Pakkk!

Wala koy ka relasyon sulod na sa milabay nga lima ka tuig, busa kining atong hisgutan karon para ra gyud ni ninyo nga mga adunay uyab o magtiayon. Pakkk! Suma pa sa www.iheartintelligence.com ang musunod maoy mga timailhan nga ang imong ka relasyon adunay respeto nimo:

1.Paminawon ang imong hunahuna.  Kun unsa man gani ang ilang buhaton, diha sa personal man o sa ilang pagpanarbaho pangutan-on gyud ka unsay imong opinion, paminawon nila kun unsay imong isulti sa dili pa sila muhukom. Posibli nga dili ang imong isulti niya maoy ilang buhaton gyud, apan kun nagrespeto nimo ang imong hinigugma o kapikas, pangayuan gyud ka niya og opinion sa ginagmay man o dinagko nga panghitabo sa ilang kinabuhi.

2.Dili sila seloso. Suma pa ang selos maoy mupatay sa relasyon. Kun dili magselos ang imong uyab o kapikas sa kinabuhi nga makigsuroy ka sa imong mga higala matag karon ug unya, ug kun dili ka but-an sa asa ka ganahan mulaag, kana nagpasabot nga aduna siyay respeto nimo.

3.Wala silay itago nimo. Bisan og sa ilang hunahuna posibli nga dili ka mo-uyon o nabalaka sila sa mamahimo nimong reaksyon, sultihan gyud ka nila sa kinatibuk-ang detalye, bisan pa man ang kabahin sa ilang kagahapon. Wala silay ililong diha nimo.

4.Matinud-anon. Dili gyud na mamakak nimo kun nagrespeto nimo ang imong uyab, bana o asawa. Walay sekreto, musulti na nimo sa tinuod nga nahitabo, lakip pa niana ang kabahin sa iyang ex.

5.Madasigon. Ang karelasyon nga adunay respeto nimo dili nimo mupugong diha sa imong panikaysikay. Dili ka nila babagan sa pagkab-ot sa imong mga pangandoy sa kinabuhi. Musuporta gyud na nimo ug mutuo sa imong kapasidad ug abilidad.

6.Privacy. Ang hinigugma nga adunay respeto nimo dili mangutingkay sa imong Facebook messages o mutan-aw sa imong cellphone inbox kun malipat ka. Dili ka sukit-sukiton kun aduna kay laing kaistorya sa telepono, sanglit aduna siyay pagsalig nimo ug girespeto niya nga kinahanglan sab ka og privacy bisan og uyab mo.

7.Mupakpak sa imong baruganan. Dili nila lalison ang imong baruganan o opinion kabahin sa mga panghitabo ug sa pagkinabuhi. Bisan og sukwahi ang inyong mga prinsipyo dili ka niya but-an ug dili ka niya pugson aron kalawaton nimo ang iyang opinion.

8.Magsawo mo. Kamong duha ang magtambayayong paghimo sa mga butang aron mulambo ang inyong relasyon. Dili mahimo nga ang usa ra ang maningkamot alang sa relasyon. Ang hinigugma nga nagrespeto ug naghigugma nimo makigsawo nimo sa kalipay man o kasakit.