Kathryn misuporta ni Mar

CEBU, Philippines – Gawas kang Daniel Padilla,  miuban kaniya sa pag-endorsar kang Mar Roxas pagka-presidente mao ang iyang ka-loveteam nga si Kathryn Bernardo.  Ni-post si Korina Sanchez og hulagway sa iyang Instagram account kung diin kauban ni Mar ang Kathniel.

Neil nalingaw sa pag-arte

Malipayon si  Mr. International 2014 nga si Neil Perez  sa pagkalakip niya sa seryeng Princess in the Palace gumikan kay nagkaanam-anam og baid ang iyang pag-arte. Malipayon usab siya sa  nadawat  nga mga positibong feedback sa maong serye.

Unsaon na lang?

Miulbo ang tsika nga matud pa duna’y join account sila si  Rocco Nacino ug  Lovi Poe isip pagpangandam sa ilang kaugmaon busa nakapangutana ang ilang fans kung unsa na ang mahitabo niini ilabi na nigawas ang taho nga taud-taud na nga nagbuwag ang duha. Kinahanglan matud pa nga mag-abot ang duha aron hingpit nga ma-withdraw ang  ilang tinigoman.

Pokwang gi-request ni Kris

Malakip si Pokwang  sa pelikula nila ni Kris Aquino ug Derek Ramsay nga All You Need Is Pag-ibig. Si Kris matud pa ang ni-request niini gumikan kay usa si Pokwang sa mga paborito niya nga artista.

Bea modawat og mature role

Andam na nga modawat og  mature role ang Kapuso actress nga si Bea Binene. Suma pa sa aktres nga 18 anyos na siya busa gusto na pud niya nga masuwayan ang bug-at nga role. “Bilang aktres, gusto namang maiba na ang mga ginagampanan kong role sa mga teleserye,” suma pa ni Bea.

Gardo pasok sa The Half Sisters

Sugod karong hapon,   matan-awan na sa The Half Sisters  ang beteranong aktor nga si Gardo Versoza. Siya maoy modala isip  Dr. Santi, ang psychiatrist ni  Jean Garcia.

For The Love of Mama

Magbaha ang special guests ni Ai Ai delas Alas  sa  iyang For The Love of Mama benefit concert karong gabii sa  SM Mall of Asia Arena. Ang kita niini maoy gamiton sa pagpatukod og simbahan sa Commonwealth, Quezon City.  Molugwa karong gabii sila si Erik Santos, Alden Richards, Ruru Madrid, Gabbi Garcia, Sancho delas Alas, Jay Gonzaga, Kylie Padilla, Nikki Valdez, Ron Dancers ug ang  The Philippine Madrigal Singers. Mo-perform usab ang ilado nga grupo nga gitawag og K5 (Kerygma singers) nga gilangkoban nila ni  Alvin Barcelona, Arun Gogna, Obet Cabrillas, Jon Escoto ug  Andrian Panganiban.

Juan Tamad nataypan

Nakatungtong na karon sa season 2 ang comedy show ni Sef Cadayona nga Juan Tamad ug timailhan kini nga kusog ang maong programa. Kauban ni Sef sa  maong show sila si Max Collins, Marissa Sanchez, Roi Vinzon, Melanie Marquez ug RJ Padilla.

Fans nagpabilin

Gipaneguro ni Willie Revillame nga mamintinar nila ang kakusog karon sa show niya nga Wowowin. Nagpasalamat ang TV host sa iyang fans gumikan kay wala gyud kini mobiya kaniya.

Oras sa kaugalingon

Bisan pa man sa ka-busy ni Maine Mendoza , nakahatag pa gyud kini og oras alang sa iyang kaugalingon. Nitan-aw si Maine  sa concert ni  Sam Smith sa  SM Mall of Asia Arena niadtong Sabado sa gabii. Paghuman sa maong concert, gikagubtan si Maine sa lobby sa MOA  ug daghan ang nagpa-picture kaniya.

Awit ni Alden gipistahan sa iTunes

Nag-una sa  iTunes PH ang  theme song sa GMA Christmas station ID nga “Magmahalan Tayo Ngayong Pasko”   pipila ka adlaw human sa pag-release niini sa  online digital media store. Nahimutang kini sa ika- 27 sa  iTunes Singapore , samtang  ika-58  kini sa iTunes Macau.  Ang Pambansang Bae nga si Alden Richards maoy  nagkanta sa maong awit.    Suma pa sa mga obserbasyon sa kadaghanan nga dako gyud og natabang  niini ang kasikat ni  Alden.  

Vice nayayay

Naglain ang lawas ni  Vice Ganda busa kanunay kini nga absent sa  noontime show nga  It’s Showtime.

Kanunay nga nagsakit ang tiyan ni Vice  sa miaging mga adlaw   busa  duna’y mga adlaw nga maglisod siya og lugwa sa iyang show.

Gipaneguro gyud sa TV host nga mahibalik dayon ang maayong kondisyon sa iyang lawas gumikan kay naglinya pa ang iyang mga buhatunon.

Pinaspasay na ang shooting niya sa pelikula nila ni  Coco Martin nga  “Beauty and the Bestie” nga nalakip sa Metro Manila Film Festival.

Dili cripted!

Nakugang ang Filipino-American model  nga si Tommy Esguerra sa init nga paghangop sa viewers sa  realiserye segment nila ni Miho Nishida sa  It’s Showtime.

Gihimakak ni Tommy ang nigawas nga report nga matud pa scripted ang segment nila sa It’s Showtime. Matud pa niya nga hatagan ra sila og kalit-kalit nga ideya sa higayon nga naa na sila sa entablado.

Ang duha puros produkto sa 10th anniversary edition sa  “Pinoy Big Brother” ug nagmaya sila gumikan kay  nahatagan gyud sila og luna sa showbiz.