Aktres bagsak sa audition ng musical play!

Napanood namin ang aktres na ito nang mag-guest sa isang concert at kahit nakakakanta, hindi exceptional ang kanyang boses. Natakot nga kami na baka mag-flat ang boses nito habang kumakanta dahil halatang ninerbyos sa rami ng tao.

Kaya hindi kami nagulat nang malamang hindi nakapasa ang aktres sa audition para sa isang musical play. Hindi problema sa aktres ang acting dahil nakakaarte siya at nakakaiyak kahit ‘di gamitan ng eyedrops.

Sa singing part pa kulang ang aktres at unsolicited advice lang, kung talagang gusto niyang maging part ng musical play, magsimula na siyang mag-voice lesson. Isama na rin niyang praktisin ang pagkanta sabay ang acting at tiyak matutupad ang dream niyang makalabas sa musical play.

Andre mas pinili si Yassi kaysa kay Barbie

Sabi ni Yassi Pressman, love team at best friends lang sila ni Andre Paras at hindi ito nangliligaw sa kanya. Pero sa body language ng dalawa na muli naming naobserbahan sa presscon ng Wang Fam, obvious na special sila sa isa’t isa. Ang feeling ng press, naghihintay lang si Andre ng right time na ligawan si Yassi.

Sa TV interview nila, laging nakahawak sa beywang ni Yassi si Andre at laging nakatitig sa dalaga. Inamin nitong posibleng maging sila ni Yassi dahil enjoy silang magkasama, madalas magkasama at sunud-sunod ang movie. Ilu-launch sila sa Girlfriend For Hire na may January 2016 playdate.

Biniro si Andre na mas binigyan niya ng priority si Yassi kesa kay Barbie Forteza na kapareha niya sa The Half Sisters. Hindi muna siya nag-taping ng soap nila ni Barbie at nag-focus sa promo ng Wang Fam dahil showing na ang Viva Films movie sa November 18, sa direction ni Wenn Deramas.

Si Yassi ang sumagot sa tanong kung bakit klik ang love team nila ni Andre. “Natutuwa ang fans sa amin dahil nakakatawa raw kami, hindi kami pa-sweet sa isa’t isa. Hindi kami umaarte dahil naturally, sweet daw kami,” sagot ni Yassi.

Bukod kay Daniel, Ben Chan nakuha na rin si Alden

Ang suwerte ni Mr. Ben Chan ng Bench dahil napagsama niya bilang endorsers ng Bench Fix Salon sina Daniel Padilla at Alden Richards na parehong sikat ngayon. Sa kanyang Instagram (IG), nabasa namin ang post ni Mr. Ben na “Officially welcoming Alden to the Bench Fix family. Watch out for his campaign and billboard soon.”

Kasama sa inaabangan ng fans ni Alden ang pagrampa niya sa mga Bench Fashion Show kasama ang iba pang Bench endorsers.

Hininintay din na pagsamahin sa event ng Bench Fix Salon sina Alden at Daniel at ‘pag nangyari ito, kailangang mas malaking venue dahil parang hindi kakasya ang Activity Center ng Trinoma sa fans ng dalawa.

Jennylyn mamimili na kina Dennis at Mike

Magtatapos na mamayang gabi ang My Faithful Husband at sorpresa ang ending. Hindi alam kung magkakabalikan sina Dennis Trillo at Jennylyn Mercado o kay Mike Tan na ito mapupunta.

Thankful sina Dennis at Jennylyn na sa kanila ibinigay ang role nina Emman at Mel respectively na mahirap pero challenging. Ang My Faithful Husband na ang heaviest soap na nagawa nila at napagod ang fans nila sa kaiiyak.

Request ng fans nina Dennis at Jennylyn sa GMA 7, sana ang susunod na project ng dalawa ay light drama para hindi sila laging umiiyak ‘pag nanonood.