Maria Sofia Love wine ang tinutungga, ngenge na pagkatapos ng taping

Hunk actor nagbenta muna ng kotse nang pumunta ng London 

PIK: Si Regine Velasquez ang isa sa tuwang-tuwa sa kasikatang natamo ngayon ni Alden Richards dahil sa kalyeserye ng Eat Bulaga.

Naging close sina Regine at Alden nang magkasama sila sa Bet ng Bayan, at sabi ng Asia’s Songbird nakitaan daw niya ng potential ang Kapuso hunk actor na maging big star. Napakabait pa raw nito, kaya masayang-masaya raw siya sa blessings na dumarating kay Alden.

Isa rin daw siya sa sumusabaybay sa kalyeserye na kinikilig sa AlDub loveteam.

Pati nga ang anak niyang si Nate ay kini-claim na si Yaya Dub daw ang girlfriend niya. Sabi ni Nate, aagawin daw niya si Yaya Dub kay Alden.

Si Regine ang uupong isa sa mga hurado sa StarStruck 6 at maraming mga promising talents daw na posibleng sisikat at susubaybayan sa StarStruck na magsisimula na sa September 7.

PAK: Masama ang loob ng isang hunk model/actor sa mga nagkakalat ng mga malisyosong kuwento sa pagpunta niya ng London kamakailan lang.

Binigyan ng ibang kulay ang pagpunta niya ng London kung saan sinundan nito ang girlfriend niya. Pero may malisya ang kuwentong nilalabas na kung sino raw bang gay benefactor ni hunk model/actor na nag-sponsor ng biyahe niya sa London.

Tahimik lang si hunk model/actor, pero ang mga taong malapit sa kanya ang nagsalita na unfair naman daw na pagbintangan ito ng kung anu-ano. Binenta na nga raw ang kotse nito para meron lang siyang pambili ng ticket at panggastos niya sa London.

Pagbalik ni hunk model/actor ng bansa, diretso na siya sa taping ng isang sexy afternoon drama series kung saan kabilang siya.

BOOM: Lagare sa kagi-guest ngayon ng Internet sensation na si Maria Sofia Love. Pero naloloka raw ang production staff ng ilang programang inaapiran nito, dahil sa mga demand daw nito sa studio.

Kung anu-ano raw ang hinihingi, at ang ikinaloka nila, sa halip na tubig ang tinutungga nito sa taping, white wine ang tinitira niya.

Sabi raw kasi nitong Sofia Love, mas healthy daw ang white wine kaya na-maintain niya ang kapayatan.

Kaya pagkatapos ng taping, ngenge na siya at kung anu-anong kalokahan ang ginagawa sa studio.

Masaya naman daw siyang kasama, pero ngenge na nga lang dahil sa kaiinom ng white wine habang nagti-take.

Galing daw sa isang mayamang pamilya ng mga pulitiko itong si Sofia Love kaya may karapatan naman daw siyang magpakasosyal.