Alden at Yaya Dub pinag-iinteresan din ng Reader’s Digest Mag

Natuloy na rin ang first shooting day ni Maine Mendoza o Yaya Dub ng MMFF entry na My Bebe Love kahapon at kahit walang details na inilabas ang mga producer, nalaman pa rin lalo na ng AlDub Nation, fans nina Maine at Alden Richards.

Bawal sabihin kung kailan at kung saan ang shooting ng My Bebe Love lalo na kung mga eksena nina Maine at Alden ang kukunan dahil baka sumugod ang fans. Lalong bawal sabihin kung kailan magsu-shooting na magkasama sina Alden at Maine.

Isa pa palang patunay ng kasikatan ng Aldub love team ay pati ang Reader’s Digest, tumawag sa GMA Artist Center para ma-interview sina Alden at Maine. Inaayos ang schedule ng dalawa para ma-interview ng Reader’s Digest.  

Jennylyn pinupuntirya naman si Piolo

Nag-aaway-away ang followers ni Jennylyn Mercado dahil akala wala na siya sa GMA-7 at lumipat na sa ABS-CBN dahil lang gumawa ng pelikula kapareha si Sam Milby. Inisip ng fans ni Jennylyn na simula na ang The Prenup movie ng Regal Entertainment sa pagiging Kapamilya ng aktres.

Hindi inisip ng mga nag-aaway-away na fans na may kontrata pa si Jennylyn sa GMA-7 at tumatakbo pa ang My Faithful Husband nila ni Dennis Trillo at judge pa siya ng Starstruck 6.

Saka, kung narinig nila ang interview kay Jennylyn sa presscon ng Prenup, nabanggit na natutuwa siyang makapareha si Sam at si Jericho Rosales sa MMFF entry na Walang Forever. Hindi raw niya tatanggihan ‘pag sa susunod, si Piolo Pascual ang makakapareha niya.

Anyway, showing sa October 14 ang Prenup sa direction ni Jun Lana na may mga eksenang kinunan sa New York.

Heart nakulong na, ipinagkalat pa ni Gabby

Nakita namin ang pinost na picture ni Gabby Eigenmann sa Instagram (IG) kuha sa taping niya sa Beautiful Strangers. Sa nakita namin sa picture, tila kuha sa kulungan ang eksena at si Heart Evangelista ang nakakulong dahil sa suot na uniform.

Naalala namin ang nabanggit ni Heart nang mag-press visit kami sa Beautiful Strangers, ikinuwento niya ang mangyayari sa karakter niyang si Kristine, pero nakiusap na ‘wag isulat para hindi ma-preempt. Sa pagpo-post ni Gabby ng picture, nalaman tuloy ang pagdadaanan ng karakter ni Kristine na si Lovi Poe ang sisisihin.

Anyway, next week na lalabas si Gabby sa Beautiful Strangers at maganda ang karakter niya dahil siya ang makaka-love triangle nina Heart at Rocco Nacino. Panibagong aabangan na naman ito ng viewers ng teleserye.