Erap mahimuot sa AlDub

CEBU, Philippines – Naandan na ni Manila  City Mayor Joseph Estrada nga motan-aw og AlDub kalyeserye sa Eat Bulaga panahon sa lunch break. Trending sa social media ang iyang hulagway samtang nagtan-aw siya sa maong serye sulod sa iyang opisina.  Ang bise mayor niya nga si Isko Moreno maoy nag-post sa maong hulagway.

Sinabtanay lang

Nagkadaghan ang mga programa ni Robi Domingo sa ABS-CBN apan gipaneguro sa TV host nga mogahin og oras sa iyang girlfriend nga si Gretchen Ho. Giangkon ni Robi nga aduna’y mga higayon nga nangluod gamay ang iyang uyab apan pagkadugayan nakasabot ra kini sa iyang trabaho. Pabiling lig-on ang relasyon nilang duha.

Unahon ang balay

Gipadayag nila ni Cristine Reyes ug Ali Khatibi nga wala pa sila’y nasabotan nga petsa alang sa ilang kasal gumikan kay unahon nila pagpahuman ang gipatukod nila nga balay.  Una na nga gipahibalo ni Cristine nga engaged na sila ni Ali.  “Pagkatapos ng aming kasal, sa bagong tayong bahay na namin kami tumuloy,” suma pa sa aktres.

Naninuod si Dennis?

Miulbo ang report nga matud diriyot nga napungot sa usa’g-usa sila si Dennis Trillo ug  Mikael Daez sa taping sa seryeng My Faithful Husband. Aduna’y eksena nga nagsinukmagay ang duha  ug wala damha  nga natinuod og sukmag ni Dennis si Mikael.

Next endorsement

Usa ka brand sa shampoo matud pa ang sunod nga endorsement  ni  Maine Mendoza, ug makauban niya dinhi si  Wally Bayola isip Lola Nidora. Mao kini ang ikatulong  endorsement ni Maine o Yaya Dub sukad nisikat ang tandem nila ni  Alden Richards sa Eat Bulaga.

Aktres na gyud

Wala gihapon makatoo hangtud karon si Toni Gonzaga sa nadawat niya nga best actress award sa FAMAS. Human sa 15 ka tuig niya sa showbiz, nakaingon si Toni nga matawag na gyud niya ang iyang kaugalingon nga aktres gumikan sa  maong pasidungog nga iyang nadawat.

Promising stars

Ang talent manager nga si Noel Ferrer mihulagway nila ni Liza Soberano, Nadine Lustre, ug Ruru Madrid nga  most promising stars . Suma pa nga kusog kaayo ang karisma sa maong mga artista ngadto sa katawhan.

Aprobado sa anak

Gikalipay og maayo ni Danica Sotto-Pingris ang report nga pakaslan na sa iyang amahan nga si Vic Sotto ang girlfriend niini nga si Pauleen Luna. Suma pa ni Danica nga dili siya supak sa mga butang nga ikalipay sa iyang amahan.

Maricar nag-negosyo

Natuman na gyud ang taud-taud na nga pangandoy ni  Maricar Reyes nga maka-negosyo og cake. Suma pa sa aktres nga mahiligon na gyud siya  og tam-is sukad sa iyang pagkabata. Mapasalamaton si Maricar sa iyang bana nga si Richard Poon gumikan kay supportive kaayo kini sa iyang gibuhat.