Pambabastos kay Bangs, dadalhin sa korte
MANILA, Philippines - Paano kung ang tagapagtanggol ang siyang maagrabyado?
Tunghayan ang naiibang laban ni Atty. Leila (Bangs Garcia) sa kanyang paghahanap ng hustisya sa pambabastos sa kanya ng mismong boss at abogado ring si Atty. Tuazon (Christian Vasquez) ngayong Sabado sa hit ABS-CBN legal drama na Ipaglaban Mo.
Pinagsikapan ni Leila na makatapos ng abogasya nang sa gayun ay makatulong na siya sa kanyang pamilya at mapag-aral ang dalawang nakababatang kapatid. Pinalad naman siyang makapasok agad sa isang government office kung saan boss niya ang istriktong si Atty. Tuazon.
Hindi tumagal ay tila iba na ang pagtingin at pagtrato ni Atty. Tuazon kay Leila. Makailang beses siya nitong nababastos sa pamamagitan ng kanyang kilos at pananalita.
Umabot na sa sukdulan ang pagkamuhi ni Leila ng bigla itong halikan ni Atty. Tuazon sa harap mismo ng mga kaopisina. Dito na siya pumalag at nagsampa ng karampatang kaso.
Ano ang kahihinatnan ng laban ng dalawang alagad ng batas? Sino ang papanigan ng korte? Paano ipagtatanggol ni Atty. Tuazon ang sarili gayong isa rin itong magaling na abogado?
Kasama rin sa episode sina Roxanne Barcelo, Rochelle Barrameda at Simon Ibarra, sa ilalim ng direksyon ni Cathy Camarillo.
- Latest
