Gikalagotan sa JaDine fans

CEBU, Philippines – Giangkon ni Ysabel Ortega nga gi-bash siya sa fans nila ni James Reid ug Nadine Lustre gumikan sa iyang role sa On The Wings of Love. Si Ysabel maoy ka-love triangle sa JaDine sa nahisutang serye. Gitag-an na kini daan ni Ysabel sa dihang gidawat niya ang maong role. Suma pa sa aktres nga parte lang kini sa iyang trabaho.

Baby boy

Gibutyag ni Michael Pangilinan  nga lalaki  ang umaabot niya nga anak.  Nasayran nga walo na ka buwan nga nagsabak ang iyang ex-girlfriend ug giklaro sa singer nga nagpadayon gihapon ang komunikasyon nila sa maong babaye. Gisaad niya nga mohatag og saktong sustento sa umaabot niya nga anak.

Ka-level lang

Wala’y problema alang nila ni Vic Sotto ug Ai Ai delas Alas nga ka-level nila sila si Alden Richards ug Maine Mendoza sa poster sa pelikulang My Bebe Love. Malipayon ang duha sa kalampusan nga nakab-ot sa AlDub. Una na nga napanglantawan nga makatabang gyud og dako ang AlDub sa nahisgutang proyekto.

Edited version

Gikatahong mogama og edited version ang GMA-7 alang sa ilang 2015 Christmas Station ID. Kahinumduman nga duna’y Kapuso stars ang wala makalugwa sa maong video gumikan kay wala nagkatakdo ang ilang schedule sa taping. Kini sama nila ni Eugene Domingo, Regine Velasquez ug Jennylyn Mercado.

Dili mahimong maghago

Dili mahimong magbinuntagay si Nora Aunor sa taping gumikan kay maluya dayon siya. Himuon og sayo ang mga eksena ni Nora sa seryeng Little Nanay aron makapahuway dayon.

Tsismis ra diay

Gihimakak sa kampo sa It’s Showtime nga matud pa wagtangon sa ere ang maong noontime show. Nasayran nga nalupigan na og maayo ang maong programa sa Eat Bulaga. Ipabilin lang gihapon ang It’s Showtime ug dugangan lang kini og mga segment.

Andam na makaanak

Andam si Priscilla Meirelles nga mopahuway sa showbiz sunod tuig basta makabaton sila og anak ni John Estrada. Kung momabdos man gani siya, likayan niya nga mahago ang iyang lawas, ug mobalik lang siya sa showbiz kung manganak na siya.

Anjo nahagit ni Sam

Giangkon ni Anjo Damiles nga nahagit siya sa pagsulod ni Sam Milby sa  ‘Doble Kara’. Suma pa sa aktor nga banggiitan na si Sam busa kinahanglan nga tarungon pa niya og maayo ang iyang performance.

Santino naospital

Nalandig sa tambalanan ang anak ni Claudine Barretto nga si Rodrigo “Santino” Santiago niadtong Lunes gumikan sa allergy.  Suma pa sa aktres nga naglisod og ginhawa ug dunay rashes nga nanurok sa panit ni Santino busa dali niya kini nga gidala sa tambalanan.

Lisod balikon

Imposibleng magkabalik sila si Jessy Mendiola ug JM de Guzman kung basehan ang mga mensahe nila sa Instagram. Giingong dili na gusto si Jessy nga masakitan pa busa dili na siya magpadala sa higayong moingon si JM nga gimingaw kini kaniya. Una na nga mihangyo si JM ngadto sa iyang fans nga dili angayan basulon si Jessy sa ilang breakup.

Davila: “My job is to ask the  hard questions”

Gidepensahan ni Karen Davila ang iyang kaugalingon batok sa mga nisaway kaniya nga wala gayud matud pa maluoy kang Alma Moreno isip guest sa iyang show nga “Headstart” sa ANC sa nilabay nga semana.

Suma pa ni Davila trabaho niya ang pagbato og lisud nga pangutana ngadto sa iyang mga bisita.

Matud pa ni Davila nitabang pa gani siya kang Alma pinaagi sa pag-tagalog sa iyang pangutana nga unta iningles man ang gamit nga pinulungan sa iyang show.

Giklaro sab niya nga patakaran nila nga dili ihatag ang questions daan ngadto sa bisita.

“NO, interview questions are never given to an interviewee. I research a lot and try and come as prepared as I can every single day. If you watched the interview in full, you will see that I shifted to Tagalog, during many times - I tried to help her,” niya pa.

Suma pa ni Davila may mga mas lisud pa nga pangutana nga iyang gibato ngadto sa iyang mga guest kaniadto sama niadtong nibisita sab si Senator Bongbong Marcos.

Matud ni Karen nga trabaho niya nga pangutan-on og lisud nga pangutana ang iyang mga bisita aron sa tukmang paghukom sa publiko.

Kahinumduman nga trending niining nakalabay nga mga adlaw si Alma human wala nagkadimao ang iyang mga tubag ngadto sa pangutana ni Davila nga naghisgot kabahin sa RH Law, LGBT ug Magna Carta of Women.

Suma pa sa mga nakakita sa maong interview angayan nga dili na lang mupadayon si Alma sa iyang tinguha nga magpapili pagka senador gumikan kay klaro kaayo nga dili pa gayud siya andam sa maong posisyon sanglit wala siya’y alamag sa mga isyu nga giatubang sa kinabag-an sa mga Pinoy.

Si Alma nalinya sa United Nationalist Alliance (UNA).

Nicki Minaj nahugyaw sa tingog ni Darren

Human  sa positibong reaksyon sa Hollywood actor nga si Ashton Kutcher,  ang international singer na pud nga si Nicki Minaj ang nidayeg sa version ni Daren Espanto sa awit ni Sia nga “Chandelier”.

Pagkakita ni Nicki sa maong video, nahugyaw siya sa kanindot sa tingog ni Darren busa iyaha kining gi-share sa iyang Instagram account.

“ So effortless. Incredible voice! ,” reaksyon ni Nicki sa tingog sa 14 anyos nga si Darren.

Sa Youtube,  miabot na og 5.2 million views ang nahisgutan nga cover video.

Pagkabasa ni Darren sa reaksyon ni Nicki, iyaha dayon kini nga gipasalamatan.