Elmo tuloy na ang paglayas sa Kapuso

Tama lang ang desisyon ng GMA 7 na ipahi­nga muna ang tambalang Elmo Magalona-Janine Gutierrez at pansamantala ay ipareha muna sila sa iba para na rin sa growth ng kanilang loveteam.

Kung palaging sila ang magkasama ay mas madaling magsawa ang manonood at tagasubaybay nila.

Habang hinihintay pa ang resulta ng nababalitang paglipat ni Elmo, binigyan na ng bagong project si Janine, ang Dangwa, na prodyus ng GMA News & Public affairs at sa direksyon ni Adolf Alix, Jr.

Dalawang bagong leading man ang ibinigay kay Janine, sina Mark Herras at Aljur Abrenica, na hindi naman mababasta-basta at hindi naman lalabas na kulang kung ikukumpara sa ka-loveteam ni Janine.

Max nawalan ng kapareha

Gagawa ng movie sa Qatar si Max Collins. Sa­yang at hindi na niya makakatambal si Alden Richards na siyang orihinal na choice na makapareha niya.

Malabo na itong mangyari ngayon dahil sa sob­rang kaabalahan ng aktor at sigurado namang hindi papayag ang AlDub nation na ipareha si Alden sa iba maliban kay Maine Mendoza.

Baka nga makuyog pa si Max kapag ipinagpilitan ng GMA ang kanilang gusto. Wala namang prefe­rence si Max sa kung sino ang ibigay sa kanyang kapareha ng Kapuso Network. Mas mahalaga sa kanya na magawa ang proyekto kahit sino pa ang makasama niya.

Piolo-Claudine movie, inaabangan kung matutuloy

Maganda lalo na para kay Claudine Barretto kung matutuloy ang pina­planong pelikula nila ni Piolo Pascual, ang Pinilit Kong Limutin Ka para sa Viva Films.

Kapamilya kasi si Piolo at maari lamang niyang magawa ang movie kung co-prod dito ang Star Cinema. Naging maganda ang huling pagtatambal nina Claudine at Piolo sa Milan kaya excited ang lahat sa kanilang muling pagsasama sa pelikula ni Claudine.

Julian, mukhang in love na kay Julie Anne

Lalo raw naging close sina Julian Trono at Julie Anne San Jose nang magkasama sila sa Buena Familia.

Kwento ni Julian, pareho raw sila ng preferred music ni Julie Anne at tuwing break sa taping ng serye nila ay lagi silang nagpaparinigan ng kani-kanilang playlist na mostly ay binubuo ng senti songs.

Pangarap din niya na maka-duet ang Asia’s Pop Sweetheart sa isa sa mga kantang gagawin niya in the future.