“Thank You Rizzini”

CEBU, Philippines – Nagbagutan karon ang  beauty pageant circuit sa Sugbo gumikan sa pagpanaw sa beauty queen nga si  Rizzini Alexis Gomez  gumikan sa lung cancer.

Ang 25 anyos nga si Rizzini maoy nakalangkat kaniadto sa titulong  Mutya ng Pilipinas Tourism International 2012 ug Miss Tourism International 2012 ug anak siya ni kanhi PBA player nga si  Rhoel  Gomez.

Si Jacqueline Tan, ang presidente sa Mutya ng Pilipnas mipahasubo sa kamatayon ni Rizzini.

“No words can describe the loss we feel for the untimely passing of Rizzini Alexis Gomez. She was a woman of indomitable spirt and her legacy in  Mutya ng Pilipinas will live on in all of us,  Thank you Rizzini, for being truly beautiful inside and out. You are one of a kind,” padayag ni  Tan.

Katapusang nahinabi si Rizzini sa Banat News Hugyaw  niadtong January 2013 pipila ka adlaw  human sa kadaugan niya sa Miss Tourism International nga gipahigayon didto sa Malaysia niadtong katapusang adlaw sa 2012.

Usa sa prinsipyo ni Rizzini mao nga dili mahadlok ug dako og matabang ang pagbansaybansay aron magmalampuson sa usa ka butang.

Gawas sa kampanya sa  pag-ugmad sa turismo, aktibo usab kaniadto si Rizzini sa  kalihukan nga manalipod sa kalikupan sama sa tree planting ug uban pa.

Dili malimtan si Rizzini sa mga Sugbuanon gumikan sa hugyaw niya nga tubag atol sa Q and A portion sa Miss Tourism International, giingnan siya nga maghingan og festival sa Pilipinas ug unsa ang naka-unique niini.

Gitubag ni Rizzini nga usa sa sa mga lig-ong festival sa Pilipinas mao ang  Sinulog Festival nga gihulagway niya nga “one of the grandest and most colorful festivals in the Philippines.”

Nagkanayon siya nga  ang naka-unique niini mao ang hugot  nga debosyon sa mga Pinoy ngadto sa Balaang Bata nga si Señor Sto. Niño

Gisaysay usab ni Rizzini nga  ang Sinulog maoy simbolo sa kultura sa mga Sugbuanon , panaghiusa sa tanan ug pag-ugmad sa tradisyon .

Naglawig ang iyang pangalan niadtong 2008 human siya nakoronahan isip Miss Mandaue ug gisundan usab kini sa Miss Cebu niadtong 2009 kung diin siya ang napili nga first runner-up.

Siya ang nahimong representante sa dakbayan sa Sugbo sa Miss Aliwan Festival Queen 2010 ug siya maoy nakaangkon sa korona.

Sa katapusang pakighinabi sa Banat News Hugyaw kang  Rizzini niadtong 2013, nitambag kini ngadto sa mga babaye nga nangandoy nga mahimong beauty queen ug matud pa niya , “ Dapat dili mo mauwaw, salig gyud mo sa inyong kaugalingon ug dili gyud kalimtan ang pag-ampo”.