Alden gisilotan sa EB

CEBU, Philippines – Nitumaw ang taho nga  suspendido matud pa og usa ka semana si  Alden Richard sa  noontime show sa GMA-7 nga Eat Bulaga.

Ang taho sa   getitfromboy.blogspot.com   nagkanayon  nga gumikan kini sa pagbasa ni Alden sa spiel sa Eat Bulaga alang sa O+ USA nga brand sa cellphone.  Nasayran nga kasamtangang endorser si Alden sa  laing brand sa cellphone nga  SKK Mobile.

Naintriga usab ang kadaghanan sa social media post ni IC Mendoza nga nagkanayon,” How true that Alden Richards is suspended?.”

Nasayran nga pipila na ka adlaw nga wala makalugwa si Alden sa kalyeserye nila  ni Maine Mendoza o Yaya Dub.Gikatakdang mobalik ang aktor sa EB ugmang adlawa.

Bag-ong pelikula ni Claudine sugdan dayon

Human sa kalampusan sa  comeback movie niya nga   “Etiquette for Mistresses”  nagpanikad na si Claudine Barretto sa sunod niya nga pelikula nga himoon sa  Viva Films ug  Star Cinema.

Nahinabi ang aktres sa   programa nila ni  MJ Felipe ug Ogie Diaz sa  dz MM niadtong Sabado, nipadayag kini nga duna sila’y himoon nga panagtigom sunod adlaw    uban sa direktor niini nga si Wenn Deramas ug posibleng sa hinapos nga bahin karong buwana sugdan na ang maong proyekto.

“Tuluy-tuloy na ang pagbabalik ko. I’m preparing for another movie. Siguro hopefully by the end of October, baka magsimula na po kami ng bagong pelikula with direk Wenn Deramas,” suma pa ni Claudine.

Nag-ulohan kini og  “Pinilit Kong Limutin Ka”  ug gipadayag sa aktres  nga angayan atngan ang anunsyo sa mga makauban niya sa maong pelikula.

“Kung sino po ang magiging leading man, confidential pa po. Pero we are really praying na sana matuloy ito talaga,” dugang pa ni Claduine.

Target ni Claudine nga makatrabaho niya og balik sila si Aga Mulach ug Piolo Pascual.  Gusto usab niya makauban sa trabaho sila si Jericho Rosales ug Coco Martin.  (Sanden J. Anadia)

Pinay nakasulod sa X Factor Lithuania

Nadawat  sa audition ang  23 anyos  nga Pinay factory worker  nga si Kris Algelyn Bytautas  sa ‘X Factor Lithuania’.

Gikanta niya ang sikat nga awit ni Adele nga  “Someone Like You”  kung diin nahugyaw ang mga hurado sa iyang performance busa nakakuha kini og tulo ka “yes votes.”

Dili pa lang dugay,   nagmalampuson sa audition ang  4th Power ug si Neneth Lyons sa “The X Factor UK” ug  Amy Vachal sa  “The Voice-USA”.

Sa milabay nga mga katuigan, ubay-ubay na ka mga Pinoy ang nisidlak sa nagkadaiyang kompetisyon.

Niadtong 2012,   napili nga first-runner up si Jessica Sanchez sa American Idol. Sa miaging tuig, nahimong champion ang caregiver nga si Rose Fostanes sa “X Factor Israel”, ug nagmadaugon usab si Marlisa Punzalan sa  “X Factor Australia”.

Sa sayong bahin karong tuiga,  grupong  El Gamma Penumbra maoy nakadaug sa “Asia’s Got Talent.”

Ang  laing Pinoy  nga si  Cyrus Villanueva giingong nakakuha og atensyon sa pagsalmot niya sa “X Factor Australia”.