Recycled

Labihang gubota sa nagkadaiyang social media platforms niadtong nilabay nga semana, paghuman sa Tamang Panahon Concert. Nagkagubot ang mga hilason kay lagi, recycled o gigamit na og lain ang gown nga gisul-ob ni Maine “Yaya Dub” Mendoza. Nagkapuliki og panalipod ang designer nga si Francis Libiran unsa gyuy nahitabo. Matud ni Libiran, ang maong gown kabahin sa iyang collection niadtong 2013. Gipasul-ob niya kang Kim Chiu isip model. Gawas kang Kim, wala nay laing celebrity nga nisul-ob sa maong gown. Ug ang maong gown gipalit sa TAPE Inc. ug maoy gipasul-ob kang Yaya Dub. Gipalit kay baligya man. Unya recycled diay?

Kanang mupalit ka og sinena unya wala kay nauyonan sa mga gipangpilo, unya paglingi nimo nakauyon ka sa gisul-ob sa mannequin, imong gipahubo kay imong gisukod. Unya nakauyon ka og maoy imong gipalit. Unya recycled nana diay kay gisul-ob man sa mannequin? Si Kim isip model, live mannequin. Girampa niya ang gown aron mahalin. Unya recycled diay na?

Pero ang ako gyung pangutana ba, unsa man diay kun recycled gyud? Kahilas baya nato or niadtong mga tawo nga nagbuwabuwa gyud ang mga baba og panaway kay lagi recycled na matud pa ang gown ni Yaya Dub.  Kay ngano man, wala mo kasuway og sul-ob og tinubuan sa inyong mga maguwang? Wala mo kadawat og sapatos, karsones, blouse nga gikan sa inyong mga ig-agaw, nga ilang gihatag ninyo kay dili na paigo nila? Labaw sa tanan, sakto ang among business editor sa The Freeman Newspaper Joefel Ortega Banzon nga kun maghisgot ta og recycled, murag kitang tanan ang maigo or guilty uy. Kay ngano man, pila naman lang ba nato ang dili magkisikisi og pangukay? Yes, recycle to the highest level manang ukay-ukay, unya nganong perte man gyung panaway ato nila? Mga hilason gyud!

Bitaw few years ago sa usa ka panagtigom, naa koy nadunggan nga dili na matud pa pwede isul-ob og balik sa usa ka party kun nakuhaan na og hulagway ug nigawas na sa newspaper. Unya karon kay naa na may Facebook, sige manta og selfie, balik-balik man atong sinena, dili na diay na pwede? Kamo lang uroy! Ang akoa ba, ngano gud nga mutuo man ta ana nila or magpabuot man ta ana nila nga atoa man ning kinabuhi? Gawas pa, sila diay nagpalit sa atong gisul-ob? Bahala na sila kay ako ibalik ibalik gyud nako og sul-ob ang akong ganahan sul-obon. Kapila na man gani ko nakapa picture with mga artista, unya inig tan-aw nako sa Facebook mao ra diay gihapon akong gisul-ob sa nilabay nga semana kauban ang laing artista. But-anay ni? Hatagi ko og clothing allowance beh aron dili balik-balik akong isul-ob. Pakkk!

In short my dear okRYANians, dili na big deal ang recycled clothes uy! Ang importante mao nga angayan ka sa imong gisul-ob, dili na nimo kinawat ug ikaw maoy nagbayad anang imong gisul-ob gikan sa imong hinaguan. Mag-unsa manang original, or dili lagi recycled pero wala diay kay angay? Kanang mahalon imong sinena, unya imbes mugwapa ka, musamot diay ka chaka imong dagway?  Saman? Awww!