Nag-artista kay KSP

CEBU, Philippines - “Four years old pa lang ako, gusto ko na talaga mag-artista. Kasi KSP (Kulang Sa Pansin), po ako dati.  Gusto ko talaga lahat sila nakatingin sa akin,” kini maoy giangkon sa ambongan nga 19-anyos nga si Anjo Damiles dihang nahinabi sa pipila ka mga sakop sa E-Group niadtong Biyernes sa hapon, diha sa Lighthouse Restaurant—Mango branch.

Si Anjo maoy celebrity guest sa opening salvo sa usa ka bulan nga pagsaulog sa Gaisano Inc. alang sa ika- 22 nga kasumaran sa Gaisano Country Mall. Gumikan niini, nitekang si Anjo sa Gaisano Balamban Town Center human sa iyang pakighimamat sa press alang sa usa ka mini-show.

 Joseph Roland Damiles ang tinuod niyang ngalan ug nagsugod siya pinaagi sa paghimo og commercials sa edad nga otso anyos.  Ni-audition siya isip usa sa mga leading man ni Julia Barretto sa launching series niini nga “Mirabella” sa ABS-CBN, apan wala niya nakuha ang role.

Ang labing una niyang proyekto gayud sa telebisyon mao ang labing unang teleserye sa Jadine o loveteam  nila ni James Reid ug Nadine Lustre, ang “My App Boyfie.”  Bestfriend sa character ni Dominic Roque ang iyang papel.

Human niini, nasulod siya sa Forevermore, isip usa sa mga barkada sa character sa bida nga si Liza Soberano. Dinhi na siya nasigpatan sa entertainment columnist ug talent manager nga si Ogie Diaz.

“ Pinuntahan niya (Ogie) sa set. Kinausap niya ako kung gusto ko ba daw ituloy ang pag-artista. Syempre oo ang sagot ko,” ni Anjo pa. Dinhi na sila nagkauyon nga si Ogie na maoy mubarog isip iyang talent manager.

Apan pagkakaron, managsama sila ni Liza nga co-manage ni Ogie ug sa Star Magic.

Ang teleserye nga “Doble Kara” maoy labing dako nga break ni Anjo sa telebisyon, sanglit usa siya sa mga leading men ni Julia Montes. Malipayon siya gumikan kay maayo ang ilang rating, hinungdan nga ganado siya nga mutrabaho.

Giangkon ni Anjo nga crush niya si Julia, ingon man usab sila si Kathryn Bernardo ug Liza. Apan dali niyang giklaro nga dili kini tungod kay co-stars sila ni Julia kun dili, ‘bata pa lang ako, Mara Clara pa lang, crush ko na siya.” Nindotan sab matud pa siya sa mga mata ug pahiyum niini.

Ganahan sab matud pa siya kang Kathryn gumikan kay, “cute at magaling umarte.”  Samtang si Liza nga maisip na niya nga igsuon sanglit managsama sila og manager, crush ra gyud matud pa niya ug “kumustahan kami.”

Idolo niya sa showbiz sila si Coco Martin ug John Lloyd Cruz, samtang sa Hollywood sila si Tom Cruise ug Johnny Depp.

Wala matud pa siya’y uyab karong panahona ug mu-focus gyud una siya sa iyang pag-artista sanglit mao gayud kini ang iyang pangandoy sa kinabuhi.

Gibutyag ni Anjo nga sa sinugdanan supak ang iyang pamilya nga mag-artista siya gumikan sa kabalaka nga dili siya makahuman sa iyang pagtungha. Apan gipasalig matud pa niya nga mu-gradutate gayud siya sanglit lahi ra gyud matud pa kun makahuman pag-eskuyla. Kasamtangan siya nga nagkuha og kursong  marketing, apan nine units lamang ang iyang gidala karon nga semester gumikan sa iyang trabaho diin kada adlaw na ang ilang taping.

Nagbuwag na ang mga ginikanan ni Anjo niadtong nagpangidaron pa lamang siya og otso anyos. Atua na matud pa sa Amerika ang iyang amahan ug aduna nay laing pamilya. Ang iyang inahan anaa sa Las Piñas ug nag-manage sa tunghaan nga gipanag-iya sa pamilya niini. Dili matud pa siya musugot nga magminyo pag-usab ang iyang mommy.

Pag-umangkon siya sa kanhi Bb. Pilipinas Universe winner nga si Aileen Leng Damiles. Pangandoy ni Anjo nga makatabang sa iyang pamilya.

“Hindi naman po talaga actually sa amin mapupunta lahat di ba? Anim po silang magkakapatid,” tubag niya dihang giingnan nga dili diay siya breadwinner sanglit nanag-iya man og tunghaan ang pamilya sa iyang inahan.

Subling giklaro ni Anjo nga maningkamot gayud matud pa siya sa showbiz gumikan kay, this is my dream. I can never imagine myself working inside a cubicle or office.”

Panapos niya, “Gusto ko lang naman ngayon ma-maintain ko ang pagiging dito ko sa level na to. Gusto ko rin po na ang tingin ng tao sa akin di mababago, na kung paano ako dati ganon pa rin ako hanggang ngayon. (BANAT NEWS)