Love Story

Dear Banat News Hugyaw,

Basta Lunes gani, excited gyud ko mobasa sa Banat News tungod sa Love Story, ug ako napud karon ang mo-share sa kaagi nako sa gugma.

Ako si Barkley, 24 anyos nga taga Capitol, Cebu City ug usa ka nurse sa usa ka private hospital dinhi sa Cebu City.

Duna ko'y uyab, iyang name kay Tina, 29 anyos  ug  nurse pud siya apan lahi nga company iyang gitrabahoan.

Nagkaila ming duha ni Tina kay nagkauban mi sa usa ka medical mission sa probinsiya.

Pag-una, nagsigi ko og pasiplat niya , ug nakabantay siya nako ug moduko dayon siya nga kunohay wala kahalata nga nagsige ko og tan-aw kaniya.

Hilig ko og morena busa dali ra kay ko na-attract ni Tina ug samotan na nga buotan pa gyud siya nga pagkatawo.

Pareho ming duha, aktibo moapil og mga medical mission kay nindot man gud ang feeling nga maka-serve ka ubang tawo.

Lima ka buwan sa among panag-ilhanay nagkauyab gyud mi ni Tina ug sama sa ubang relasyon, nag-agi pud mi og mga pagsulay.

Duna' mga panahon nga magsige mi og away tungod sa akong ka seloso. Dili gyud ko mahimutang kung molaag si Tina uban sa iyang barkada.

Tungod sa akong kahigpit, giprangkahan ko ni Tina nga magbuwag na lang mi para dili nami sige'g away.

Wala ko mosugot ug nag-usab gyud ko sa akong kaugalingon, nawala na ang akong pagkaseloso ug pagkahigpit kaniya.

Grabe gyud ang kausaban , ug hadlokan ko nga makahimo og sala kay dili ko ganahan nga magkabuwag mi ni Tina.

Sa kadugay na sa among relasyon, nasuwayan na gyud namo ang butang nga dili pa gyud angayan buhaton sa mga tawong wala pa gikasal.

Nimabdos si Tina hinungdan puwerting sukoa sa iyang mga ginikanan ug gipalayo mi sa usag-usa.

Niana iyang ginikanan nga sila na lang moatiman kang Tina ug sa among anak. Mosugot sila nga mag-ipon ming Tina kung maka-sustento daw ko.

Konserbatibo ang ginikanan ni Tina ug wala sila kadawat sa pagkamabdos sa ilang anak busa gipugos gyud mi nila nga magbuwag.

Niadtong higayona, dili pa ko nurse kay bag-o pako nahuman  og eskwela ug wala ko'y trabaho hinungdan nga supak kaayo sila nako.

Pagka-nurse na nako, natigom-tigom gyud ko og sugod tungod kay paningkamoton gyud nako nga makakita sa akong anak ug kang Tina.

Dugay nami nga wala nagkita kay tua man sila sa ilang probinsya. Niadto ko sa ilang lugar ug nagpauban ko sa higala ni Tina. Nakugang sila sa akong presensya ug puwerting hilaka ni Tina ug nakahilak sad ko kay kita na gyud ko sa among anak. Puwerting sukoa sa iyang mga ginikanan apan nikalma rapud dayon human nako gisultian nga makabuhi nako sa ilang anak tungod kay naa nako'y trabaho.

Nagplano dayon mi ni Tina nga magpakasal, ug mahitabo na kini sunod tuig . Lipay kaayo ko, kay bisan taud-taud mi nga wala nagkita ni Tina, iyaha ra gyud diay ko nga gihuwat kay nakahibalo ra daw siya nga mangita ko og paagi nga magkabalik mi. Happy na kaayo mi sa among relasyon karon. Mo-request lang ko sa lyrics sa I Will Take You Forever by Kris Lawrence and Denise Laurel.

Hello Barkley! Thank you so much sa imong LOVE STORY! Paabuta ugma puhon ang imong request.

Dear HUGYAWnatics, aduna ba kamo'y LOVE STORY? Suwata ka na ug ipadala pinaagi sa pag-like sa atong bag-ong Facebook Page: Banat News Hugyaw (BNH). I-like ang atong page daan, unya i-private message ang imong LOVE STORY. Ayaw lang i-abbreviate  aron matarong og basa.

Mahimo sab nga pinaagi sa snail mail. Ang atong address mao kini:

Love Story

C/o Banat News