nagsidlak-sidlak nga imahe sa Pilipinas sa natad sa beauty pageant. Kini human ang pambato sa Pilipinas nga si Angelia Ong maoy napili nga Miss Earth 2015.

AlDub sa Vampire

Molugwa og usa ka episode sa sitcom sa GMA-7 nga Vampire Ang Daddy Ko sila si Alden Richards ug Maine Mendoza. Nag-taping na ang duha alang sa maong programa niadtong Martes.

Pag-umangkon ni Gwen natagak sa The Voice

Natagak kagahapon sa The Voice –USA  ang  Filipino-American singer  nga si  Amy Vachal human  gihashasan na ngadto sa upat ang Top 9 semifinalists sa maong show.

Ang magtigi sa grand finals   mao sila si  Jordin Smith, Emily Ann Roberts, Barrett Baber ug  Jeffrey Austin.

Sa pagsugod pa lang og apil ni Amy sa maong programa , nihatag na og init nga suporta kaniya ang mga Sugbuanon ilabi na nga taga Dumanjug  ang iyang inahan.Pag-umangkon si Amy ni Kongresista Gwendolyn Garcia.

Piolo jug KC nag-uban sa entablado

Upat ka tuig human sa kontrobersyal nga panagbuwag, aduna’y nahitabong stage reunion nila ni Piolo Pascual ug  KC Concepcion niadtong Martes sa gabii .

Nahitabo kini sa ABS-CBN Christmas Special nga gipahigayon sa  Araneta Coliseum ug ipasalida kini sa telebisyon karong  December 19 ug 20.

Nalakip si  Piolo  sa  production number uban sa pipila ka mga aktor sa  ABS-CBN  ug sa wala damha ,  apil diay si KC sa motungtong sa entablado niadtong  higayona.

Gibitad  ni John Lloyd Cruz ang kamot ni Piolo  ug gipaduol dayon kini ngadto kang  KC.   Sa ilang panagtupad sa entablado,  gihagkan ni Piolo si KC sa aping.

Sa interview sa  ABS-CBN News , gibutyag ni  Piolo nga   didto pa lang sila nakahibalo ni KC nga magdungan diay sila sa usa ka spiel .

“We were told sa backstage lang na we were doing a spiel. Wala kaming rehearsal. Nagkita kami sa stage na,” suma pa sa aktor.

Sa pangutana kung mao na ba kini ang sinugdanan sa ilang panaghigalaay, nitubag ang aktor:  “Sa amin na lang 'yun. If there’s anything, I guess we are at a point wherein lessons have been learned so there are things which we just want to keep private. We learn from the past.”

Kahinumduman nga una na nga nagtagad niadto ang inahan ni KC nga si Sharon Cuneta ug Piolo. (BANAT NEWS)