Birthday Gift

Nakasala ko ninyo. Pero kay birthday man nako gahapon, hinaot inyo ko nga mapasaylo. Bitaw, nakahinumdom pa mo sa okRYAN Give A Rosary Project mga two years ago? Mao na akong sala ninyo. Human sa duha ka tuig, last week pa gyud nako nahatag ang kapin sa gatos nga mga rosaryohan nga inyong gihatud diri sa Banat News office ug didto sa dyRC.  Pasensya na  intawon.

Ingon ani man gud ang nahitabo. Para gyud unta to sa mga bata sa Carcar. Nagsabot na gyud mi sa akong hatagan ato. Pero wala gyud ko makahigayon paghatud niini didto sa Carcar. Cliché na kaayo nang muingon ta nga I’m very busy. Pero mao gyud nay tinuod. Unya nagkauyon sab mi nga kuhaon lang diri sa Banat News office kun makaari si Maam sa dakbayan. Murag wala gyud to siya makahigayon tingali kay wala man siya nitext nako aron pagkuha sa mga rosaryohan. Maong pasensya na gyud ha, dili mga bata sa Carcar ang nakadawat. Pasayloa ko nga wala matuman ang akong giingon ninyo niadtong namarayeg ko sa maong mga rosaryohan.

Yes, na dispose na ang maong mga rosaryohan last week. Akong gihatag sa akong higala nga si Rhan Gingoyon nga taga Buhisan. Katekista man sab siya. (Birthday sab niya adtong Sabado. Belated happy birthday my friend). Ingon si Rhan iyang gibahin ang mga rosaryohan tali sa mga kabataan sa Buhisan ug sa usa ka dapit sa lungsod sa Tabogon. Yes, layo layo og naabtan ang inyong gihatag nga mga rosaryohan sab hinuon. Salamat kaayo! Pakpak!

Suma pa gyud ni Rhan nga iyang gipabenditahan ang mga rosaryohan diha sa Opon pagliwas sa kapistahan sa Mahal nga Birhen sa Regla. Unya, diha matud pay tiguwang babaye nga nangayo gyud og usa ka rosaryohan kay dugay na matud pa siya nga naghandum tawon nga makabaton niini. Dinha matud pa ang maong babaye naglingkod kilid sa dagkutanan. Aduna kini gihambin nga balatian. O di ba, maka happy nga ang usa ka rosaryohan nga imong gihatag bililhon ug dako kaayo nga kalipay ang madalit ngadto sa makadawat? Pakpak! Maong salamat gyud kaayo ha.

Ug lagi kay birthday man nako gahapon ayaw na lang mo pangutana pila nay akong edad! Hahahaha! Bitaw, lagi kay birthday man nako gahapon mangayo gyud ko og regalo ninyo. Yes, atong sugdan na sab ang okRYAN Give A Rosary Project Part 2. Maong mamarayeg ko og regalo nga mga rosaryohan para sa mga kabataan nga ganahan nga makadawat og rosaryohan karong pasko. Ayaw mo og kabalaka kay ingon si Rhan nga daghan pa kaayo siya og mga estudyante nga wala pa gyud makadawat ug ganahan nga mahatagan. So, please as your birthday gift nako hatagi na sab ko og rosaryohan aron daghan pa nga sama ni Manang nga didto sa dagkutanan nga naghandum ug nahatagan gyud. Usa, duha o bisan pila ka buok nga rosaryohan kutob sa imong ma-afford, isipon nako nga labing makahuluganon nga birthday gift gikan sa imong pamilya paingon sa laing pamilya. Ikalipay nako og dako nga mamahimong instrumento aron makahatag mo og kalipay ngadto sa uban pinaagi sa maong mga rosaryohan. Please? Salamat daan. Mhuuuaaah!

Ibilin lang sa gwardya diri sa Banat News  nga naa mahimutang sa D. Jakosalem corner V. Gullas Streets, Barangay Sto. Nino, 6000 Cebu City, Philippines. Ug kun pabor mo sa Fuente area, adto na dad-a sa dyRC, Room 301, Doña Luisa Building, Fuente Osmeña, Cebu City. I-text lang ko kun dili mo ka tuod: 0928-99-03058