Nakaligtas nga sa cancer April Boy Regino malapit nang mabulag

PIK: Finally, mabibigyan na rin ng break ang isang alaga ni Kuya Germs na si Ken Chan.

Si Ken ang kinuhang bida sa isang bagong drama series ng GMA 7 kung saan gaganap siya bilang isang transvestite.

Kakaiba ang kuwento at sa rami ng mga nag-audition para gumanap sa mapanghamong role, si Ken ang bumagay kaya malaking pagbabago raw ito sa kanyang career.

PAK: Aminado si Tito Joey de Leon na lalong natsa-challenge ang mga taga-Eat Bulaga kung ano pa ang puwede nilang gawin para lalong maging kapana-panabik ang  kuwento ng AlDub loveteam nina Alden Richards at Yaya Dub.

Sabi ni Tito Joey; “Kasaling-kasali ako dito eh. Paggising ko sa umaga ngayon…dati paggising ko papasok, lang ako ng Eat Bulaga. Ngayon bago matulog, eto na iniisip ko hanggang ano…pati ang buong pamilya ko.

“Natutuwa kami sa mga pangyayari at nakadagdag ligaya pa ‘yung nababasa naming tweets, at mga reaksyon pati sa diyaryo, sa radyo, sa balita na lahat ay naging bahagi nito.”

Hindi raw malayong mangyaring magkadebelopan sina Alden at Yaya Dub dahil nakikita raw niya sa mga kilos ng dalawa na may lihim na silang pagkagusto sa isa’t isa.

“Tanungin natin si Alden baka meron na rin siyang secret na pagtingin o paglingap kay Yaya Dub,”  napapangiting pahayag ni Tito Joey.

BOOM: Bibigyan ng GMA Records si April Boy Regino ng panibagong break, kaya pumirma ng kontrata para sa bagong album na gagawin niya.

Magaling pa rin si April Boy pagdating sa pagkanta, pero ang kaibahan lang ngayon ay nabubulag na siya.

Dahil sa Diabetes, hindi nakakakita ang kanang mata ni April Boy, at ang kaliwang mata naman ay 50 percent na lang ang vision.

Nalagpasan nga raw ni April Boy ang Prostate Cancer na pinag­daanan niya noon, pero nagka-Diabetes naman siya, at pinagsisihan ng magaling na singer ang pang-aabuso raw niya sa kanyang katawan.

Inamin ni April Boy ang pagiging lasenggero kaya pinagdusahan na raw niya ngayon ang mga karamdamang dumating sa kanya.

Ilan daw sa tumulong sa kanya para magpagamot ay ang Davao City Mayor Rodrigo Duterte at si Manny Pacquiao.