Pasok sa next round

CEBU, Philippines – Nagmaya ang mga Pinoy human naluwas sa laing hugna sa elimination round sa X Factor UK ang all-Pinay group nga 4th Impact . Gikanta sa maong grupo ang “Work It Out” ni Beyonce ug nahugyaw gyud sa ilang performance ang tanang hurado.

Jose nagpahayahay sa US

Absent og pipila ka adlaw si Jose Manalo sa kalyeserye sa Eat Bulaga gumikan kay nibakasyon kini sa Amerika. Taud-taud na nga gipangandoy ni Jose nga maka-relax .

Lovi mobakasyon sa Paris

Ipadayon ni Lovi Poe ang pagbakasyon didto sa Paris uban sa iyang pamilya sa katapusang bahin karong buwana. Dugay na kini nga plano ni Lovi busa nagmalaumon siya nga dili na mausab ang pagpangatake sa mga terorista sa maong dapit.

Mga Sugbuanon nakadaug

Nakadawat og mga pasidungog ang mga Sugbuanon nga sila si Ara Chawdhury ug Chai Fonacier sa bag-ohay lang nga annual Cinema One Originals Film Festival. Si Ara maoy nakaangkon sa Best Screenplay alang sa ginama niya nga “Miss Bulalacao” , samtang napili nga  Best Supporting Actress si  Chai .

Maglalis usahay

Giangkon ni Liza Soberano nga duna’y mga higayon nga maglalis sila ni Enrique sa ginagmay nga mga butang.  Duna’y mga butang nga managlahi ang ilang opinyon. “Hindi po siya nakikinig. Kunyari may opinyon ako, hindi pwede ‘yung opinyon ko. ‘Yung opinyon n’ya lang,” nagkatawang gipadayag ni Liza.

Conflict ang schedule

Giklaro ni Regine Velasquez nga dili angayan himuong isyu ang wala niya paglugwa sa Christmas Station ID sa GMA.  Suma pa sa singer nga wala lang gyud nagkatakdo ang iyang schedule sa dihang gigama ang maong video.

XB Gensan nakadaug

Ang XB Gensan maoy grand champion sa “Dance2Dance: The World Streetdance Showcase Competition” nga gipahigayon didto sa Zurich, Switzerland niadtong Sabado ,  November 14, 2015. Si Anne Curtis maoy nagpahibalo niini pinaagi sa iyang Instagram post.

Kinasing-kasing

Tsika pa ni Maja Salvador nga bisan pa man nga wala napuno ang Mall of Asia Arena sa iyang concert niadtong Biyernes, gitodo gihapon niya  ang iyang performance  nga kinasing-kasing gumikan iyaha kining gidalit  ngadto sa iyang loyal fans.

Pangandoy ni sister

Gipangandoy ni Jasmine Curtis Smith nga makauban niya ang iyang maguwang nga si Anne Curtis sa usa ka pelikula.  Usa kini sa gustong buhaton ni Jasmine sunod tuig.