Pasayloa ko Nyor..

Nagkasakay mi sa puj sa entertainment editor sa The Freeman Newspaper nga si Vanessa Balbuena gikan sa Fuente Osmeña paingon diri sa among opisina adtong Biyernes sa hapon. Sa daklit lang nakapangutana siya nako kun wala ba ko masakit, kay sila ni Sanden Anadia nagkasakit-sakit, gumikan siguro sa klima karon nga mukalit lamang pagbundak ang uwan, unya mu-init ra sab sa daklit. Ug nitubag ko nga, hasta ko uy nagkasakit-sakit lately, and mas grabe tong akoa. Ingon si Vanessa dili daw maklaro nga nagkasakitsakit ko kay happy ra man ko inig rampa nako sa newsroom! Pakkk!

But the truth is, tulo ka semana gyud ko nga nagkasakit-sakit kay naigo ko og gastroenteritis. Mukalit lang pagsuol akong tiyan, nya magbuntag ra ba gyud. Nasayup pa gyud at first kay abi nako og wala ko mahilisi sa akong gikaon, maong todo inom ko og softdrinks sulod sa lima ka adlaw. Tibway nisamot  gyud diay hinuon akong gihambin nga balatian gumikan sa softdrinks nga ako pa nga gipakapinan og  apple juice. Aguy!

Ug dili kay kana ra, naka feel sab ko nga kuwang ko sa energy gyud, kapoy akong lawas, musakit akong likod, pero wala man sab gyud gihilantan. Lakip sab diay matud pa to sa epekto sa gastroenteritis uy, matud pa sa akong mga nahinabi diri sa opisina nga nakasinati sab sa maong balatian kaniadto. Basta puyra hisgot lang, grabe gyud to nga ordeal akoang gidala-dala sulod sa tulo ka semana. Musuol ra gyud sab akong sakit sa tiyan, dili gyud sab nga tulo ka semana straight. Usahay ganahan ko mukaon, usahay dili. Wa gyud ko kasabot sa akong gibati. Weird, kay I thought I would die na. Mura ko’g magdeliryo. As in!

Sa maong mga panahon, gihatagan ko og tambal sa among company doctor nga si Dra. Bacasmas, two-week medication gyud ko. Perte gyud nakong rosary sab, walay puas nga pag-ampo kay lahi ra gyud akong gibati. Pong pa ni doktora nga kanang dili ka mukaon sa tukmang oras, usa gyud na sa mga rason nga maigo ka nianang maong balatian. Husto siya kay kapin sa tuig na nga dili gyud sakto akong oras tingkaon. Mamahaw gud ko og 10a.m, maniudto og 2p.m, nya mag-dinner og 9p.m.  Impas ang bitok dai! Pakkk!

Pong pa sa akong mga ka istorya nga ang sulbad ra gyud ana mao nga mukaon ka sa hustong oras, bisan og dili pa ka gutomon. Dili sab gyud matud pa maayo nga magpalabi ka og mga mantikaon nga pagkaon. Nikaon ko og lechon ug siomai adtong mga higayon nga nisuol akong tiyan. Hasta sab dugo-dugo. Ingon sab sila nga muinom ka og tubig inig mata gyud nimo sa buntag. Pwes, ang akong gibuhat karon kay muinom na gyud ko og hot lemon water. Akong breakfast kay between 6:30-7a.m. na gyud ug utan bisaya ra gyud akong isud-an, paresan og hard-boiled egg. Mag-usa ka bulan nako nga tubig ra gyud akong imnon kay ingon si doktora dili gyud mahimong muinom og juice, softdrinks, tea, coffee ug milk. Infairness murag nihayag sab baya akong panit. Pakpak!

Pag-uli nako sa Pilar, Camotes sa nilabay nga semana, nagpahilot ko uy. Perteng bugnawa sa akong lapa-lapa, pagsugod na’g pislit ni Manong Eddie, wala ray singko minutos mura na gyud ko og naghumol sa tubig gumikan sa grabeng singot.  Ingon siya grabe kuno kaayo akong hilanat ug lawom sab akong kabuhi. Pong pa niya, ang kabuhi kay tungod gyud na sa mapasahan ka og kaon. Aguy guilty na sab ko! Siya maoy nagtudlo nako nga hot water ang imnon inig ka buntag gyud. Puslan pa man ako na lang sab nga butangan og lemon.  Didto sab ko ni Manong Eddie nakakat-on nga kun musuol ang kabuhi, dili man diay na sa kuto-kuto iduot uy, sa likod man diay na pisliton dapit sa hawak. Ingon siya nga kanang pisliton ang imong tiyan, mao na ang pamaagi nga i-uli sa iyang hustong dapit ang imong kabuhi nga nabungkag, nga gawas nga posibling gumikan sa pasmo, pwede sab nga tungod sa panuhot. Aguy!

Puyra hisgot lang, inanay nako nga nibalik sa akong naandan nga kalagsik. Gidungog sa Ginoo akong mga pag-ampo niya. Happy disposition na ko ron. Of course nakatabang sab gyud ang tambal nga gihatag ni doktora ug ang hilot ni Manong Eddie. Pero kumbinsido gyud ko nga ang nahitabo naggumikan kay medyo niliko man gud ko og agianan lately. For how many months nga wala na gyud ko makasimba sa Basilica, medyo nahilayo ko kang Sto. Niño gumikan sa ka daghang gimbuhaton. Hinungdan nga kinahanglan gyud to nga mahitabo aron mubalik ko sa iyang nataran nga maoy akong gibuhat kapin sa usa ka semana na ug akong ipadayon kutob sa mahimo. Nangayo gyud ko og pasaylo sa Balaang Bata ug nisaad nga muagi gyud ko niya ka unom sa usa ka semana. Sto. Niño is love. God is soo good! Pakpak!