Hugyawnatic

Dear Banat News Hugyaw,

Maayong adlaw sa tanang tigbasa sa Banat News,  ako diay si Grace, 29 anyos  ug taga Labangon, Cebu City.

Aduna na ko’y bana, siya si  Neil, 30 anyos ug taga Talamban  ug puros mi nurse  sa usa ka pribadong hospital sa Cebu City.

Ipaambit diay nako ang among love story, pa-cute ra man ang dagan sa among love story  pero  manghinaut ko nga malingaw mo.

Nagkaila mi ni Niel kay classmate mi pag-college ug siya ra gyud akong na uyab sa tibuok nakong kinabuhi   hangtud nga nagkaminyo mi.

Niadtong college pa mi, dili kay mi suod niya kay arte kaayo na nga tawo si Niel, mamili ra gyud siya kung kinsa ang iyang friends.

Mosabay ra siya sa mga tawo nga sama niya, seryoso ra kaayo ug mga hilomon. Suplado pud siya gamay.

Wala damha, bisan artehan ko ani niya, kalit man ni-spark ang akong kasing-kasing ngadto kaniya  ug wala gyud ko kasabot sa akong feelings.

Tungod sa iyang pagka-suplado , dili gyud nako siya malimtan maong magkatawa gyud ko sa akong kaugalingon kay  permi na man ko maghuna-huna niya.

Amo siya hagdon sa akong barkada nga mo-jam pud kung manglaag mi pero igo ra man siya moingong “pasensya kay wala ko’y gana molaag”.

Nakaingon gyud ko nga suplado gyud ning tawhana kay mahimo raman gyud siya motubag og tinarong, kanang dili makainsulto og tawo.

Aduna’y higayon nga  Christmas party  sa among school department, late ko naabot sa venue ug nakita ko dunay bakante nga lingkuranan nga tupad sa gilingkuran ni Niel maong nananghid ko niya nga molingkod ko sa iyang tupad kay mao ra man ang  nakit-an nako nga bakante.

Nalisang ko sa iyang gitubag kay nianan man siya og, ” No choice man, kay mao ra man na ang bakante.”

Bisan sa akong kapungot, igo ra ko ni-smile ug nilingkod ko sa iyang tupad. Siyempre gikulbaan ko gamay, kay tupad baya nako ang tawo nga akong ganahan.

Nakaingon ko, unsa man akong nakaon uy nganong ganahan ko niya nga suplado man unta siya nga pagkatawo.

Naabot ang panahon nga nangayo siya og number nako, nakugang kaayo ko unsa ang iyang rason, wala na lang sad ko mangutana aron dili mahalata nga gikilig ko.

Pag-abot nako sa among balay, dunay ni-text nako ug nag-heart ang pamorma sa akong mata kay siya mao’y ni-text  nako  ug gusto niya nga mag-date mi sa weekend.

Sa dihang nagkita na mi, hilom gyud kaayo sa pila ka minutos namo nga paglingkod sa usa ka coffee shop diha sa Ayala.

Nangutana dayon ko niya kung nganong nangimbitar man siya og date nga suplado man kay siya nako ug halos dili gani managad nako.

Dili ko kalimot sa iyang gitubag, nga mura kog namugnaw sa kauwaw pero gikilig ko ha, niana siya ‘Sa pagsige nimo og papansin nako, na-kuryoso na hinuon ko nimo.  Nakuha nimo akong atensyon, ug pila na ko kaadlaw nga sigeg bantay nimo, cute man diay kay ka.’

Mura kog gibayaw sa langit, nabantayan gyud diay ang pagsige nako og patagad niya, pero okay na  lang uy, ang importante napansin gyud diay ko niya.

Sa pagsige namo og date, nagkailhanay mi og maayo sa usag-usa  hangtud nga nagkauyab gyud mi.

Sa  upat ka tuig sa among relasyon isip manag-uyab , nagpakasal dayon mi kay segurado na gyud mi sa usag-usa ug malipayon ming duha uban sa usa namo ka anak.  Mo-request diay ko og lyrics sa  Forever by Mariah Carey .

* * *

Hello Grace! Thank you so much sa imong LOVE STORY! Paabuta ugma puhon ang imong request.

Dear HUGYAWnatics, aduna ba kamo'y LOVE STORY? Suwata ka na ug ipadala pinaagi sa pag-like sa atong bag-ong Facebook Page: Banat News Hugyaw (BNH). I-like ang atong page daan, unya i-private message ang imong LOVE STORY. Ayaw lang i-abbreviate  aron matarong og basa.

Mahimo sab nga pinaagi sa snail mail. Ang atong address mao kini:

Love Story

C/o Banat News

V. Gullas St. corner D. Jakosalem St.

Barangay Sto. Nino

6000 Cebu City, Philippines