Medyo maldito mu-banat na!

CEBU, Philippines - Kun residente ka o nagyampungad ka sa Facebook, imposibli nga wala ka makaila kaniya, ilabi na kun mahiligon ka og mga pakatawa nga mugna apan tugob sa emosyon. Hugot kun hugot.  Ang iyang mga meme nga ipasapasa sa iyang fans sa ilang mga account sa Facebook makapakatawa, apan sa samang higayon mu-uyon sab ka, ilabi na og maigo ka sanglit nasinati na diay nimo ang samang sitwasyon.

Apan kun ikaw walay Facebook hinungdan nga wala ka makasabot unsay buot pasabot, ayaw og kabalaka kay si Medyo Maldito o Rowell Ucat sa tinuod nga kinabuhi,  mupaambit na sa iyang abilidad, mga pakatawa ug pagtulun-an ngadto sa kinabag-an pinaagi sa Banat News.  Sugod karong Lunes, November 16, siya na maoy mutambag nimo.

Aron atong masabtan, ania kining pakighinabi:

Banat News Hugyaw (BNH): Unsay imong gibati dihang nakadawat ka sa imbitasyon sa Banat News aron magsuwat og column ug nganong nitando ka dayon?

Medyo Maldito: Pagkadawat nako sa imbitasyon, wa ko kasabot sa akong gibati. Nalipay gyud kaayo ko ug at same time, nakapangutana ko kung sigurado ba gyud ang Banat News sa ilang desisyon. Katong na feature ko sa Banat News atong March 2015, sangko sa langit akong kalipay. Karon, sobra pa maong wa na gyud ko nag duha duha ug nisugot gyud ko diritso.

BNH: Unsay mapaabot sa imong mga fans gikan nimo karon nga nitabok na ka gikan sa social media ngadto na sa mainstream media?

Medyo Maldito: Magpadayon lang gihapon ko og himo og mga videos sa social media, magpadayon og himo og mga bisaya quotes ug hugot. Ang nakanindot, pwede sila makapangayo og tambag nako, ug akong tubagon sa Banat News. Mas daghan ang makabasa, maka-relate, ug makatuon sa ilang mga kaagi.

BNH: Ang tanan nga nakaila nimo, uyon gyud nga mapaubsanon kaayo ka ug buotan, gi-unsa nimo pagpabilin nga ingon niini bisan pa man kun labihan na nimo ka sikat sa social media isip Medyo Maldito?

Medyo Maldito: Siguro tungod kay wa gyud koy angay nga ikapanghinambog. Ni ‘sikat’ ko kay tungod ra man gihapon nila: akong mga higala. Temporary ra ni tanan. Kung muabot na ang panahon nga di na ko sikat, di ko magmahay. Mapasalamaton ra gihapon ko tungod kay daghan ko’g nahimong higala pinaagi sa social media.

BNH: Unsay style sa imong column sa Banat News? Aduna ba kini kalainan sa ilang makita ug mabasa sa social media?

Medyo Maldito: Problem solving ang format sa “Medyo Maldito” nga column sa Banat News. Para ni sa mga naay pangutana ug problema sa ilang mga lovelife. Pareha sa mga mabasa sa social media, akong column adunay mga hugot ug banat. Ang nakalahi, gamiton ko ning mga hugot ug banat para sa akong mga tambag. Mga tambag nga, mahadlok ko, basin maoy rason nga magbuwag mo’s imong uyab. *haha*

BNH:  Problem solving ang format sa imong column, unsa bay istado karon sa kasingkasing ni Medyo Maldito…malipayon o magul-anon?

Medyo Maldito: Malipayon. Single pero pirmi inspired.

BNH: Unsang adlawa ka angayan nga atangan sa imong mga fans dinhi sa Banat News?

Medyo Maldito: Kada Lunes ug Biyernes, atangi ninyo ang mga tambag nga pina Inday Hugot ug Boy Banat. Malingaw gyud mo ug basin magamit pa ninyo ning mga tambag sa future.

BNH:  Unsay mensahe nimo sa imong mga fans karon niining pagsugod na nimo og bag-ong pahina sa imong kinabuhi isip Medyo Maldito ang magtatambag?

Medyo Maldito: Daghan kaayong salamat sa inyong pagsuporta ug hinaot unta nga di mo mapul-an labaw na karon nga apil nako’s pamilya sa Banat News. Magpadayon ko sa pagbuhat og mga bag-ong contents para ninyo.

BNH: Thank you very much Medyo Maldito. Dawata ang mainiton kaayo namong paghangop nimo isip labing bag-ong sakop sa pamilya sa Banat News….

Medyo Maldito: Daghang salamat, Banat News sa pagsalig nako ug sa paghatag niini nga opportunity. Mapasalamaton kaayo ko kay sa kadaghang writer nga banggiitan, ako gyud inyong napilian. Excited nako kaayo makatrabaho mo.