Musika ni Stephanie

CEBU, Philippines – Nagmalampuson ang album launching sa homegrown talent nga si Stephanie Mananquil kinsa sakop sa M. Talent Events and Promotions, nga gipahigayon sa Mediterranean Hall  sa Waterfront Cebu City Hotel and Casino niadtong Sabado.

Ni-arangkada kini human sa panagtigi sa mga contestants sa GLOWW Season 2 Search for Cebu’s Pop Performer , diin ang mga contestants naggikan sa nagkadaiyang tunghaan sa Sugbo. Naglangkob isip hurado sila si ex-Pinoy Dream Academy scholar, Apple Abarquez, Waterfront Cebu Hotel and Casino sales and marketing head Arnel Apparis ug award-winning composer Vehnee Saturno.

Nigawas nga mananaog mao ang pambato sa University of the Visayas nga si Kriscia Isla Apuya.

Atol sa maong indigay nipasundayag sab ang GLOWW Season 1 grand champion nga si Melody Hodgson, kinsa nisikat usab human na-runner up sa It’s Showtime Kalokalike isip Katy Perry.

Nipaambit usab sa iyang ka banggiitan ang world-class performer ug garbo sa Sugbo nga si Anna Fegi-Brown, kansang maanindot nga tingog nihugyaw sa mga nitambong ug angayan ka gayod nga ipasigarbo.

Album Launching

Human sa panagtigi, nilugwa dayon sa entablado si Stephanie alang na sa paglusad sa iyang album. Nipaambit siya og mga awit nga gikan sa iyang self-titled album  nga nagtangag og unom ka mga awit, diin ang lima niini mugna mismo sa banggiitang si Saturno.

Nidugang sa ka mabulukon sa maong gabii mao ang Power Trio diin sakop usab si Stephanie, ingon man ang tulo ka Mr. Pastillas nga sila si Mike, Chard ug Topher.

Nisamot ka hugyaw ang maong gabii dihang nilugwa sab si Michael Pangilinan ug nakig-duet kang Stephanie.

Si Pangilinan ang tingog luyo sa malampuson kaayo nga awit sa nilabay nga tuig, ang “Pare Mahal Mo Raw Ako”. Usa siya karon sa mga contestants sa ABS-CBN show “Your Face Sounds Familiar”.

Nagpasalamat si Stephanie sa iyang mga fans ug higala nga naghugop gyud aron musaksi sa iyang kalampusan isip recording artist. Dinhi gilab-as sab niya kadtong mga panahon nga nagsugod pa lamang siya sa industriya kauban ang iyang grupo nga Power Trio.

“Before ko nagka solo album naa gyud koy girl group. Kami sa una kay mangita gyud mi’g raket bisa’g asa…karon adtu mi og Manila inig ka ugma balik  na pud mi og Cebu,  inig ka ugma na sad mi sa Mindanao. Naa pa jud one time nga tulo among gig sa usa ka adlaw…Oh! Asa mo ana…raketera, dili? “

Gipaambitan sab ni Stephanie ang iyang inahan nga si Aida Patana kinsa nagsaulog sa iyang adlaw’ng natawhan nianang pagka ugma. Matud ni Steph, bulahan siya gumikan sa hilabihan nga suporta nga gibubo sa iyang inahan diha niya alang sa iyang pangandoy nga magmalampuson sa showbiz  sa tukmang panahon.

Ang executive producer sa ABS-CBN Sunday show MagTV Na ug radio host nga si Adrian Dionzon maoy director sa mabulukon nga show.

Alma gisaway ug mayo

Nag-viral sa nagkadaiyang social media sites ang video sa  interview ni  Karen Davila sa United Nationalist Alliance (UNA) senatoriable nga si Alma Moreno sa programa niini nga  Headstart sa ANC niadtong  November 11, 2015.

Gihulagway sa netizens nga wala nagkadimao ang tinubagan ni Alma kalabot sa mga plano niini kung modaog siya pagka-senador.

Magpapili si Alma pagka- senador sa 2016 elections  ubos sa ticket nila ni  Vice President Binay ug Senator Gringo Honasan.

Gipangutana si Alma kalabot sa  isyu sa same-sex marriage, ug tubag niya: “No. Parang hindi naman natin matanggap na parehong ano magpapakasal.”

Pangutana ni Karen: “Is it a sin for you?”

Tubag sa aktres, “Yes. Sa akin, ha, yung magpapakasal.

“Pero yung mag-ano, okay lang. Pero yung magpapakasal, parang hindi ko…”

Miusab og pangutana si Karen: “So, you think same-sex marriage is a sin?”

“Yes,” ang deretsong tubag ni Alma.

Laing pangutana ni Karen: “If you won a Senate seat, what would be your advocacy in the Senate?”

Nitubag si Alma og, “More on sa kababaihan… Boses ng kababaihan... Magna Carta of Women...”

Nihirit ang TV host: “But then the law exists already.”

Tubag dayon niya : “Pero may mga bagay na di na-implement…”

Mi-follow-up si Karen: “Like what? I wanna hear it.”

Padayon og istorya si Alma og, “Teka muna... Katulad nun, di ba, may mga na-rape na mga bata, wala pa tayo nung law na ganun, e.Na puwedeng… puwedeng, what’s this... na mahirap, na walang magwi-witness dun sa batang yun…Na puwedeng ang government ang tumulong dun sa batang yun para magdemanda.”

Gipangutana usab si Alma kalabot sa Reproductive Health Bill ug nitubag dayon kini og, “Yes, but with reservations.”

Gipangutana ni  Karen kung unsa ang iyang  reservations.

Nagkatawang gitubag ni  Alma, “Kailangan pa bang sagutin?”

Tubag ni Karen, “Of course. You are running for the Senate.”

Mikomedya dayon si  Alma, nga kinahanglan nga kanunay nga nakasiga ang suga aron ma-kontrol ang pagsaka sa populasyon.

Gipangutana usab si Alma kalabot sa anti-dynasty bill, ug giklaro niini nga wala’y  problema ang political dynasty basta maayo lang ang pagkadala sa politiko sa  ilang mga lugar.

Reporma ang gusto niya nga mahitabo sa income tax issues.

Laing pangutana ni  Karen, kung nituo ba siya sa mga  isyung nasugatan ni  Vice President Jejomar Binay.

Tubag ni  Alma, “Hindi. Hindi, kasi hindi pa naman napapatunayan sa husgado. Puro allegations pa naman, kumbaga wala pa.”

Kinahanglan nga huwaton una ang hukom sa  husgado nga maoy mosusi kung tinuod ba o dili ang mga alegasyon nga gibato batok sa bise presidente.