Pasimple lang, Sam at Maja nagkakaayos na!
Sa tagal ng hinintay ni Sam Milby para makahanap ng makakapalit ni Anne Curtis sa puso niya, wala ni isa mang babae, lalo na artista ang masasabing nagtagumpay na makarelasyon siya. Andyan sina Jessy Mendiola, Shaina Magdayao at maging ang kapareha niya sa matagumpay na movie na The PreNup na si Jennylyn Mercado ay sinasabing siya na, pero hanggang sa isinusulat ito ay walang follow-up sa naging pagtatambal nila.
Kung hindi pa nalaman na magka-text mate sila ni Maja Salvador ay walang mag-aakalang puwede silang maging isang romantic pair. Galing lang si Maja sa isang break-up at kahit na inili-link ito ngayon kay Coco Martin ay mukhang hanggang sa pagiging magkaibigan lang sila ng binata.
Ngayong nalaman na text-text sila ni Sam, lahat ay umaasang mauuwi ito sa totohanan dahil parehong may ningning ang kanilang mga mata kapag napag-uusapan sila.
AiAi hindi na talaga iniwan si Jiro
Talagang todo na ang pagtulong ni AiAi delas Alas kay Jiro Manio. Ngayong nalalapit na ang paglabas ng batang aktor sa rehab ay mukhang makakagawa pa sila ng isang pelikula. Makakatulong ito ng malaki sa pagsisimulang muli ni Jiro.
Kapag sinuwerte siya ay baka maging simula na rin ito ng tuluyang niyang pagbabalik sa kanyang pag-aartista.
Ang movie nila ang unang project ni AiAi sa Regal sa pagbabalik niya rito makaraan ang maraming taon ng pagiging Kapamilya.
Willie matitigil na naman ang programa?!
May panibago na namang problema si Willie Revillame na direktang makaaapekto sa kanyang programang Wowowin na nagsisimula pa lamang umarangkada sa Kapuso Network. Ipinaaaresto siya ng korte sa salang pang-aabuso sa isang anim na taong gulang na batang lalaki dahil sa ginawa niyang pagpapasayaw dito na parang isang macho dancer sa kanyang programang Willing Wille noong 2011. Kapag nakulong siya ay matitigil muli ang kanyang programa.
Pelikula nina Enrique at Liza may bahid ng American movie
Maganda ang trailer ng pelikulang pinagtatambalan nina Enrique Gil at Liza Soberano kasama si Gerald Anderson na I Love You Everyday. Parang may bahid ng American movie na may pamagat na While You Were Sleeping, pero marami rin ang naniniwala na apektado ito ng malaking naging isyu nila sa eroplano.
Kung gaano ka-intense ang paniniwala nina Enrique na malalampasan ng movie ang nalikhang gulo sa pagitan nila ni Liza ay ganun din kainteresado ang mga tagasubaybay sa katotohanan ng naging pahayag ni Enrique.
International classical pianist na si Nick Nangit magkakaroon ng concert
Magkakaro’n ng isang gabi at dalawang oras na concert sa piano ang international classical concert pianist na si Nick Nangit sa Oktubre 23, Biyernes, 7 n.g., sa UP Manila Museum of a History of Ideas na matatagpuan sa Padre Faura, Manila. Ito ay bilang pagdiriwang ng National Children’s Month kasabay na rin ng anibersaryo ng nasabing lugar.
Mabibiyayaan ng konsyerto ang Safe Motherhood Caravan and Education Program ng Philippine Business for Social Progress, at 19th Festival of Trees.
Si G. Nangit ang kauna-unahang magdaraos ng konsyerto sa nasabing lugar na tatampukan ng mga rarely played classical pieces. Tutugtugin din niya for the first time ang mga classical arrangements ng mga OPM works tulad ng Bituing Walang Ningning, May Bukas Pa, at mga piyesa ng The Sound of Music medley nina Rodgers and Hammerstein at isang sorpresang romantic piece nina Alan Bergman, Marlyn Bergman, at David Shire.
- Latest
