36th Cebu Pop finalists gipahibalo na!

CEBU, Philippines – Human sa 12 ka oras nga screening ug deliberasyon, napili na gyud ang 12 ka finalists nga magtigi sa 36th Cebu Popular Music Festival nga himoon sunod tuig.

Dul-an  sa  150 ka mga komposisyon ang gisumiter sa maong kompetisyon ug gipahigayon ang screening sa University of the Visayas –Main Campus Alumni Office niadtong Sabado. Aduna kini upat ka kategoriya,  ang environmental, inspirational ug  love. Upat ka komposisyon ang magtigi matag kategoriya.

Ang mga pinili nga staff sa UV ug ang  tibuok puwersa sa Soundtraxx Production Studio nga gilangkoban nila ni  Gloria Viilarojo ,   Roland Villarosa, ug  Bea  Daitol  maoy naghan-ay sa screening.

Siyam ka mga hurado ang nilingkod atol sa screening ug kini naglangkob nila ni Baby  Condeno Sam Costanilla, Roger Serna, Eli Gonzales Manlangit, Apple Abarquez , Sanden Anadia, Fr. Lyndon Ruiz, ,  Cerj Michael,  ug Manolito Languido.

Ang  tinuig nga Cebu Pop gipasiugdahan ni kanhi kongresista Eduardo Gullas, isip halad niya ngadto sa Balaang Bata nga si  Sr. Santo Niño ug agig pag-abag usab sa pagpalambo sa Sugbuanong  Musika.

Finalists:

Inspirational category

Kinabuhi Ka Musika by Nathan Philipp C. Amores

Diha sa Pulong Mo  by Bienvenido Racho/ Dennis Canares

Gugma Ma, Kadaugan Ko by Michaen Ricaborda

Ngano Kaha  by Irene Abadiez Bacus

Environmental category

Asa Ta Punita  by Russel Chingkoy Alegado

Manguros Na Lang Tang Daan by Jade Castro

Isla  by Dennis Martin

Kinaiyahan Matahum by Venice June Sy Corsino

Love Song Category

Sa Gugmang Magdaog by Rad Zamora

Sama Sa Dahong Laya  by Angelito Zamora Jr.

Awit Ning Gugma  by Ralph Maligro

Ang Atong Gugma by Archimedes Dairocas/ Luis Sebastian

Rusiana Latigo

LJ nakadaog sa Russia

Napili nga  Best Actress si LJ Reyes sa  bag-ohay lang nga 13th Pacific Meridian International Film Festival gumikan sa maayo niya nga pag-arte sa  indie film nga Anino Sa Likod Ng Buwan.

Gipahigayon ang maong kalihukan sa  Vladivostok, Russia sa miaging adlaw ug nakadaug pud isip Best Director si Jun Robles Lana nga maoy  nagama niini.

Wala makatambong si  LJ sa maong  festival ug si  Direk Jun ang nidawat sa iyang tropeyo.

Nagmaya ang aktres human nakadawat sa maong balita gumikan kay mao kini ang labing una niya nga international award isip Best Actress.

Nahibaw-an ni LJ ang resulta  gumikan sa  text message nga gipadala ni  Direk Jun ug nakahilak gyud siya niini .

Una na nga gipadayag sa Kapuso actress nga dili lalim ang iyang mga naagian sa dihang gihimo pa ang maong proyekto.

"God knows how hard I worked for that film kaya sobrang sarap ng feeling.It is such a good blessing from God. He is so kind to me,” saysay pa ni LJ ngadto sa pep.ph.

Dugang pa sa aktres nga ang  pagdayeg sa viewers sa Anino Sa Likod Ng Buwan maoy labing importante ug bonus na ang award nga iyang nadawat.

"Medyo hindi ko pa rin ma-express in words exactly until now,” suma pa niya.

Nagpanikad na si LJ nga ipasalida dinhi sa Pilipinas ang maong indie film gumikan kay  makakita ang mga Pinoy sa maayong kalidad niini.

"I'm looking forward to that day na ma-appreciate din dito yung film namin," panapos pa ni LJ.