Mga walay batasan nga organizer!

CEBU, Philippines – Walay respecto ug kuwang sa seminar! Dili makamao og media relations. Kini maoy reaksyon sa mga sakop sa press nga nitambong sa presscon alang kanila ni Nadine Lustre, James Reid,   Donnalyn Bartolome, Yassi Pressman ug Andre Paras niadtong November 14 nga gipahigayon sa usa ka resort diha sa Punta Engaño, Lapu-Lapu City.

Nasayran nga mga 10:15 sa buntag nibiya ang mga sakop sa press dinhi sa dakbayan sa Sugbo ug niabot sa venue human sa 45 minutos. Apan namuti ang kalimutaw sa mga sakop sa press gumikan kay alas dos na sa hapon nibutho sa venue ang mga artista.

Yes, tulo ka oras nga naghuwat ang press sa mga artista. Ang nakaparat kay nilungtad lamang og 10 minutos ang presscon sanglit  usa ka pangutana lamang ang gitugot sa matag reporter.

Mada ra unta to og smile, apan nigawas ang pagka walay modo sa organizer dihang usa ka reporter ang nihirit og pahulagway kauban ang mga artista ug nilenggua ang host og, “ Lahat naman seguro  tayo dito educated”.

Gipagawas dayon sa organizer ang tanang tawo sulod sa venue ug daghan man sila, wala makagawas dayon ang tanan. Dinhi nihirit na sab ang host gamit ang microphone pag-ingon, “ step out.”  Wala pa makontento nanawag pa kini og bouncer.

Mga taga Manila ang nagdumala sa maong presscon. Normal ra nga madelatar ang artista pag-abot ilabi na sa panahon karon nga kanunay nga traffic ang mga airport ug ma delay pa gyud ang paglupad sa mga eroplano.

Apan dili normal ang pagka walay batasan sa maong mga organizer nga nagpatugatuga og imbitar og press apan dili diay makamao mu-abi-abi og tarong. Ka mga walay respeto sa oras sa uban!

Kun buot hunahunaon, angayan unta sila nga magpasalamat sa press nga Sabado nga dako nitambong gyud sa ilang presscon nga labihan ka layo. Nagpaabot pa gyud bisan labihan ka dugay nila nga niabot nga unta tingpaniudto pa ang ilang gitakda nga oras sa presscon. Mao toy ilang ibawos? Kun mao na, angayan nga dili na sila mubalik sa Sugbo uy, kay wala sila mahaom sa ka maayong mangidtawo sa mga Sugbuanon. Kinahanglan og seminar gyud!

Ang entertainment press sa Sugbo dili hangol og artista. Mutambong kini og presscon gumikan kay tipik man kini sa trabaho. Apan wala kana magpasabot nga ang mangimbitar adunay katungod sa paghinambugero ug dili pagtratar og tarong sa ilang gi-imbitar, ilabi na kay silay wala mutuman sa sabot nga tingpaniudto mulugwa didto.

Mga hilason bisan wala sa ilang nataran. Ka mga hawod gud nga dinhi pa gyud sa Sugbo maghinilas? Walay sala ang mga artista o ang nagdumala nila. Sala ra gyud to sa mga nag-organize sa maong kalihukan diin ang mga artista maoy guest performers. Kinahanglan silang magkat-on og hustong pamatasan ug sakto nga pagdumala og presscon. Kay sa pagkatinuod lang sila ug mga artista maoy nagkinahanglan sa press. Mabuhi ra ang press bisan walay presscon. Kadaghan balita diha ah nga pwedeng masuwat!